Yak Mbufiọk Ekpeme Fi
“Ekikere eyetie ekpeme fi, mbufiọk eyenịm fi.”—MME N̄KE 2:11.
1. Mbufiọk ekeme ndikpeme nnyịn nsio ke nso?
JEHOVAH oyom fi owụt mbufiọk. Ntak-a? Koro enye ọfiọk ete ke enye eyekpeme fi osio ke nsio nsio n̄kpọndịk. Mme N̄ke 2:10-19 ọtọn̄ọ ke ndidọhọ: “Koro eti ibuot oyodụk fi ke esịt, ifiọk oyonyụn̄ enem ukpọn̄ fo; ekikere eyetie ekpeme fi, mbufiọk eyenịm fi.” Ekpeme fi osio ke nso? Osio ke mme utọ n̄kpọ nte “idiọk usụn̄,” mbon oro ẹkpọn̄de edinen usụn̄, ye mme owo ẹmi ẹkwan̄ade ke ido mmọ.
2. Nso idi mbufiọk, ndien utọ ewe ke mme Christian ẹnen̄ede ẹyom?
2 Ekeme ndidi afo eyeti ete ke mbufiọk edi ukeme ekikere emi ẹdade ẹbahade n̄kpọ kiet ẹkpọn̄ en̄wen. Owo emi enyenede mbufiọk ọdiọn̄ọ mme ukpụhọde ekikere m̀mê n̄kpọ onyụn̄ enyene eti ubiere. Nte mme Christian, nnyịn imenen̄ede iyom mbufiọk eke spirit emi ọkọn̄ọde ke nnennen ifiọk Ikọ Abasi. Ke ini nnyịn ikpepde N̄wed Abasi, etie nte n̄kpọ eke nnyịn idọkde itiat ubọp ufọk mbufiọk eke spirit. Se nnyịn ikpepde ekeme ndin̄wam nnyịn ndinam mme ubiere oro ẹnemde Jehovah esịt.
3. Didie ke nnyịn ikeme ndinyene mbufiọk eke spirit?
3 Ke ini Abasi okobụpde Edidem Solomon eke Israel m̀mê nso edidiọn̄ ke enye okoyom, akparawa andikara oro ọkọdọhọ ete: “Nọ owo fo ndien esịt ọniọn̄, man n̄kpe ikpe ikọt fo, man ntịm mfiọk eti ye idiọk.” Solomon ekeben̄e mbufiọk, ndien Jehovah ama ọnọ enye ke udomo oro mînyeneke mbiet. (1 Ndidem 3:9; 4:30) Man inyene mbufiọk, oyom nnyịn ibọn̄ akam, nnyịn inyụn̄ inyene ndikpep Ikọ Abasi ye un̄wam n̄wed oro ẹnọde un̄wana ke n̄kan̄ eke spirit emi “asan̄autom emi anamde akpanikọ, onyụn̄ enyenede ọniọn̄” ọnọde. (Matthew 24:45-47) Emi ayan̄wam nnyịn ndikọri mbufiọk eke spirit ke udomo oro edinamde nnyịn ikabade itie nte ‘ikpọ owo ke ekikere,’ ikemede “ndidiọn̄ọ [m̀mê, ndifiọk ukpụhọde ke ufọt] se ifọnde ye se idiọkde.”—1 Corinth 14:20; Mme Hebrew 5:14.
Akpan Udọn̄ Kaban̄a Mbufiọk
4. Ndinyene enyịn oro “enen̄erede ese” ọwọrọ nso, ndien didie ke enye ekeme ndinọ nnyịn ufọn?
4 Ye nnennen mbufiọk, nnyịn imekeme ndinam n̄kpọ ke n̄kemuyo ye mme ikọ Jesus Christ: “Ẹkam ẹbem iso ẹyom Obio Ubọn̄ [Abasi] ye edinen ido Esie; ndien ẹyedian kpukpru n̄kpọ [obụkidem] ẹmi ẹnọ mbufo.” (Matthew 6:33) Jesus ọkọdọhọ n̄ko ete: “Utuenikan̄ ikpọkidem fo edi enyịn fo; ke ini enyịn fo enen̄erede ese, ofụri ikpọkidem fo ayayama.” (Luke 11:34) Enyịn edi ndamban̄a utuenikan̄. Enyịn oro “enen̄erede ese” enen, owụhọ ke n̄kpọ. Ye utọ enyịn oro, nnyịn imekeme ndiwụt mbufiọk inyụn̄ isan̄a ye unana edituak ukot nduọ ke n̄kan̄ eke spirit.
