Ndidianakiet ye Otu Ukara Mfịn
“Eteufọk esie eyenam enye edi andikara kpukpru se enyenede.”—LUKE 12:44.
1. Obio Ubọn̄ ewe ke Christ ọkọtọn̄ọ ndikara ke 33 C.E., ndien ke nso usụn̄?
KE PENTECOST 33 C.E., Jesus Christ, kpa Ibuot esop, ama ọtọnọ ndikara ifịk ifịk ke obio ubọn̄ ifụn esie oro ẹyetde aran ke spirit. Didie ke ekedi ntre? Ebe ke edisana spirit, mme angel, ye otu ukara oro enyịn okụtde. Nte apostle Paul okowụtde, Abasi ‘ama osio mmọ ke odudu ekịm, esịn ke Obio Ubọn̄ Eyen ima Esie.’—Colossae 1:13-18; Utom 2:33, 42; 15:2; Galatia 2:1, 2; Ediyarade 22:16.
2. Akamba Obio Ubọn̄ ewe ke Christ ọkọtọn̄ọ ndikara ke 1914?
2 Ke utịt “ini mme Gentile,” Jehovah ama anam odudu ubọn̄ Christ okpon, anamde enye atara ebe esop Christian. (Luke 21:24) Ih, ke isua 1914, Abasi ama ọnọ Eyen esie odudu edidem ndikara “mme idụt,” kpa “obio ubọn̄ ererimbot,” ofụri ubonowo.—Psalm 2:6-8; Ediyarade 11:15.
Ẹkemek ‘Ndikara Ofụri Inyene Esie’
3, 4. (a) Ke n̄ke Jesus abanade okụk, anie ke ọbọn̄ oro akada aban̄a? (b) Nso n̄kpọntịbe ẹban̄ade Obio Ubọn̄ ikada itie ke 1918 ye 1919?
3 Se idotde ẹtịm ẹfiọk mi edi n̄ke Jesus oro abanade eren kiet edide ọbọn̄. (Luke 19:11-27) Mbemiso anamde isan̄ aka idụt efen ndikọbọ ubọn̄, eren emi ama ọnọ ifụn esie okụk (mina) ndida nnam mbubehe. Ke ọyọn̄de edi, eren emi, emi adade aban̄a Christ, ama okot ‘ifụn esie ẹmi enye akayakde okụk ọnọ, man ọfiọk udori eke mmọ ẹkekụtde ke mbubịne.’ (Luke 19:15) Didie ke emi okotịbe ke Jesus ama ọkọbọ ubọn̄ ada?
4 Ke 1918, Edidem Jesus Christ emi ẹkedoride ke ebekpo ama okụt ekpri otu Christian oro ẹma ẹkekpọkpọn̄ mme ufọkederi Christendom ẹkenyụn̄ ẹsịnde idemmọ ke ndise mban̄a inyene isọn̄ Eteufọk mmọ. Ke ama akanam mmọ ẹsana nte n̄kpọ eke ẹtemde ke ikan̄ ẹdụhọde, Jesus ama ọnọ ifụn esie odudu oro okponde akan ke 1919. (Malachi 3:1-4; Luke 19:16-19) Enye ama emek’mmọ ndidi mme “andikara kpukpru se enyenede.”—Luke 12:42-44.
‘Udia ke Edikem Ini’
5, 6. (a) Nso ntatara utom ke akama-ukpọhọde Christ ọkọbọ? (b) Mme prọfesi ewe ikenyene ndisu ke 1914 ebede, ndien didie otu akama-ukpọhọde akabuana ifịk ifịk ke mme prọfesi ẹmi ndisu?
