Mme Mbụme Ẹtode Mme Andikot

Nnyịn ima ikop nduaidem iban̄a ukpepn̄kpọ nnyịn ke n̄ke Jesus aban̄ade erọn̄ ye ebot. Ke ikerede iban̄a obufa ifiọk oro ẹkenemede ke “Enyọn̄-Ukpeme” eke October 15, 1995, nte nnyịn imekeme ndisụk ndọhọ ke Mme Ntiense Jehovah ke ẹbuana ke utom edibahade mfịn?

Ih. Nte an̄wan̄ade, ediwak owo ẹnyene eyịghe ẹban̄a emi koro Matthew 25:31, 32 ọdọhọ ete: “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie: Enye oyonyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot.” Enyọn̄-Ukpeme eke October 15, 1995, ama owụt ntak oro mme ufan̄ikọ ẹmi ẹnyenede n̄kpọ ndinam ke akwa ukụt ama ọkọtọn̄ọ. Jesus eyedi ke ubọn̄ esie ye mme angel esie oyonyụn̄ etie ke ebekpo ubiereikpe esie. Ekem, enye ayabahade mme owo. Ke nso usụn̄ifiọk? Enye edinam ubiere etiene se mme owo ẹkenamde m̀mê se mmọ mîkanamke mbemiso ini oro.

Nnyịn imekeme ndimen emi ndomo ye edinam oro ẹdade ẹkesịm ubiereikpe ke esopikpe. Uyarade esidu awak ke anyanini mbemiso esop esịmde ubiere onyụn̄ ọnọde ubiereikpe. Uyarade kaban̄a m̀mê mme owo oro ẹdude uwem idahaemi ẹdidi erọn̄ m̀mê ebot omodu awak ke anyanini. Ndien enye ke osụk ededi. Edi ke ini Jesus editiede ke ebekpo, ikpe eyesịm utịt. Enye eyeben̄e idem ndinọ ubiereikpe. Ẹyebahade mme owo ẹnịm ẹnọ nsinsi edisịbe mfep m̀mê nsinsi uwem.

Nte ededi, akpanikọ oro nte ke edibahade mme owo nnọ uwem m̀mê n̄kpa oro ẹtịn̄de ẹban̄a ke Matthew 25:32 osụk odu kan̄a ke ini iso iwọrọke ite ke edidianade nnịm, m̀mê edibahade, ndomokiet ididụhe mbemiso oro. Bible, ke Matthew ibuot 13, etịn̄ aban̄a utom edibahade kiet oro akadade itie ke mbemiso. Nte enemde, n̄wed oro Ndidiana Kiet ke Utuakibuot Ata Abasi Kierakiet, page 179-180, eneme aban̄a emi ke idak ibuotikọ oro “Edibahade Mme Owo.”a N̄wed oro ọdọhọ ete: “Ikpọ n̄kpọntịbe efen ẹdu n̄ko oro Jesus ke n̄wọrọnda usụn̄ akabuande ye utịt editịm n̄kpọ ẹmi. Kiet ke otu mmọemi edi edibahade ‘nditọ Obio Ubọn̄’ n̄kpọn̄ ‘nditọ andidiọk.’ Jesus ama etịn̄ aban̄a emi ke n̄ke esie oro aban̄ade in̄wan̄ ibokpot emi owo usua akadade idiọk n̄kpasịp edisuan esịn.”

N̄wed oro eketịn̄ aban̄a n̄ke Jesus oro ẹtịn̄de ke Matthew 13:24-30 ẹnyụn̄ ẹnamde an̄wan̄a ke mme ufan̄ikọ 36-43. Tịm fiọk ke ufan̄ikọ 38 ete ke nti mfri ibokpot ẹda ẹban̄a nditọ Obio Ubọn̄, edi idiọk n̄kpasịp ẹda ẹban̄a nditọ andidiọk. Ufan̄ikọ 39 ye 40 ẹwụt ẹte ke “akpatre ini eyo emi”—ini emi nnyịn idude kemi—ke ẹtan̄ idiọk n̄kpasịp ẹbok. Ẹbahade mmọ ẹnịm ndien ke akpatre ẹfọp, ẹsobo.

