Ndi Bible Ekeme Ndinam Inemesịt Odu ke Ubon Mi?

Se Bible ọdọhọde

Ekeme ndinam. Se ndusụk nti item emi ẹdude ke Bible. Mme item emi ẹn̄wam ediwak irenowo ye iban ẹkop inemesịt ke ubon mmọ:

1. Sịn ndọ fo ke n̄wed. Mme ọdọ ndọ emi ẹsịnde ndọ ke n̄wed ẹdiọn̄ọ ke mmimọ idikpọn̄ke kiet eken. Emi ayan̄wam mmọ ẹkop inemesịt.—Matthew 19:4-6.

2. Ẹma ẹnyụn̄ ẹkpono kiet eken. Emi ọwọrọ ke ana anam n̄kpọ ye n̄wan fo m̀mê ebe fo nte akpamade enye anam ye afo.—Matthew 7:12; Ephesus 5:25, 33.

3. Ẹkûtịn̄ ikọ emi ediyatde owo. Ekpedi n̄wan fo m̀mê ebe fo etịn̄ ikọ mîdịghe anam n̄kpọ emi ayatde fi, kûnam enye usiene. (Ephesus 4:31, 32) Bible ọdọhọ ntem ke Mme N̄ke 15:1 ete: “Sụn̄sụn̄ ibọrọ osụk ifụtesịt, edi uyat uyat ikọ edemede iyatesịt.”

4. Ẹkûkpọn̄ kiet eken. Kûyom owo efen uma, kûnyụn̄ usịn efịbe. (Matthew 5:28) Bible ọdọhọ ete: “Yak kpukpru owo ẹkpono ndọ, ẹkûnyụn̄ ẹsabade bed ndọ.”—Mme Hebrew 13:4.

5. Kpep nditọ fo n̄kpọ ke ima. Kûdedek eyenọwọn̄ kûnyụn̄ ukama enye ke ọkpọsọn̄ ubọk.—Mme N̄ke 29:15; Colossae 3:21.