Ọkpọsọn̄ Mbuọtidem Mma Kiet Akan Ọkpọsọn̄ Mfụhọ

“Edieke ẹkotde leta emi, ọwọrọ ke mbọhọke usiakidem emi ye nte ke mmebe mfep.”

NTEM ke mma kiet oro edide Christian onyụn̄ ekerede Carmen, ọkọtọn̄ọ leta oro enye ekewetde ọnọ ẹsọk nditọiban esie ita, emi ẹdide isua 25, 19, ye 16. Edi n̄kpọ mfụhọ nditịn̄ ke Carmen ikọbọhọke usiakidem oro, ke ntre enye ama ebe efep.

Eka ekeme ndinen̄ede n̄kop iduọesịt edieke ọfiọkde ke imọn̄ ikpa ikpọn̄ nditọiban ita ntre. Kpa ye oro, ọkpọsọn̄ mbuọtidem oro mma emi ekenyenede ke Jehovah ye ke mme un̄wọn̄ọ Esie ama akan ọkpọsọn̄ mfụhọ oro, ndien emi ikayakke esịt etịmede enye, nte leta esie oro otụkde owo mi owụtde. Se enye ekewetde ọnọ nditọiban esie edi emi.

“Akpa kan̄a, nyom ndisian mbufo ke mmama mbufo ke ofụri esịt mi. . . . Idụhe eka oro mîkpenemke esịt ndinyene utọ nditọ nte mbufo, mmonyụn̄ n̄kop inemesịt ndinyene mbufo.

“Ekpenem mi ndika iso ndu ye mbufo tutu esịm obufa ererimbot oro Abasi ọn̄wọn̄ọde . . . , edi sia owo mîkemeke ndiyan̄a, mmeben̄e enye an̄wam mbufo man ẹsọn̄ọ ẹda nte ẹsụk ẹsọn̄ọde ẹda tutu emi. Nnyịn imọyọ ediwak idomo ọtọkiet, ndien akananam Jehovah ikpọn̄ke nnyịn. . . . Ntre ẹka iso ẹtiene ndausụn̄ oro enye ọnọde ke esop esie ẹnyụn̄ ẹka iso ẹbere ye esop ye mbiowo. Ẹkwọrọ ikọ adan̄a nte ẹkekeme, ẹnyụn̄ ẹma kpukpru nditọete.

“N̄kpa emi edidianade nnyịn ke ibio ini. . . . Mben̄e mbufo nte ẹfen ẹnọ mi ke kpukpru se n̄kanamde ndue ye kpukpru ini oro mîkan̄wan̄ake mi se mbufo ẹkenamde m̀mê mme ini oro mmen̄kesisianke mbufo adan̄a nte mmade mbufo. . . . Mmọfiọk ke enyene se mbufo owo kiet kiet ẹyomde. Jehovah ọfiọk oro akan nte mbufo ẹfiọkde, enye oyonyụn̄ ọnọ mbufo kpukpru se ẹyomde onyụn̄ ọnọ mbufo utịp ke kpukpru se ẹyọde.

“Ẹkûfre se ẹbịnede—oro edi, uwem ke obufa ererimbot—ẹnyụn̄ ẹka iso ẹdomo ndisịm do. Jehovah akpakam ọdiọn̄ mbufo onyụn̄ ọsọn̄ọ mbufo idem man ẹsọn̄ọ ẹda tutu esịm utịt. . . . Edima nditọ mi, ẹkûfụhọ. Mmenen̄ede mma mbufo!”

N̄kpọ mmọn̄eyet ekeme ndiwọrọ owo ekededi ini ekededi. Edidem Solomon ke eset ekewet ete ke ‘ini ye unọmọ ẹtetịbe ẹnọ kpukpru owo.’ (Ecclesiastes 9:11) Nte ededi, mbon oro ẹnen̄erede ẹbuọt idem ke Abasi ẹkeme ndinyene ukem mbuọtidem emi apostle Paul ekenyenede; enye ọkọdọhọ ete: “Mmenịm ke akpanikọ nte n̄kpa m̀mê uwem . . . m̀mê edibotn̄kpọ efen ekededi idikemeke ndidianade nnyịn ke ima Abasi oro odude ke Christ Jesus Ọbọn̄ nnyịn.”—Rome 8:38, 39; Mme Hebrew 6:10.