Nso Idi “Se [Ẹ]yomde”?

IKPAN̄WED W eke Mme Gospel emi emenyene udeme ke edikabade oro ẹkabarede ikọ oro Jesus eketịn̄de ọnọ Martha, kpa eyeneka ata ufan esie, Lazarus. Ke ini Jesus akakade ekese ubon emi, Martha ama ekere nte editem inem udia nnọ Jesus edide ata akpan n̄kpọ, edi Jesus ke mfọnido ama ọnọ ekikere ete enye etiene uwụtn̄kpọ eyeneka esie an̄wan, kpa Mary, emi eketiede Jesus ke ukot akpan̄ utọn̄ ọnọ enye. Enye ọkọdọhọ ete: “N̄kpọ kiet edi se nyomde; koro Mary ememek eti udeme, eke mîdibọhọ enye ifep.”​—Luke 10:41.

Mme ikọ ẹmi ẹkabarede uwetn̄kpọ Greek eke 1881 oro Westcott ye Hort ẹketịmde, kpa se idide isọn̄ inọ New World Translation. Ikọ idakisọn̄ ke Nsiondi Bible emi eke 1984 oro esịnede Reference owụt ete ke se ẹkotde emi okoto ikpan̄wed eke Sinai (א) ye eke Vatican (B), emi mbiba ẹnyenede ukem uduot uwetn̄kpọ. Edi ikpan̄wed eke Alexandria (A) okot ete: “N̄kpọ kiet edi, nte ededi, se ẹyomde. Ke n̄kan̄ esie . . .” Nte ikọ idakisọn̄ osiode owụt, Ikpan̄wed W ọkọrọ ye ikpan̄wed n̄kûkịp eke Chester Beatty (P⁴⁵) ye ikpan̄wed n̄kûkịp eke Bodmer (P⁷⁵), emi mbiba ẹdide eke ọyọhọ isua ikie ita C.E., onyịme ye nte ẹsịnde enye ke eke ukperedem emi. Edi ẹkedidiọn̄ọ kpukpru ikpan̄wed ẹmi anyanini ke Westcott ye Hort ẹma ẹkemịn̄ uwetn̄kpọ mmọ ke isua 1881, ntre mmọ ikenyeneke ifet ndikere mban̄a nte ẹkpesịnde uwetn̄kpọ emi ke usụn̄ efen. Nte ededi, sededi edikabade uwetn̄kpọ oro nnyịn imekde ndidiọn̄ọ mfịn, Jesus ama etịn̄ in̄wan̄în̄wan̄ ọnọ nnyịn ete yak inịm mme n̄kpọ eke spirit akpa ke uwem nnyịn​—kpa item oro ọkpọfọnde nnyịn itiene.