N̄ke emi aban̄a mme Christian oro ẹyetde aran (ẹmi ẹkotde nditọete Jesus ke n̄ke erọn̄ ye ebot). Kpa ye oro, ana in̄wan̄în̄wan̄ nte ke akpan utom edibahade ke ada itie ke eyo nnyịn, emi ẹbaharede mme Christian oro ẹyetde aran ẹkpọn̄ mbon oro ẹdọhọde nte idide mme Christian edi ẹmi ẹwụtde idemmọ nte idide “nditọ andidiọk.”

Jesus ama ọnọ mme uwụtn̄kpọ efen aban̄a edibahade mme owo, m̀mê edidianade nnịm. Ti ete ke enye eketịn̄ aban̄a ntatara usụn̄ oro adade aka nsobo ete: “Mme andidụk ke esịt ẹnyụn̄ ẹwak.” (Matthew 7:13, sịghisịghi ubọkn̄wed edi eke nnyịn.) Oro ikedịghe utịn̄ikọ aban̄ade sụk akpatre utịp. Enye ekedi utịn̄ikọ aban̄ade edinam oro akade-ka iso, kpa nte edide idahaemi ye esisịt ibat oro ẹkụtde mfafaha usụn̄ oro adade esịm uwem. Ti, n̄ko, ete ke ini okosiode mme apostle ọdọn̄, Jesus ama ọdọhọ ete ke mmọ ẹyekụt mbon oro ẹdidotde. Mbon eken ididotke, ndien mme apostle ẹkenyene ndiken̄ ntan ikpat mmọ mfep “nte n̄kpọ-ntiense” nnọ mme utọ owo oro. (Luke 9:5) Nte idịghe akpanikọ nte ke mbiet n̄kpọ oro ke etịbe nte mme Christian ẹnamde an̄wan̄wa utom ukwọrọikọ mmọ mfịn? Ndusụk owo ẹnyịme nte ọfọnde, ke adan̄aemi mbon efen ẹsịnde etop Abasi oro nnyịn ikamade.

Mme ibuotikọ ke Enyọn̄-Ukpeme oro ẹnemede ẹban̄a erọn̄ ye ebot ẹkedọhọ ẹte: “Ke adan̄aemi ubiereikpe nte ẹnamde an̄wan̄a ke n̄ke oro edide ke n̄kpet n̄kpet ini iso, idem idahaemi akpan n̄kpọ ke ada itie. Nnyịn mme Christian ke ibuana ke utom unyan̄a uwem eke editan̄a etop oro ọtọde ubahade ke otu mme owo. (Matthew 10:32-39).” Ke ubak udịmikọ oro ke Matthew ibuot 10, nnyịn ikot ite ke Jesus ọkọdọhọ ete ke nditiene enye eyesịn ubahade—ke ufọt ete ye eyeneren, eyenan̄wan ye eka.

Ke akpatre, nditọete Christ oro ẹyetde aran ẹmeda iso ke edikwọrọ etop Obio Ubọn̄ emi ke ofụri ererimbot. Nte mme owo ẹkopde enye ẹnyụn̄ ẹnyịmede m̀mê ẹsịnde, mmọ ke ẹwụt se mmọ ẹdide. Nnyịn mme owo ikemeke, ndien nnyịn ikpenyeneke, ndidọhọ, ‘Owo enyeemi edi erọn̄; enyeoko edi ebot,’ ke usụn̄ifiọk oro ẹwụtde ke Matthew ibuot 25. Nte ededi, nnyịn ndinam mme owo ẹkop eti mbụk anam mmọ ẹwụt ebiet mmọ ẹdade ẹnọ—se mmọ ẹdide ye nte mmọ ẹnamde n̄kpọ ye nditọete Jesus. Ntem, ukem nte uyarade oro akade-ka iso awak ke esopikpe, ubahade ke ufọt mbon oro ẹnọde nditọete Jesus ibetedem ye mbon oro ẹsịnde ndinọ mmọ ibetedem ke ana in̄wan̄în̄wan̄. (Malachi 3:18) Nte Enyọn̄-Ukpeme oro okowụtde, idibịghike Jesus ọmọn̄ etie ke ebekpo esie onyụn̄ ebiere ikpe, abaharede mme owo ke ido ikpe ke akpatre usụn̄ifiọk ọnọ uwem m̀mê edisịbe mfep.

[Mme Ikọ idakisọn̄]