Mme Ntiense Jehovah Ẹsida Didie Edinam Ubụkowo?
Nte idade edinam ubụkowo ye se isinamde do oto Bible, esịnede n̄kpọ ifan̄ emi:
Idiọkke ndifụhọ ke ini owo nnyịn akpade. Mme mbet Jesus ẹma ẹsifụhọ n̄kpa owo mmọ. (John 11:33-35, 38; Utom 8:2; 9:39) Ntre, nnyịn isidaha ini inamde edinam ubụkowo nte ini usọro. (Ecclesiastes 3:1, 4; 7:1-4) Utu ke oro, isida ini emi nte ini nditua ye mbon oro ẹtuan̄ade.—Rome 12:15.
Mme akpan̄kpa ifiọkke n̄kpọ ndomokiet. Inamke n̄kpọ m̀mê ito m̀mọ̀n̄ m̀mê ẹsinyụn̄ ẹnam didie n̄kpọ ke edem nnyịn, nnyịn isinamke n̄kpọ ndomokiet oro anamde etie nte ke nnyịn imetiene inịm se mme owo ẹtịn̄de m̀mê ẹnịmde ẹban̄a mme akpan̄kpa oro Bible mîkpepke. (Ecclesiastes 9:5, 6, 10) Emi esịne n̄kpọ nte, unịm ufọkikpo, uwo-uwo edinam ubụkowo, edinam editi mme akpan̄kpa, ndiwa n̄kpọ nnọ mme akpan̄kpa, nditịn̄ ikọ ye mme akpan̄kpa m̀mê ndiben̄e mme akpan̄kpa n̄kpọ, ndidọhọ ebe-akpa afat idet m̀mê esịne ọfọn̄ikpo ye mme n̄kpọ ntre. Nnyịn isinamke kpukpru n̄kpọ emi sia inam item Bible emi: “Ẹdian̄ade ẹda, . . . ẹkûnyụn̄ ẹtụk n̄kpọ ndek.”—2 Corinth 6:17.
Mme akpan̄kpa ẹyeset. Bible ekpep ke mme owo ẹyeset ke n̄kpa, ndien ke ini ke onyụn̄ edi emi n̄kpa mîdidụhe aba. (Utom 24:15; Ediyarade 21:4) Idotenyịn emi an̄wam nnyịn ikûnam ediwak n̄kpọ emi mme owo ẹsinamde ẹbe ubọk ke ini mmọ ẹfụhọde owo mmọ emi akpade, ukem nte okonyụn̄ an̄wamde mme Christian ke eyo mme apostle.—1 Thessalonica 4:13.
Bible ọdọhọ ikûsunam n̄kpọ ube nde. (Mme N̄ke 11:2) Nnyịn inịmke ke akpana ẹda ini edinam ubụkowo nte ini owo ‘ndida se enye enyenede n̄wụt idem’ m̀mê ndiwụt nte enye okponde itie ke obio m̀mê nte enye enyenede n̄kpọ. (1 John 2:16) Nnyịn isinamke uwo-uwo edinam ubụkowo ida isịn ndia m̀mê edinam ubụkowo emi ẹdepde ata ọsọn̄urua ekebe m̀mê ẹsịnede ata ọsọn̄urua ọfọn̄ man mme owo ẹkụt.
Nnyịn isidomoke ndinyịk mbon en̄wen ẹnịm se nnyịn inịmde iban̄a mme edinam ubụkowo. Ke n̄kpọ enye oro, isinam item Bible emi: “Owo nnyịn kiet kiet ayanam ibat aban̄a idemesie ọnọ Abasi.” (Rome 14:12) Edi, edieke ẹnọde nnyịn ifet nditịn̄ se inịmde ke akpanikọ, imesidomo ndinam oro ke “ifụre ifụre ido ye ntotụn̄ọ ukpono.”—1 Peter 3:15.
Edinam ubụkowo Mme Ntiense Jehovah esitie didie?
Ebiet ẹsinamde: Edieke ubon akpan̄kpa ẹbierede ndinam edinam ubụkowo, mmọ ẹkeme ndimek ebiet ekededi oro mmọ ẹyomde ẹnam edinam ubụkowo oro, utọ nte Ufọkmbono Obio Ubọn̄, ebiet emi ẹsikpede okụk ẹda ẹnam edinam ubụkowo, ufọkowo, ebiet ufọp okpo-owo, m̀mê ke itie udi.
Se ẹsinamde: Ẹsikwọrọ Ikọ Abasi ẹda ẹdọn̄ mbon oro owo mmọ akpade esịt, ẹnyụn̄ ẹtịn̄ se Bible etịn̄de aban̄a n̄kpa ye nte Abasi edinamde mme akpan̄kpa ẹset. (John 11:25; Rome 5:12; 2 Peter 3:13) Ẹkeme ndida ini edinam ubụkowo emi ntịn̄ mban̄a nti edu oro akpan̄kpa ekenyenede, idem ẹtịn̄de ẹban̄a nte enye ọkọsọn̄ọde ada anam n̄kpọ Abasi ye nte ikemede ndikpebe enye.—2 Samuel 1:17-27.
Ẹkeme ndikwọ ikwọ emi ẹdade ẹto Bible. (Colossae 3:16) Ekem ẹyeberi edinam oro ke ndibọn̄ akam emi edidọn̄de mme owo do esịt.—Philippi 4:6, 7.
Okụk m̀mê collection: Nnyịn isibọhọ okụk ndomokiet ke mme edinam Ikọ Abasi nnyịn, esịnede edinam ubụkowo, nnyịn isinyụn̄ ibọhọ collection ke mme mbono esop nnyịn.—Matthew 10:8.
Mbon emi ẹkemede ndidụk: Mbon emi mîdịghe Mme Ntiense Jehovah ẹkeme ndidụk edinam ubụkowo oro isinamde ke Ufọkmbono Obio Ubọn̄ nnyịn. Ukem nte mme mboho Ikọ Abasi nnyịn eken, owo ekededi ekeme ndidụk mme edinam ubụkowo nnyịn.
Ndi Mme Ntiense Jehovah ẹsitiene ẹka edinam ubụkowo oro ido ukpono en̄wen ẹnịmde?
Enyene-idem esida esịt esie emi Bible ọnọde ukpep ebiere. (1 Timothy 1:19) Edi, nnyịn isitieneke inam mme edinam ido ukpono oro ikerede ke ikemke ye se Bible ekpepde.—2 Corinth 6:14-17.