5 Edidem Jesus Christ oro akarade ama ayak ntatara utom esịn ke ubọk akama-ukpọhọde esie, m̀mê esenyịn ufọk, ke isọn̄. Mme Christian oro ẹyetde aran ẹkenyene ndidi “mme isụn̄utom” Abasi nnọ Edidem oro ẹyaride anyanya mi, emi ẹnọde odudu ndikara kpukpru owo ke isọn̄. (2 Corinth 5:20; Daniel 7:14) Mbiomo mmọ nte otu ikedịghe aba sụk edinọ otu mbonufọk Christ oro ẹyetde aran ‘udeme udia mmọ ke edikem ini.’ (Luke 12:42) Mmọ kemi akana ẹnyene ifịk ifịk udeme ke ndinam n̄kpọ mban̄a mme prọfesi ẹmi ẹkenyenede ndisu ke ẹma ẹkewụk Obio Ubọn̄ ke 1914.
6 Nso ke emi ekenen̄ede ọwọrọ ke ata edinanam? Enye ọkọwọrọ editat utom ukwọrọ ‘eti mbụk Obio Ubọn̄ Abasi emi ke ofụri isọn̄.’ (Matthew 24:14) Akande oro, enye ọkọwọrọ editan̄a mme okopodudu etop ubiereikpe ndori idiọk editịm n̄kpọ Satan ye mme andinọ enye ibetedem. Emi ama enyene utịp ‘ediyen̄e kpukpru mme idụt.’ Ntre, “se mme idụt ẹyomde,” kpa “mme erọn̄ en̄wen” eke Christ, ẹma ẹtọn̄ọ ndidụk ndi. (Haggai 2:7; John 10:16) Ọtọn̄ọde ke 1935 kaiso, “akwa otuowo” ẹma ẹtọn̄ọ ndibụn̄ọ ndụk esop Jehovah eke ofụri ererimbot. (Ediyarade 7:9, 10) Emi ama oyom n̄kaiso n̄kọri ke esop. Nditịn̄ ke ndamban̄a usụn̄, ẹkenyene ndida ukwak ndinịm ke itie itiat, okpoho ke itie eto, silver ke itie ukwak, ye gold ke itie okpoho. (Isaiah 60:17) Kpukpru ẹmi ẹma ẹda itie toto ke 1919, ke ifịk ifịk ye n̄kpet n̄kpet ndausụn̄ Jesus Christ, emi akayakde kpukpru ufọn n̄kpọ m̀mê inyene Obio Ubọn̄ esie eke isọn̄ ọnọ ifụn esie ẹmi ẹnamde akpanikọ ye Otu Ukara eke ifụn emi.
7. Utom akama-ukpọhọde oro ọkọride-kọri ekesịne nso?
7 Nnyịn imekeme ndifiọk mmemmem mmemmem nte ke mbiomo emi ọkọride-kọri, emi ẹkeyakde ẹnọ ofụn Eteufọk mi, kpa akama-ukpọhọde m̀mê esenyịn ufọk, abuana ọkpọsọn̄ uwetn̄kpọ ye mme utom editịm se anade ẹwet. Ẹkenyene ndimịn̄ udia eke spirit oro ẹnọde kpukpru ini ke edikem ini mi ke Enyọn̄-Ukpeme. Ke 1919 ẹma ẹtọn̄ọ ndimịn̄ The Golden Age (kpa nsan̄a magazine emi, emi ke ukperedem akakabarede edi Consolation, ndien ekem ẹkotde Awake!) ndidemede udọn̄ mme owo, ke adianade ye utom edisọn̄ọ ‘mbonufọk’ idem. (Matthew 24:45) Ẹma ẹmịn̄ udịm udịm ikpọ n̄wed, n̄kpri n̄wed, ye mme tract nko ke mme isua ẹmi ẹkebede.
