Didie ke Otu Emi Ẹsede Ẹban̄a Utom Mme Ntiense Jehovah Ẹnam N̄kpọ Mfịn?

Ke eyo mme apostle, ekpri otu, “mme apostle ye mbiowo ke Jerusalem,” ẹkenam utom nte otu emi ẹsede ẹban̄a utom ikọt Abasi man ẹnam mme akpan ubiere ke ibuot ofụri esop mme Christian oro ẹyetde aran. (Utom 15:2) Mmọ ẹma ẹsinam ubiere ye esịt kiet ke ntak emi mmọ ẹkesinemede se N̄wed Abasi ọdọhọde, ẹnyụn̄ ẹyakde spirit Abasi ada mmọ usụn̄. (Utom 15:25) Ukem uwụtn̄kpọ oro ke ẹtiene mfịn.

Abasi ada mmọ anam uduak esie. Nditọete irenowo emi ẹyetde aran mi, emi ẹdide Otu Emi Ẹsede Ẹban̄a Utom Mme Ntiense Jehovah, ẹnen̄ede ẹma Ikọ Abasi ẹnyụn̄ ẹnyene ekese ifiọk ndise mban̄a n̄kpọ ekededi oro aban̄ade ido ukpono nnyịn ye mme n̄kpọ eken. Mmọ ẹsisop idem kpukpru urua man ẹse ẹban̄a mme n̄kpọ oro ẹban̄ade nditọete ke ofụri ererimbot. Nte ekedide ke eyo mme apostle, mmọ ẹsida mme leta, mme esenyịn circuit ye mbon eken ẹnọ mme item oro ẹtode Bible. Emi esinam ikọt Abasi ẹnyene ekikere kiet ẹnyụn̄ ẹnam n̄kpọ ukem ukem. (Utom 16:4, 5) Otu Emi Ẹsede Ẹban̄a Utom Mme Ntiense Jehovah ẹsise ẹban̄a nte ẹtịmde udia eke spirit, ẹsịn udọn̄ ẹnọ kpukpru owo ndida utom ukwọrọikọ Obio Ubọn̄ ke akpan n̄kpọ, ẹnyụn̄ ẹda usụn̄ ke ndimek nditọete nnọ mme ifetutom.

Mmọ ẹtiene ndausụn̄ spirit Abasi. Otu Emi Ẹsede Ẹban̄a Utom Mme Ntiense Jehovah ẹberi edem ke Jehovah, kpa Akakan Andikara Ekondo, ye Jesus emi edide Ibuot esop, ndinọ ndausụn̄. (1 Corinth 11:3; Ephesus 5:23) Mbon Otu Emi Ẹsede Ẹban̄a Utom Mme Ntiense Jehovah idaha idem mmọ nte mme etubom ikọt Abasi. Mmọ ẹdiana kiet ye kpukpru mme Christian oro ẹyetde aran ‘ẹtiene Eyenerọn̄ emi edide Jesus ẹka ọtọ eke enye akaka.’ (Ediyarade 14:4) Mbon Otu Emi Ẹsede Ẹban̄a Utom Mme Ntiense Jehovah ẹsinen̄ede ẹnem esịt ke ini isịnde mmọ ke akam.

• Mmanie ẹkese ẹban̄a utom ikọt Abasi ke eyo mme apostle?

• Didie ke Otu Emi Ẹsede Ẹban̄a Utom Mme Ntiense Jehovah mfịn ẹyom ndausụn̄ Abasi?