5. Kaban̄a mme edinam mbubehe, nso ke nnyịn ikpenyene ke ekikere iban̄a uduak esop Christian?
5 Utu ke ndinam enyịn mmọ enen̄ede ese, ndusụk owo ẹmenam uwem mmọ ye uwem mbon en̄wen ọsọn̄ ye mme idomo idomo edinam mbubehe. Edi nnyịn ikpenyene nditi nte ke esop Christian edi “adaha ye isọn̄ eke akpanikọ Abasi odorode ke esịt.” (1 Timothy 3:15) Ukem nte mme adaha ufọk, esop ọsọn̄ọ omụm akpanikọ Abasi akama, idịghe ndutịm mbubehe owo ekededi. Owo ikowụkke mme esop Mme Ntiense Jehovah nte mme itie ndimenede mme ufọn unyamurua, n̄kpọurua, m̀mê mme utom. Ana nnyịn ifep ndibịne ọkpọkpọ edinam mbubehe ke Ufọkmbono Obio Ubọn̄. Mbufiọk an̄wam nnyịn ndikụt nte ke Mme Ufọkmbono Obio Ubọn̄, mme Ukpepn̄kpọ N̄wedesop, mme mbono, ye ikpọ mbono Mme Ntiense Jehovah ẹdi mme itie ebuana Christian ye nneme eke spirit. Edieke nnyịn ikpadade itie ebuana eke spirit ndimenede orụk ndutịm unyamurua ekededi, nte enye ikpowụtke ke nsụhọde n̄kaha ndusụk unana ediwụt esịtekọm ke mme n̄kpọ eke spirit? Owo ikpedehede ida mme ebuana esop inam mbubehe okụk.
6. Ntak emi owo mîkpanyamke m̀mê ndimenede mme n̄kpọurua ye edinam unyamurua ke mme mbonoesop?
6 Ndusụk owo ẹmeda ebuana ukara Abasi ẹnyam mme n̄kpọ un̄wam nsọn̄idem m̀mê eke uyai, ibọk ẹnọde idem nsọn̄idem, mme n̄kpọ unyene nneme, mme n̄kpọutom ubọpn̄kpọ, mme ndutịm uka isan̄, mme ndutịm m̀mê n̄kpọutom kọmputa, ye ntre ntre eken. Nte ededi, mme mbonoesop idịghe itie ndinyam m̀mê ndimenede mme n̄kpọurua m̀mê utom. Nnyịn imekeme ndikụt edumbet oro enyenede n̄kpọ ndinam mi edieke nnyịn itide ite ke Jesus ama “ebịn mmọ kpukpru, ye erọn̄ ye enan̄, ẹwọn̄ọ ke temple; onyụn̄ an̄wan̄a okụk mme okpụhọ-okụk ọduọk, onyụn̄ onụk mme okpokoro mmọ ọduọk; onyụn̄ ọdọhọ mme anyam-ibiom ete, Ẹtan̄ n̄kpọ ẹmi ẹnyọn̄ọ; ẹkûnịm ufọk Ete Mi ke ufọk mbubịne.”—John 2:15, 16.
Nso Kaban̄a Edinam Mbubehe?