N̄kaiso Edinam Ọfọn Akan
8. Ke akpa ẹkeda mbon Otu Ukara nte ẹdi mmanie, ndien nso ikọ ke Enyọn̄-Ukpeme eketịn̄ ke 1944?
8 Ndise mfiak edem ke “utịt ini” emi, nnyịn idụhe ke n̄kpaidem nte ke akpa, ẹkeda mbon Otu Ukara nte ẹnen̄ede ẹdi ukem ye mbonutom uwetn̄wed eke Watch Tower Society. (Daniel 12:4) Ibuotikọ oro, “Ndutịm Ukara Abasi Mfịn” emi ẹkemịn̄de ke Enyọn̄-Ukpeme (Ikọmbakara) eke November 1, 1944, ọkọdọhọ ete: “Nte owụtde ifiọk, ẹkeda mbon oro ẹkeyakde utom edimịn̄ mme akpanikọ Bible ẹsịn ke ubọk nte otu ukara oro Ọbọn̄ ekemekde ndida kpukpru mbon oro ẹyomde ndituak ibuot nnọ Abasi ke spirit ye ke akpanikọ usụn̄, ndinyụn̄ nnam n̄kpọ esie ke edidianakiet ke ndisuan akpanikọ emi ẹyararede mi nnọ’ mbon en̄wen ẹmi ẹkopde biọn̄ ye nsatitọn̄.”
9. Mmanie ke ẹkeda ke ukperedem nte ẹnen̄ede ẹdi Otu Ukara, ndien ntak-a?
9 Ke ndimịn̄ mme magazine ye mme n̄wed un̄wam ukpep Bible eken, mme n̄kpọ oro ibet oyomde ẹma ẹbuana. Ntem, ẹma ẹtọn̄ọ Watch Tower Bible and Tract Society ẹnyụn̄ ẹsịn enye enyịn̄ ke n̄wedibet ukara Pennsylvania, U.S.A. Ke ediwak isua, ẹkeda Otu Ukara oro ẹkụtde ke enyịn nte edide ukem ye otu mme esenyịn utom ẹdide owo itiaba ke n̄ka emi, oro ẹketon̄ọde man ẹsimịn̄ mme n̄wed un̄wam ukpep Bible oro ikọt Ọbọn̄ ke ofụri isọn̄ ẹyomde ẹnyụn̄ ẹkamade.
10, 11. Nso ndutịm edinam ọfọn akan ikada itie ke 1944, ndien nso ikọ ke ẹketịn̄ ẹban̄a emi ke Enyọn̄-Ukpeme?
10 Mme eseenyịn utom N̄ka ẹdide owo itiaba mi ẹkedi mme anam-akpanikọ Christian. Edi utom mmọ ke n̄ka ibet emi ọkpọnọ ẹkikere nte ke mmọ ẹnyene itie ke Otu Ukara sia mme andibuana ke Watch Tower Society ẹkemekde mmọ. Akande oro, nte ekemde ye ibet, utọ edibuana oro ye ifet edimek mme owo ke ntọn̄ọ ntọn̄ọ ẹkenyene sụk ndusụk mbon oro ẹken̄wamde N̄ka ke okụk. Ama oyom ẹkpụhọ ndutịm emi. Ẹma ẹnam emi ke mbono ofụri isua eke n̄ka Pennsylvania eke Watch Tower Society oro ẹkenịmde ke October 2, 1944. Ẹma ẹnen̄ede mbet n̄ka emi man otodo owo okûmek mme andibuana aba ke ntak okụk. Ẹyemek mme andibuana ẹsio ke otu mme anam-akpanikọ ikọt Jehovah, ndien ediwak owo ẹmi ẹnamde utom uyọhọ-ini ke ibuot itieutom ke Brooklyn, New York, ye ke mme n̄kọk itieutom N̄ka ke ofụri ererimbot, ẹma ẹdisịne ke otu mmọemi.
11 Ke etịn̄de aban̄a n̄kọri emi, Enyọn̄-Ukpeme (Ikọmbakara) eke November 1, 1944, ọkọdọhọ ete: “Okụk, nte ẹnọde ke etịbe, ikpedịghe se ẹdade ẹbiere, ke akpanikọ ikpenyeneke n̄kpọ ndomokiet ndinam ye edimek owo nsịn ke otu ukara eke Mme Ntiense Jehovah ke isọn̄ . . . Edisana spirit, kpa anamutom odudu emi otode Jehovah Abasi ebe ke Christ Jesus, edi se ikpenyenede ndibiere nnyụn̄ nda usụn̄ ke n̄kpọ emi.”
