Ndutịm Ndida Mfori Ukeme nte Etịn̄ikọ ye Andikpep

EDIDE afo edi ekpri m̀mê akwa owo, eren m̀mê n̄wan, ukpepn̄kpọ emi ekeme ndin̄wam fi nditịn̄ ikọ uforo uforo nnyụn̄ ntịm ndot nte andikpep Ikọ Abasi.

Esenyịn ufọkn̄wed ọyọnọ mbon oro ẹsịnde enyịn̄ ke Ufọkn̄wed Utom Ukara Abasi utịn̄ikọ. Ke page ita oro ẹtienede, afo oyokụt ọkpọkpọ babru item fo. Mme nọmba oro ẹdude mbemiso nsio nsio item ẹsan̄a ẹkekem ye mme ukpepn̄kpọ ke mme page oro ẹtienede. Ke mme ukpepn̄kpọ emi, afo oyokụt nte ẹnamde an̄wan̄a se ibuanade ke nditịm mmehe ye mme ikpehe utịn̄ikọ ye unọ ukpep emi ye ntak emi mmọ kiet kiet edide akpan n̄kpọ. Afo oyokụt n̄ko ndausụn̄ oro an̄wamde ke nte akpanamde se ẹdọhọde ẹnam.

Uduot oro ẹsịnde ke babru item owụt m̀mê item ewe enyene n̄kpọ ndinam ye se ẹnọde ẹnam oro abuanade (1) edikot n̄wed nnọ otuowo, (2) nnamn̄wụt oro abuanade owo iba m̀mê awakde akan oro, m̀mê (3) utịn̄ikọ oro ẹnọde esop. Esenyịn ufọkn̄wed ọyọnọ item oro afo edinamde utom ke esịt. Eyetịm ọfọn ndinam utom ke item kiet ke ini kiet. Afo ọyọbọ ufọn ke ndinam mme utom oro ẹnọde ke utịt ukpepn̄kpọ kiet kiet. Edieke afo ọnọde uyarade nte ke afo amada item oro ẹnọde ke ukpepn̄kpọ kiet anam n̄kpọ uforo uforo, ọnọitem mbufo ọyọnọ fi item efen.

Edieke edinamde se ẹnọde nte nnamn̄wụt, afo oyoyom nte etịmde. Ẹwet mme usụn̄ oro ẹwụtde nte ẹtịmde ke page 82, edi idịghe n̄kukụre se afo enyenede ndida nnam n̄kpọ edi emi. Ọnọitem mbufo ekeme nditoro ete afo odomo nditịm ke akpan usụn̄ man otodo enyene mbufiọk, mîdịghe enye ekeme ndiyak fi emek ke idemfo.

Ndikot n̄wed emi nnyụn̄ nnam mme utom ẹdude, idem ke ini mûnyeneke n̄kpọ ndinam ke ufọkn̄wed, ekeme nditịp nsịn ke n̄kọri fo akamba akamba. Ndusụk afo emekeme ndikụre ukpepn̄kpọ kiet ke urua ke nsụhọde n̄kaha.

Inamke n̄kpọ m̀mê ebịghi adan̄a didie afo akabuana ke ufọkn̄wed emi m̀mê eketiene abuana ke an̄wautom, ifet osụk ododu ndinam n̄kọri. Afo akpakam ọbọ ufọn ọyọhọ ọyọhọ oto ukpepn̄kpọ oro ẹnọde ke Ufọkn̄wed Utom Ukara Abasi.