7. Ntak emi ẹyomde mbufiọk ye ukpeme ke se iban̄ade mme edinam mbubehe?
7 Oyom mbufiọk ye ukpeme ke ini ẹsịnde idem ke edinam mbubehe. Yak idọhọ ke owo oyom ndibuọt okụk onyụn̄ anam mme orụk un̄wọn̄ọ ẹmi: “Mmọnọ ubiọn̄ nte ke ayanam okụk.” “N̄kpọ iditakke fi. Emi edi ata idem n̄kpọ.” Kpeme idem ke ini owo ekededi anamde mme utọ un̄wọn̄ọ oro. Ekeme ndidi enye itịn̄ke ata idem n̄kpọ mîdịghe edi itịn̄ke akpanikọ, koro ndisịn okụk ke mbubehe iwakke ndidi n̄kpọ oro enyenede nsọn̄ọ. Ke akpanikọ, ndusụk oburobụt, mbon nneminua ẹma ẹbian̄a mme andibuana ke esop. Emi anam iti “owo eke mîten̄eke Abasi” ẹmi ẹkedọn̄de ikpat ndịbe ndịbe ẹdụk esop akpa isua ikie ẹnyụn̄ ‘ẹwọn̄ọrede mfọn Abasi ẹsịn ke obukpo uwem.’ Mmọ ẹketie nte edet edet itiat ke isọn̄ mmọn̄ ẹmi ẹkemede ndiwai nnyụn̄ n̄wot mme ọwọk ewọk. (Jude 4, 12) Edi akpanikọ, mme uduak mbon abian̄a ẹdi isio, edi mmọ n̄ko ẹsiwo mme andibuana ke esop.
8. Nso itịbe ke ebuana ye ndusụk mbubehe ẹmi ẹketiede nte ke ẹyeda udori ẹdi?
8 Idem mme Christian oro ẹnyenede nti uduak ẹma ẹbuana ntọt ẹban̄ade mme mbubehe oro ẹtiede nte ke ẹyenyene udori, n̄kukụre ẹdide ẹdikụt ẹte ke mmimọ ye mbon oro ẹketienede uwụtn̄kpọ mmimọ ẹma ẹtaba okụk oro mmọ ẹkesịnde. Nte utịp, ediwak Christian ẹma ẹtaba mme ifetutom ke esop. Ke ini mme mbubehe unyene uforo usọp usọp ẹkabarede ẹdi abian̄a abian̄a edinam, n̄kukụre owo oro ọbọde ufọn edi owo abian̄a oro, emi esisopde ye unana ubiatini. Didie ke mbufiọk ekeme ndin̄wam owo ndifep mme utọ idaha oro?
9. Ntak emi ẹyomde mbufiọk man ẹdiọn̄ọ se ẹtịn̄de ẹban̄a mbubehe?
9 Mbufiọk ọwọrọ ndikeme ndifiọk se itiede mbukpọn̄ mbukpọn̄. Oyom ukeme emi man ẹkeme ndifiọk se ẹtịn̄de ẹban̄a mbubehe. Mme Christian ẹbuọt idem ye kiet eken, ndien ndusụk owo ẹkeme ndikọk ibuot nte ke nditọete iren ye iban eke spirit idisịnke idem ke idiọk mbubehe oro edisịnde okụk ekemmọ mme andinịm ke akpanikọ ke itiendịk. Edi akpanikọ oro nte ke anam mbubehe edi Christian inọhọ ubiọn̄ nte ke enye enen̄ede ọfiọk mbubehe m̀mê ke mbubehe esie oyokụt unen.
10. Ntak emi ndusụk Christian ẹsiyomde ebuọt kaban̄a mbubehe ẹto ekemmọ mme andinịm ke akpanikọ, ndien nso ikeme nditịbe nnọ mme utọ mbubehe oro?
10 Ndusụk Christian ẹyom ebuọt ndida nnam mbubehe ẹto nditọete iren ye iban koro mme itieutom unọ ebuọt oro ẹtịmde ẹfiọk tutu amama mîdinọhọ ebuọt kaban̄a mbubehe mmọ oro ekemede ndisobo ntakurua. Ẹma ẹbian̄a ediwak owo ndinịm nte ke ikpîkpu edisịn okụk mmọ ke mbubehe, mmọ ẹkeme ndinyene usọp usọp, mmemmem mfọniso ye unana edinam ọkpọsọn̄ utom mîdịghe iso-ọfọn nditre ndinam utom ofụri ofụri. Ndusụk owo ẹsinyene udọn̄ ndisịn okụk ke mbubehe ke ntak n̄kon̄ine oro asan̄ade ye enye, n̄kukụre nditaba okụk oro ẹkefamde ẹnịm ke ofụri eyouwem! Christian kiet ama esịn akamba ibat okụk ke mbubehe, odoride enyịn ndinyene mbahade 25 eke ikie ke udori ke n̄kpasịp urua iba. Enye ama ataba ofụri okụk oro ke ini ẹkedọhọde ke okụk ama atahade. Ke edinam mbubehe efen, ọbọpufọk ama ọbuọt ediwak okụk oto mbon en̄wen ke esop. Enye ama ọn̄wọn̄ọ ndinọ udori oro akawakde nte mîwụtke eti ibuot, edi okụk oro ama atahade enye ama onyụn̄ ataba okụk oro ọkọbuọtde.