Okpụhọde ye Otu mme Esenyịn
12. Nso iwụt ite ke Jehovah ama ọdiọn̄ ndutịm edinam ọfọn akan oro ke ndausụn̄ Otu Ukara?
12 N̄kọri ke utom ukwọrọikọ ke ediwak isua oro ẹketienede ọsọn̄ọ nte ke Jehovah ama ọdiọn̄ ndutịm edinam ọfọn akan emi isụk itịn̄de mi ke ifiọk eke Otu Ukara. (Mme N̄ke 10:22) Kamse, ibat mme ọkwọrọ Obio Ubọn̄ ke ofụri isọn̄ ama adaha wap ọkpọn̄ se ikosụhọrede ikan owo 130,000 ke 1944, okosịm 1,483,430 ke 1970! Edi mme n̄kaiso n̄kọri ẹkenyene ndidi ke iso.
13. (a) Tutu edisịm 1971, nso ikedi idaha Otu Ukara? (b) Nso ikotịbe ke mbono ofụri isua oro N̄ka okonịmde ke 1971?
13 Tutu edisịm 1971, ẹkesụk ẹdada Otu Ukara nte edi ukem ye owo itiaba oro ke otu mme esenyịn utom eke Watch Tower Bible and Tract Society of Pennsylvania. Etieibuot N̄ka ekenyene akpan mbiomo ke ndinam mme ubiere ke nte ẹnamde n̄kpọ ke mme n̄kọk itieutom N̄ka ke ofụri ererimbot. Edi ẹma ẹnọ onịm-mbụk utịn̄ikọ ke mbono ofụri isua oro ẹkenịmde ke October 1, 1971. Etieibuot N̄ka ama etịn̄ ikọ ke ibuotikọ oro, “Ndida Edisana Ebiet N̄kosịm Eti Idaha,” ndien udiana etieibuot N̄ka ke ibuotikọ oro, “Otu Ukara Nte Okpụhọde ye N̄ka Ibet,” Nso ukpụhọde idu ke ufọt Otu Ukara ye n̄ka ibet?
14. Mme ukpụhọde ewe idu ke ufọt n̄ka ibet ye Otu Ukara?
14 Nte ima iketetịn̄, Watch Tower Bible and Tract Society of Pennsylvania enyene otu mme esenyịn utom oro ibat mmọ mîwakke ikan owo itiaba. Mbon n̄ka emi, emi ofụri ibat mmọ mîwakke ikan owo 500, ẹmi ekese mmọ mîdịghe mme Christian oro ẹyetde aran, ẹsimek irenowo ẹmi ẹdide mme Christian oro ẹma ẹkeyak idem ẹnọ mi ẹsịn ke itieutom-isua-ita. Akande oro, sia edidu oro n̄ka emi ke ofụri ofụri odude edidi eke ibet, ye ibuot itieutom oro ẹwụkde ke akpan ebiet kiet, Caesar, oro edi Ukara, ekeme ndibiat enye mfep. (Mark 12:17) Nte ededi, Otu Ukara idịghe n̄kpọutom oro ẹdade ibet ẹbọp. Owo imekke-mek mme andibuana ke enye. Ẹmek mmọ oto edisana spirit ke ndausụn̄ Jehovah Abasi ye Jesus Christ. (Men Utom 20:28 domo.) Akande oro, mbon oro ẹnamde Otu Ukara ẹdi irenowo oro spirit emekde ẹmi ibet ndomokiet mîbọpke mmọ ndidu m̀mê ndinịm ibuot itieutom ke akpan ebiet kiet.
15. Nso ikọ aban̄ade ndutịm esop ke ẹketịn̄ ke Enyọn̄-Ukpeme eke July 1, 1972, ndien nso ke ẹkeme nditịn̄ mban̄a Otu Ukara eyomfịn?
15 Kaban̄a utọ ndutịm edinam ọfọn akan oro, ke ifiọk, Enyọn̄-Ukpeme eke July 1, 1972 ọkọdọhọ ete: “Ye esịtekọm, mme Christian ntiense Jehovah ẹdiọn̄ọ ẹnyụn̄ ẹnyịme nte ke idịghe esop ido ukpono owo kiet edi emi, edi nte ke enye enyene otu ukara eke mme Christian oro ẹyetde aran ke spirit.” Ke usụn̄ enyenede n̄kọri, ẹtịm Otu Ukara eke otu ifụn anam-akpanikọ oro ẹyetde aran ye eke ediwak million nsan̄a mmọ, ẹmi ẹdide mme erọn̄ en̄wen ndise mban̄a itieutom esie.
