Ke Ini Mme Ntiense Jehovah Ẹwahade

Nso ke mbon Catholic ẹkpenam ke ini kiet ke otu Mme Ntiense Jehovah awahade ufọk mmọ? N̄wed ndondo emi oro Ufọkutom Utịm Ukpepn̄kpọ Idụt eke Mme Bishop Italy eketịmde ọdọhọ ete: “Ndisịn ndineme nneme, ke mfọnido edi kpa ye oro enyene iwụk, idịghe unana ima ke afan̄ emi.”

Idịghe kpukpru mbon Catholic ẹnyịme, nte leta oro eren kiet emi odụn̄de ke Foggia, Italy, ọkọnọde ẹsọk Gazzetta del Mezzogiorno eke usen ke usen owụtde:

“Ami ndịghe kiet ke otu Mme Ntiense Jehovah. Ndi owo Catholic. Edi mmokop n̄kpaidem mban̄a ndusụk ibet oro ufọkabasi ọnọde mme andibuana, ọdọhọde mmọ ẹdian ntọt ke enyịnusụn̄ mmọ ndibịn Mme Ntiense Jehovah mfep. Kamse, mme owo ẹmi n̄kukụre ẹkama Ikọ Abasi, ndien mmọ ẹn̄wam mbon en̄wen ẹnyene ata ntotụn̄ọ ifiọk Bible. Emi anam nti ini oro utọrọ okodụkde Italy ndien ẹnọ nnyịn item ke nte ikpefepde ndidi se udọn̄ọ emi ebede.

“Ke ekikere mi, emi owụt ete ke ufọkabasi esinịm mme ewụhọ ye unana edikere mban̄a udọn̄ mme andibuana. Edi ke ndusụk isua idahaemi, mmokụt ke idem mbon Catholic ke ẹsan̄a ke ufọk ke ufọk, ẹwahade ufọk Mme Ntiense Jehovah n̄ko; ndien mmọ ẹsiyak mmọ ẹdụk, ẹnemede nneme ye mmọ, ye unana edisịn owo ekededi.”

Mme Ntiense Jehovah isinyịkke mme owo ẹkop etop mmọ. Utu ke oro, mmọ ẹdomo ndibuana idotenyịn oro Ikọ Abasi ọnọde oro mmọ ke idemmọ ẹkụtde nte ọnọde ndọn̄esịt ke ntịme ntịme ini emi ye mbon en̄wen. Ke ndisan̄a ke ufọk ke ufọk, ọkọrọ ye ke ndineme nneme ye mbon oro mmọ ẹsobode ke efak, Mme Ntiense Jehovah ẹbuana eti mbụk Obio Ubọn̄ Abasi ye mbon oro ẹnyịmede ndikop.—Matthew 24:14; Utom 5:42; 17:17.