Ke Ini Edinam Mbubehe Ẹkpude
11. Nso item ke Paul ọkọnọ aban̄a idiọkitọn̄ ye ima okụk?
11 Mme mbubehe ndikpu amada ekesịm edikụt edikpu onyụn̄ akam ada ekesịm editaba idaha eke spirit ke n̄kan̄ ndusụk Christian oro ẹkesịnde idem ke mme edinam oro mîwụtke eti ibuot. Edikpu ndiyak mbufiọk anam n̄kpọ nte ukpeme amada iduọesịt ye iyatesịt edi. Afia idiọkitọn̄ omomụm ediwak owo. “Ama edi . . . edisịn esịt ke n̄kpọ owo [“idiọkitọn̄,” NW], ẹkûyak ẹtịn̄ ẹban̄a n̄kpọ oro ke otu mbufo, nte odotde ikọt Abasi,” ntre ke Paul ekewet. (Ephesus 5:3) Ndien enye ama odụri owo utọn̄ ete: “Mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọk udọn̄, eke ẹdụride owo ẹsụhọde ke nditaha ye nsobo. Koro itọn̄ inyene [“ima okụk,” NW] edi orụn̄ kpukpru mme idiọkn̄kpọ; ndien ke edinyanade mbịne enye, ndusụk owo ẹma ẹyo ẹkpọn̄ mbuọtidem, ẹnyụn̄ ẹda ediwak mfụhọ ẹnọ idem mmọ unan.”—1 Timothy 6:9, 10.
12. Edieke mme Christian ẹnamde mbubehe ye kiet eken, nso ke mmọ ẹkpenen̄ede ẹti?
12 Edieke Christian ọkọride ima okụk, enye ekeme ndinọ idemesie ekese unan eke spirit. Mme Pharisee ẹkedi mme ama okụk, ndien emi edi kiet ke otu edu mme owo ke “ukperedem ini” ẹmi. (Luke 16:14; 2 Timothy 3:1, 2) Ke edide isio, ikpanaha usụn̄uwem Christian ‘ọkọmọ ke ima inyene.’ (Mme Hebrew 13:5) Edi akpanikọ, mme Christian ẹkeme ndinam mbubehe ye kiet eken m̀mê nditọn̄ọ mme mbubehe ọtọkiet. Nte ededi, ke ini mmọ ẹnamde mme utọ n̄kpọ oro, ẹkpenyene ndinam mme nneme ye ediomi ẹdi isio isio ye mme mbubehe esop. Ndien ti ete: Idem ke otu nditọete eke spirit, ẹwewet mme ediomi mbubehe kpukpru ini. Se inen̄erede idi n̄kpọ un̄wam ke afan̄ emi edi ibuotikọ oro ọdọhọde “Put It in Writing!” (Ẹwewet), emi ẹkemịn̄de ke Awake! eke February 8, 1983, page 13 esịm 15.
13. Didie ke afo akpabuan Mme N̄ke 22:7 ye edinam mbubehe?
13 Mme N̄ke 22:7 asian nnyịn ete: “Owo eke ọbuọtde onyụn̄ edi ofụn owo eke ọnọde.” Isiwakke ndiwụt eti ibuot nnyịn ndisịn idem nnyịn m̀mê nditọete nnyịn ke utọ itie ofụn oro. Ke ini owo ekededi ọdọhọde nnyịn ete ibuọt imọ okụk ida inam mbubehe, okpowụt eti ibuot ndikere mban̄a ukeme esie ndifiak n̄kpe okụk oro. Ndi ẹfiọk enye nte enyeoro anamde akpanikọ ye se ẹkemede ndiberi edem? Nte ededi, nnyịn ikpenyene ndifiọk nte ke ndinọ utọ ebuọt oro ekeme ndiwọrọ nditaba okụk oro koro ediwak mbubehe ẹsikpu. Ndinam ediomi ke n̄wed kpọt inọhọ ubiọn̄ ke ẹyekụt unen. Ndien ke akpanikọ iwụtke ọniọn̄ inọ owo ekededi ndisịn ediwak okụk ke mbubehe n̄kan nte enye ekpekemede nditaba.
