Ndi Mme Ntiense Jehovah Ẹdi Mbon N̄ka Zion?

Mmọ idịghe. Mme Ntiense Jehovah ẹdi mme Christian emi ẹdade se mmọ ẹnịmde ke akpanikọ ẹto N̄wed Abasi. Ndusụk ido ukpono ẹkpep mme owo ẹte ke nditan̄ kpukpru mme Jew mbok ke Palestine enyene n̄kpọ ndinam ye ntịn̄nnịm ikọ N̄wed Abasi, edi Mme Ntiense Jehovah ikpepke utọ n̄kpọ oro. Mmọ inịmke ke N̄wed Abasi ama etịn̄ ete ke ẹyetan̄ mme Jew ẹkebok ke Palestine. Idụhe ebiet ndomokiet ke N̄wed Abasi emi ọdọhọde ke ukara kiet ọfọn akan en̄wen m̀mê ke orụk kiet ọfọn akan en̄wen. Magazine Mme Ntiense Jehovah emi ẹkotde Enyọn̄-Ukpeme etịn̄ in̄wan̄-in̄wan̄ ete: “Idụhe ebiet ndomokiet ke N̄wed Abasi oro enyịmede ukaraidem N̄ka Zion.”

Encyclopædia Britannica ọdọhọ ke N̄ka Zion edi “n̄ka ufreidụt mme Jew emi uduak esie edide ndisiak san̄asan̄a idụt mme Jew ke Palestine nnyụn̄ nnọ idụt emi ibetedem.” N̄ka emi enyene ntọn̄ọ oto ido ukpono ye ukaraidem. Mme Ntiense Jehovah ikpepke n̄kpọ iban̄a N̄ka Zion, mmọ inyụn̄ isan̄ake n̄kpọ ye ukaraidem N̄ka Zion.

Esop Mme Ntiense Jehovah edi esop ido ukpono inyụn̄ isan̄ake n̄kpọ ye n̄ka ukaraidem ekededi, esịnede N̄ka Zion. Ẹwet ata ediwak n̄kpọ ndiwụt ke Mme Ntiense Jehovah isisịnke idem ke mbubehe ukara, ndien ke ndusụk idụt Mme Ntiense ẹsinyịme ẹkọbọ mmimọ utu ke mmọ ndisịn idem ke mbubehe ukara. Nnyịn inịm ke Obio Ubọn̄ Abasi emi odude ke heaven kpọt edinam ata emem odu ke isọn̄ emi; ukara owo m̀mê n̄ka ndomokiet ikemeke ndinam emi.

Akpan n̄kpọ emi Mme Ntiense Jehovah ẹkpepde ke ido ukpono mmọ, emi kpukpru mmọ ẹnamde ke idụt ekededi emi mmọ ẹdude, edi mmọ ndinịm ibet ukara idụt oro. Mmọ isisọn̄ke ibuot ye ukara, isinyụn̄ itieneke in̄wana ekọn̄.