16. Didie ke inyene Christ eke isọn̄ ọkọkọri ọtọn̄ọde ke 1971, ndien nso idi ndusụk inyene ẹmi enye akayakde esịn ke ubọk ofụn emi anamde akpanikọ onyụn̄ enyenede ọniọn̄, emi Otu Ukara adade ke ibuot esie?
16 Mme inyene isọn̄ eke Edidem Jesus Christ ẹmekaiso ndikọri. Ọtọn̄ọde ke 1971, ibat Mme Ntiense ọmọdọk ọkpọn̄ 1,600,000 okosịm n̄wakn̄kan ibatowo oro ebede 3,700,000 ke 1989. Nso uyarade edidiọn̄ Jehovah ke emi edi ntem! (Isaiah 60:22) N̄kọri emi ama oyom ẹtat mme n̄kpọutom ke ibuot itieutom ye ke mme n̄kọk itieutom esie, ndinyụn̄ ntiene ido umịn̄ n̄wed ye usuan n̄wed eke eyomfịn. Emi omosụn̄ọ ke edibọp ediwak Ufọkmbono Obio Ubọn̄ ye mme Itie Mbono ke ofụri isọn̄. Ke ofụri ini ẹmi, Otu Ukara amakaiso obiom mbiomo edise mban̄a utom ukwọrọikọ, edision̄o mme n̄kpọ un̄wam ukpep Bible ndi, ye edimek mme esenyịn ke mme n̄kọk itieutom, ke mme district, circuit, ye ke mme esop. Emi ẹdi inyene Obio Ubọn̄ oro Christ akayakde esịn asan̄autom emi anamde akpanikọ, onyụn̄ enyenede ọniọn̄ ke ubọk, emi Otu Ukara adade ke ibuot esie.
17. (a) Nso n̄kaiso ndutịm use enyịn oro ọfọnde akan ke ẹkenam ke 1971, 1974, ye 1976?
17 Ẹma ẹtat otu ukara eke akpa isua ikie ndisịne se iwakde ikan mme apostle Jesus. Ke ini ẹkebierede mfịna una mbobi, otu oro nte an̄wan̄ade ama esịne ‘mme apostle ye mbiowo ke Jerusalem.’ (Utom 15:1, 2) Ukem oro n̄ko, ẹma ẹtat Otu Ukara ke 1971 ye ke 1974. Man ẹnam utom edise enyịn mmọ emem, Otu Ukara ama anam ndutịm kọmiti ition nditọn̄ọ utom ke January 1, 1976. Kọmiti kiet kiet enyene ibatowo ọtọn̄ọde ke ita osịm itiokiet, ẹmi kpukpru mmọ ẹnyenede uyo ke se ẹnemede ẹban̄a. Etieibuot ke kọmiti kiet kiet akama itie oro ke isua kiet, ndien owo kiet kiet ke Otu Ukara abuana ke kọmiti kiet mme awakde akan oro. Ke otu kọmiti ition ẹmi, kiet kiet ọnọ akpan ntịn̄enyịn ke san̄asan̄a ikpehe inyene Christ ke isọn̄. Ọyọhọ kọmiti itiokiet—kpa Kọmiti Etieibuot Okpokoro, emi itieutom akanarede ke isua ke isua—ese aban̄a mme mfịna ẹdidi usọp usọp.