14. Ntak emi nnyịn ikpowụtde mbufiọk edieke ikọnọde ekemmọ Christian emi mbubehe esie okpude okụk ke ebuọt?
14 Oyom nnyịn iwụt mbufiọk edieke ikọbuọtde Christian okụk kaban̄a mme uduak mbubehe ndien okụk oro atak, okposụkedi mme edinam unana edinam akpanikọ mîkabuanake. Edieke mbubehe oro ndikpu mîkedịghe ndudue ekemmọ andinịm ke akpanikọ nnyịn emi ọkọbuọtde nnyịn okụk oro, nte nnyịn imekeme ndidọhọ ke ẹma ẹdue nnyịn? Baba, koro nnyịn ikọnọ ebuọt oro ke unyịmesịt, eyedi nnyịn ke ikesibọ udori ke enye, ndien unana edinam akpanikọ ndomokiet ikadaha itie. Sia unana edinam akpanikọ ndomokiet mîkabuanake, nnyịn inyeneke isọn̄ ndomokiet ndinam andibọ ebuọt n̄kpọ nte ekemde ye ibet. Nso ufọn edidu do ndida anam-akpanikọ ekemmọ Christian n̄ka esop emi edidọhọde ke mbubehe atahade koro eti mbubehe okokpude?—1 Corinth 6:1.
15. Mme akpan n̄kpọ ewe ke oyom ẹkere ẹban̄a edieke ẹdọhọde ke mbubehe atahade?
15 Mbon oro ẹsikụtde edikpu ke mbubehe ẹsiyom un̄wam ebe ke ndidọhọ ke mbubehe atahade. Sia mme Christian mîkpefreke iban̄a isọn ẹkamade, idem ke ẹma ẹkebọhọ ndusụk isọn nte ekemde ye ibet, ndusụk owo ke ofụri esịt ẹma ẹkere ke obiomo mmimọ ndidomo ndikpe mme isọn oro ẹkebiatde ẹfep edieke mbon oro mmimọ ikakamade isọn ẹdinyịmede ndibọ. Edi nso edieke andibọ ebuọt akpatabade okụk eyenete esie ndien ekem odu ọkpọmiọk ọkpọmiọk uwem? Mîdịghe nso edieke andibọ ebuọt ọkọbọde okụk ndifiak n̄kpe se ọkọbuọtde edi ofụmi ndikpe isọn oro enye akamade eyenete esie? Do eyịghe oyodu aban̄a se inamde andibọ ebuọt oro odot ndikama ifetutom ke esop.—1 Timothy 3:3, 8; se Enyọn̄-Ukpeme, September 15, 1994, page 30-31.
Nso Edieke Ẹdiade N̄wo?
