Ererimbot Oro Ọfọnde Akan​—Ikpîkpu Ndap?

EDIEKE afo ekpekedide andinịm Mazda ke akpanikọ nte Zoroaster prọfet owo Iran oro ọkwọrọde, afo ekpekebet ini oro ererimbot edifiakde ekenyene akpa uyai esie. Edieke afo okpokodụn̄de ke Greece eset, eyedi afo ekpekenyene idotenyịn edisịm emem emem Isuo Mfọniso m̀mê edikụt Eyo Mfọnọn̄kpọ emi ewetuto oro Hesiod eketịn̄de aban̄a ke ọyọhọ isua ikie itiaita M.E.N. Ekeme ndidi owo Guaraní India ke Edem Usụk America ke osụk oyoyom Isọn̄ Oro Idiọkn̄kpọ Mîdụhe. Ke odude uwem ke eyo nnyịn, eyedi afo omodori enyịn ke ererimbot eyekabade ọfọn akan ke ntak ndusụk ekikere ukaraidem mîdịghe nte utịp ifiọk eyomfịn oro ẹnyenede ẹban̄a n̄kann̄kụk.

Eyo Mfọnọn̄kpọ, Isuo Mfọniso, Isọn̄ Oro Idiọkn̄kpọ Mîdụhe​—⁠mmọemi ẹsịne ke otu ediwak enyịn̄ oro ẹdade nditịn̄ mban̄a ukem n̄kpọ oro mme owo ẹyomde, kpa idotenyịn ererimbot oro ọfọnde akan.

Ke akpanikọ, ererimbot emi, kpa ererimbot nnyịn, idịghe eti ebiet. Afai afai ubiatibet, anana-mbiet afai afai ekọn̄ uwot nditọeka, uwot ofụri orụk, unana udọn̄ kaban̄a ndutụhọ mbon en̄wen, unana ye biọn̄, unana utom ye unana edidianakiet, mme mfịna n̄kann̄kụk, mme udọn̄ọ oro owo mîkemeke ndikọk oro ọnọmọde ediwak owo ke mme itie miliọn oro akade-kaiso ndikọri​—⁠etie nte ibat mme afanikọn̄ eyomfịn inyeneke utịt. Ke ekerede aban̄a mme ekọn̄ ndondo emi oro en̄wanade, ọkọmbụk owo Italy kiet ọkọdọhọ ete: “Mbụme oro esidemerede edi m̀mê ibak ibak edinam idịghe ekikere oro ọsọn̄de akan ke eyo nnyịn.” Ke ekerede aban̄a idaha oro odude, nte afo emekere ke edi ata idem n̄kpọ ndinyene ọkpọsọn̄ udọn̄ mban̄a n̄kpọ oro edide isio, kpa n̄kpọ oro ọfọnde akan? Mîdịghe nte utọ udọn̄ oro edi ikpîkpu ediyom ediye obio oro ẹkerede-kere, kpa ndap oro mîdisụho tutu amama? Nte nnyịn idu uwem ke ererimbot oro ọfọnde akan oro akanam odude?

Mmọemi idịghe mbufa n̄kpọ udọn̄. Ke ediwak isua ikie mme owo ẹma ẹsikere ẹban̄a ererimbot oro edidianakiet, unenikpe, uforo, ye ima ẹdikarade. Nte ini akade, ediwak mbon akwaifiọk ẹma ẹtịn̄ ekikere mmọ ntatara ntatara ẹban̄a Ukara oro ọfọnde, nti ererimbot. Edi, edi n̄kpọ mbọm, akananam mmọ ikemeke ndinam nte ẹkemede ndinam mmọ ẹkụt unen an̄wan̄a.

Nte ibat n̄kani ekikere, ndiye obio oro ẹkerede-kere, ye n̄kpọsọn̄ udọn̄ owo kaban̄a eti n̄kaowo oro ebịghide ke ediwak isua ikie ẹkeme ndikpep nnyịn n̄kpọ ndomokiet?

[Ndise ke page 3]

Nte emi edi ererimbot oro ọfọnde akan oro akanam odude?