Ifịk Ifịk Edidianakiet ye Otu Ukara
18. Didie ke Otu Ukara anam utom, ndien nso idi usụn̄ kiet oro ikpowụtde edidianakiet nnyịn ye enye?
18 Mme kọmiti Otu Ukara ẹmi ẹsinịm mbono eke urua ke urua ndidụn̄ọde mme akpan n̄kpọ, ndinam mme ubiere ke ẹma ẹkeneme ẹban̄a ye akam, ẹnyụn̄ ẹnam ndutịm ẹban̄a utom ukara Abasi eke ini iso. Nte iketịn̄de ke mbemiso, Utom Mme Apostle ibuot 15 owụt nte ke ẹma ẹsimen n̄kpọsọn̄ mbụme oro okoyomde ẹbiere, ẹbịne otu ukara eke akpa isua ikie ndibọrọ. Kpasụk ntre mfịn, ẹsimen mme akpan mbụme ẹbịne ofụri Otu Ukara, ẹmi ẹsisopde idem ke urua ke urua, m̀mê adan̄a ediwak ini nte ẹyomde. Mbon Otu Ukara, ẹmi idahaemi ẹdide owo” 12 ke ibat, ẹsiyom ndausụn̄ Jehovah ebe ke N̄wed Abasi ye ke akam. Usụn̄ kiet oro nnyịn iwụtde edidianakiet nnyịn ye Otu Ukara edi nditi mmọemi ẹmekde san̄asan̄a mi ke akam oro ibọn̄de kpukpru usen.—Rome 12:12.
19. Didie ke mme item oro ẹtode Otu Ukara ẹsisịm mme esop?
19 Mme item ye ubiere ẹtode Otu Ukara ẹsisan̄a didie ẹsịm mme esop? Ke mbon otu ukara eke akpa isua ikie ẹma ẹkenam ubiere mmọ ke un̄wam spirit Abasi, mmọ ẹma ẹsinọ leta ẹsọk mme esop. (Utom 15:22-29) Nte ededi, akpan usụn̄ mfịn edi ke mme n̄wed Christian.
20. (a) Nso n̄kaiso ndutịm edinam ọfọn akan ke ẹkenam ke 1976? (b) Didie ke Mme Kọmiti N̄kọk Itieutom ẹdiana kiet ye Otu Ukara?
20 Toto ke February 1, 1976, n̄kọk itieutom Watch Tower Society kiet kiet ama enyene Kọmiti N̄kọk Itieutom emi edide mme ọsọn̄idem irenowo oro Otu Ukara emekde. Nte mme andida ke ibuot Otu Ukara ke idụt m̀mê mme idụt oro ẹdude ke idak n̄kọk itieutom mmọ ndise enyịn, ana nditọete ẹmi ẹdi mme anam-akpanikọ iren mbuọtidem. Emi anam nnyịn iti irenowo oro ẹkebakde Abasi, ẹkenyụn̄ ẹdotde, ẹmi ẹken̄wamde Moses ndikpe ikpe mme owo ke Israel eset. (Exodus 18:17-26) Mbon Kọmiti N̄kọk Itieutom ẹsitiene item oro ẹbọde ke mme n̄wed N̄ka ye ke mme magazine ye ke Utom Obio Ubọn̄ Nnyịn, ọkọrọ ye mme leta oro ẹbehede kpukpru owo ye mme san̄asan̄a leta oro ẹnyenede n̄kpọ ndinam ye mfịna n̄kann̄kụk. Mme Kọmiti N̄kọk Itieutom ẹsinam Otu Ukara ọfiọk aban̄a n̄kọri utom ke idụt kiet kiet ye mme mfịna oro ẹkemede ndidaha nda. Mme utọ ntọt ntre ẹtode ofụri ererimbot mi ẹsin̄wam Otu Ukara ebiere se ibuotikọ ẹkpenyenede ndineme ke mme n̄wed N̄ka.