16. Mme usio-ukot ewe ke ẹkeme ndinam edieke etiede nte ke ẹwo nnyịn ke mbubehe?
16 Mbufiọk an̄wam nnyịn ndifiọk nte ke idịghe kpukpru mbubehe ẹsida udori ẹdi. Edi, nso edieke udia n̄wo abuanade? Udia n̄wo edi “edikokoi n̄kama abian̄a, n̄kari, m̀mê ediyụt akpanikọ kaban̄a uduak edinam owo en̄wen asana ndusụk ọsọn̄urua n̄kpọ oro enye enyenede ayak m̀mê ndikpọn̄ unen oro enye enyenede nte ekemde ye ibet.” Jesus Christ ama owụt mme usio-ukot oro ẹkemede ndinam ke ini owo ekerede ke ekemmọ Christian owo imọ. Nte ekemde ye Matthew 18:15-17, Jesus ọkọdọhọ ete: “Edieke eyenete fo eduede fi, ka kasua ndudue esie nọ enye, sụk fi ye enye ikpọn̄. Edieke enye okopde uyo fo, afo amada eyenete fo enyene. Edi edieke enye mîkopke uyo fo, da owo kiet mme iba dian idem, man ke inua ntiense iba m̀mê ita kpukpru ikọ ẹkpesọn̄ọ ẹda. Edi edieke enye esịnde ndikop uyo mmọ, men tịn̄ nọ ufọk Abasi; edi enye esịnde ndikop uyo ufọk Abasi, yak enye etie fi ke enyịn nte owo mme idụt ye publican.” Uwụtn̄kpọ oro Jesus ọkọnọde ke oro ebede owụt ete ke enye ekenyene mme utọ idiọkn̄kpọ nte mbon oro ẹbuanade mbubehe okụk, esịnede udia n̄wo, ke ekikere.—Matthew 18:23-35.
17, 18. Edieke owo oro ọdọhọde ke idi Christian owode nnyịn, didie ke mbufiọk ekeme ndikpeme nnyịn?
17 Nte ededi, isọn̄ N̄wed Abasi ididụhe ndinam mme usio-ukot oro ẹwụtde ke Matthew 18:15-17 edieke uyarade m̀mê idem ekikere udia n̄wo mîdụhe. Edi, nso edieke owo emi ọdọhọde ke idi Christian enen̄erede owo nnyịn? Mbufiọk ekeme ndikpeme nnyịn nsio ke ndinam n̄kpọ oro ekemede ndinọ esop idiọk enyịn̄. Paul ama eteme ekemmọ mme Christian ete ẹbọ utụk ẹbiom ẹnyụn̄ ẹkam ẹyak ẹbọ mmọ n̄kpọ ke n̄kanubọk utu ke ndida eyenete n̄ka esop.—1 Corinth 6:7.
18 Nti nditọete nnyịn iren ye iban iyọhọke ye ‘kpukpru abian̄a ye idiọkn̄kpọ,’ nte abiaidiọn̄ oro Bar-Jesus. (Utom 13:6-12) Ntre ẹyak nnyịn ida mbufiọk inam n̄kpọ ke ini okụk atakde ke mme edinam mbubehe ẹbuanade ekemmọ mme andinịm ke akpanikọ. Edieke nnyịn ikerede iban̄a ndinam n̄kpọ nte ekemde ye ibet, nnyịn ikpenyene ndikere mban̄a mme utịp oro ẹkemede ndinyene ke idem nnyịn ọkpọkpọ, ke idem owo m̀mê mme owo eken, ke idem esop, ye ke idem mbonan̄wa. Ndibịne edibọ usiene ekeme ndida ekese ini, odudu, ye inyene nnyịn eken. Enye ekeme ndida n̄kesịm ndifori mme ekpeibet ye nta mbonutom eken kpọt. Ke mfụhọ, ndusụk Christian ẹmetaba mme ifetutom ukara Abasi ke ntak edisịn idem n̄kaha ke mme n̄kpọ ẹmi. Nnyịn ndidi se ẹwọn̄ọrede ntịn̄enyịn ke usụn̄ emi ana anam Satan okop inemesịt, edi nnyịn iyom ndinam esịt Jehovah adat. (Mme N̄ke 27:11) Ke n̄kan̄ eken, ndinyịme ntakurua ekeme ndinam ifep ekese iduọesịt ye ubiatini, eke nnyịn ye eke mbiowo. Enye ayanam emem esop aka iso odu oyonyụn̄ ayak nnyịn ika iso inịm mme ufọn n̄kpọ Obio Ubọn̄ akpa.
