N̄kpri Pepa ke Idak Masịn Uyet-Ọfọn̄

Ke Zarina ama akakabade edi Ntiense Jehovah onyụn̄ ana baptism, enye ama ọkpọn̄ Russia afiak ọnyọn̄ obio emana esie ke Central Asia. Enye ama ebiere ndin̄wam nditọ esie iban mbiba ẹtiene ẹdi Ntiense Jehovah. Sia enye mîkenyeneke ediwak okụk, enye ama okodụn̄ ye ete ye eka esie, ye eyeneka esie erenowo ye n̄wan esie ke ufọk emi enyenede ubet kiet kpọt. Ete ye eka esie ẹma ẹdụri enye utọn̄ ẹte okûdedei ukpep nditọ esie iban iba oro akpanikọ emi enye ekpepde ke Bible, ẹnyụn̄ ẹdọhọ nditọ oro ẹkûneme n̄kpọ uban̄a Bible ye enye.

Zarina ama enen̄ede ekere nte edinamde in̄wam nditọ esie ẹdiọn̄ọ Jehovah. (Mme N̄ke 1:8) Ntre enye ama ọbọn̄ akam eseme ọnọ Jehovah ete eteme imọ se ikpanamde, onyụn̄ ọnọ imọ ọniọn̄. Enye ama anam se idin̄wamde enye anam se enye ekeben̄ede Jehovah. Enye ama esida nditọ esie ọwọrọ asan̄a ọbọ ofụm, onyụn̄ eneme nte mme edibotn̄kpọ ẹnyenede ndyọ. Emi ama anam nditọ esie ẹtọn̄ọ ẹyom ndifiọk n̄kpọ mban̄a Andibot.

Ekem, Zarina ama osio ifiọk edi man ekeme ndida n̄wed Nso ke Bible Enen̄ede Ekpep?a n̄n̄wam nditọ esie ẹnen̄ede ẹfiọk Jehovah. Enye ama esision̄o mme ikpehe ye mbụme ke n̄wed oro ewet ke n̄kpri n̄kpri pepa. Enye ama esinyụn̄ adian udịmikọ ifan̄ man anam se ẹtịn̄de ke n̄wed oro enen̄ede an̄wan̄a nditọ esie. Ekem emen mme pepa oro ye pencil ekesịn ke idak masịn uyet-ọfọn ke ubet uyere mmọn̄. Nditọ esie ẹma esika ẹkesio pepa oro ẹda do ẹkot ẹnyụn̄ ẹwet ibọrọ mmọ.

Zarina ama anam ntre ekpep nditọ esie nsio nsio ibuot iba ke n̄wed Bible Ekpep mbemiso enye ye nditọ esie ẹkụt ufọk en̄wen ẹwọrọ ẹkedụn̄. Enye ama ekeme ndien ndin̄wam nditọ esie nte enye oyomde. Ke October 2016, nditọ esie mbiba oro ẹma ẹna baptism; ama enem mmọ nte eka mmọ akadade ọniọn̄ ye mbufiọk ekpep mmọ akpanikọ aban̄a Abasi ke Bible.