21. Didie ke ẹsimek mme esenyịn oro ẹsan̄ade-san̄a, ndien utom mmọ ẹsịne nso?
21 Ke ndausụn̄ edisana spirit, Mme Kọmiti N̄kọk Itieutom ẹsitoro irenowo eke spirit oro ẹkọride ẹsịm ọyọhọ idaha ndinam utom nte mme esenyịn circuit ye district. Ke Otu Ukara ama ekemek mmọ nnennen, mmọ ẹsinam utom nte esenyịn oro ẹsan̄ade-san̄a. Nditọete iren ẹmi ẹsika ẹkese mme circuit ye mme esop man ẹkpesọn̄ọ mmọ idem ke n̄kan̄ eke spirit ẹnyụn̄ ẹn̄wam mmọ ndida mme ntọt oro ẹbọde ẹto Otu Ukara nsịn ke edinam. (Men Utom 16:4; Rome 11:12 domo.) Mme esenyịn oro ẹsan̄ade-san̄a ẹsinọ ntọt ẹsọk ọfis n̄kọk itieutom. Otode un̄wam edisana spirit ye N̄wed Abasi eke odudu spirit, mmọ ẹsibuana ye mbiowo n̄kann̄kụk ke ndidọhọ Otu Ukara m̀mê mme andida ke ibuot esie, ẹmek nditọete iren oro ẹdotde nte mme asan̄autom unamutom ye mbiowo.—Philippi 1:1; Titus 1:5; men 1 Timothy 3:1-13; 4:14 domo.
22. (a) Didie ke mbiowo esop ẹdiana kiet ye Otu Ukara? (b) Nso isọn̄ọ nte ke Jehovah ke ọdiọn̄ ndutịm ukara Abasi emi?
22 Ke n̄kan̄ eken, mbon oro ẹnamde otu mbiowo ‘ẹsitịm ẹse idemmọ ye ofụri otuerọn̄, emi edisana spirit ekemekde mmọ nte mme andise enyịn.’ (Utom 20:28) Mme esenyịn ẹmi ke edinam akpanikọ ẹsiyom ndida mme item ẹbọde ẹto Jehovah Abasi ye Jesus Christ ebe ke ofụn emi anamde akpanikọ, onyụn̄ enyenede ọniọn̄ ye Otu Ukara esie nsịn ke edinam. Jehovah ke ọdiọn̄ ndutịm ukara Abasi ẹmi, koro ‘mme esop ke ẹkaiso ndisọn̄ọ nda ke mbuọtidem nnyụn̄ n̄kọri ke ibat ke usen ke usen.’—Utom 16:5.
23. Kaban̄a Otu Ukara, nso ke nnyịn ikpebiere ndinam?
23 Eye didie ntem nte ke ebede ke Otu Ukara, Jehovah Abasi ye Eteufọk, Jesus Christ, ke ẹyarade ibetedem oro mmọ ẹnọde ikọt Abasi! (Psalm 94:14) Nte ubak esop Jehovah, nnyịn owo kiet kiet imọbọ ufọn ito utọ ibetedem oro. (Psalm 145:14) Emi ekpenyene ndisọn̄ọ ubiere nnyịn ndidiana kiet ye mme ndutịm Abasi. Ke akpanikọ, nnyịn kpukpru ini ikpakam idiana kiet ye Otu Ukara eke Mme Ntiense Jehovah nte nnyịn isan̄ade ibịne ini oro ‘ifiọk Jehovah ediyọhọde ke ererimbot, kpa nte mmọn̄ ofụkde inyan̄.’—Isaiah 11:9.
Mme Akpan N̄kpọ Nditi
◻ Mme utom ewe oro ẹkọride-kọri ke otu akama-ukpọhọde ọkọbọ ke 1919?
◻ Ke ediwak isua, ẹkeda Otu Ukara oro ẹkụtde ke enyịn nte ẹdi mmanie?
◻ Mme enyene-n̄kọri ndutịm edinam ọfọn ewe ke ẹkenam ke ndimek mbon Otu Ukara?
◻ Nso idi ndusụk inyene Christ eke isọn̄ oro enye akayakde esịn ke ubọk otu ifụn ye Otu Ukara eke ifụn ẹmi?
◻ Didie ke nnyịn ikpadiana kiet ye Otu Ukara?
[Mme ndise ke page 16, 17]
Ke ibuot itieutom esie ke Brooklyn, New York, Otu Ukara ese enyin ke utom umịn̄-n̄wed ye ukwọrọikọ eke Mme Ntiense Jehovah ke n̄kọk itieutom 93 eke Watch Tower Society
Germany
Japan
South Africa
Brazil