Mbufiọk ye Edinam Ubiere
19. Nso ke mbufiọk eke spirit ye akam ẹkeme ndinam nnọ nnyịn ke ini nnyịn inamde mme mfịghe mfịghe ubiere?
19 Ndinam mme ubiere ẹban̄ade okụk m̀mê n̄kpọ ẹban̄ade mbubehe ẹkeme ndikama mfịghe etieti. Edi mbufiọk eke spirit ekeme ndin̄wam nnyịn ndidomo mme n̄kpọ nse nnyụn̄ nnam nti ubiere. Akan oro, ediberi edem ye Jehovah ke akam ekeme ndida “emem Abasi” nsọk nnyịn. (Philippi 4:6, 7) Enye edi ifụre ye emem oro otode n̄kpet n̄kpet ọkpọkpọ itie ebuana oro inyenede ye Jehovah. Ke akpanikọ, utọ emem oro ekeme ndin̄wam nnyịn ndisọn̄ọ mmụm edida ukem ukem nnyịn n̄kama ke ini iyomde ndinam n̄kpọsọn̄ ubiere.
20. Nso ke nnyịn ikpebiere ndinam ke adan̄a nte mme n̄kpọ ẹban̄ade mbubehe ye esop ẹbuanade?
20 Ẹyak nnyịn ibiere nditre ndiyak utọk mbubehe ẹtịmerede emem nnyịn m̀mê eke esop. Oyom nnyịn iti ite ke esop Christian odu man an̄wam nnyịn ke n̄kan̄ eke spirit, idịghe man anam n̄kpọ nte itie ubịne mbubehe. Kpukpru ini ẹkpenyene ndinam mme n̄kpọ ẹban̄ade mbubehe ẹdi isio isio ye mme edinam esop. Oyom nnyịn ida mbufiọk ye ukpeme inam n̄kpọ ke ini inamde mme mbubehe. Ẹnyụn̄ ẹyak nnyịn kpukpru ini inyene ekikere oro adade ukem ukem kaban̄a mme utọ n̄kpọ ntre, ibemde iso iyom mme ufọn n̄kpọ Obio Ubọn̄. Edieke mme edinam mbubehe ẹbuanade ekemmọ mme andituak ibuot nnyịn ẹkpude, nnyịn ikpakam iyom se ifọnde ikan ye kpukpru owo oro ẹbuanade.
21. Didie ke nnyịn ikeme ndikama mbufiọk nnyụn̄ nnam n̄kpọ ke n̄kemuyo ye Philippi 1:9-11?
21 Utu ke ndinyene ọkpọsọn̄ editịmede esịt mban̄a mme n̄kpọ ẹban̄ade okụk ye mme n̄kpọ eken ẹmi mîdịghe akpan n̄kpọ, kpukpru nnyịn ikpakam isịn esịt nnyịn ke mbufiọk, ibọn̄ akam iben̄e ndausụn̄ Abasi, inyụn̄ inịm mme ufọn n̄kpọ Obio Ubọn̄ akpa. Ke n̄kemuyo ye akam Paul, ‘ima nnyịn akpakam ọdọdiọn̄ awak ke ifiọk ye kpukpru ikike; man nnyịn ikeme ndidomo mfiọk se ifọnde ikan inyụn̄ itre ndinam mbon en̄wen ẹtuak ukot ẹduọn̄ọ’ m̀mê idem nnyịn. Kemi Christ kpa Edidem odorode ke ebekpo esie eke heaven, ẹyak nnyịn iwụt mbufiọk eke spirit ke ofụri ikpehe uwem. Ndien ‘nnyịn ikpakam iyọhọ ye mbun̄wụm eti ido, emi otode Jesus Christ inọ Abasi,’ kpa Ọbọn̄ Jehovah Andikara, ‘ubọn̄ ye itoro.’—Philippi 1:9-11.
Didie ke Afo Ọkpọbọrọ?
◻ Nso idi mbufiọk?
◻ Ntak emi akpan ufọn odude ndiwụt mbufiọk mban̄a mme edinam mbubehe ke otu mme Christian?
◻ Didie ke mbufiọk ekeme ndin̄wam nnyịn edieke nnyịn ikerede ite ke ekemmọ andinịm ke akpanikọ omowo nnyịn?
◻ Nso udeme ke mbufiọk ekpenyene ke edinam ubiere?
[Ndise ke page 18]
Mbufiọk ayan̄wam nnyịn ndinam item Jesus ndibem iso nyom Obio Ubọn̄
[Mme ndise ke page 20]
Ẹwewet mme ediomi mbubehe kpukpru ini