Ndi Mme Ntiense Jehovah Ẹsisan̄a Ẹkwọrọ Ikọ Man Ẹbọ Edinyan̄a?

Ihih. Edi akpanikọ ke imesisan̄a ke ufọk ke ufọk ikwọrọ ikọ, edi nnyịn idọhọke ke se idinọde nnyịn edinyan̄a edi oro. (Ephesus 2:8) Ntak emi idọhọde ntre?

Kere ban̄a uwụtn̄kpọ emi ise: Ete kiet ọdọhọ ke imọn̄ inọ owo ekededi emi edide stadium ke Monday ata ọsọn̄urua n̄kpọ. Edieke enen̄erede enịm se ete oro etịn̄de, ndi udûkaha stadium usen oro? Imọfiọk ke akpaka! Ekeme ndidi okponyụn̄ etịn̄ ọnọ mme ufan ye mme iman fo ete ẹtiene ẹdibọ enọ oro. Ndikọwọrọ n̄ka stadium itiehe nte utom emi anamde ọnọ ete oro man enye ọnọ fi se enye ọkọdọhọde. Enọ edi enọ, idịghe utịp utom.

Kpasụk ntre, Mme Ntiense Jehovah ẹnịm ke nsinsi uwem edi enọ emi Abasi aduakde ndinọ kpukpru mbon emi ẹkopde uyo esie. (Rome 6:23) Nnyịn imesisịn idem itịn̄ emi inọ mme owo, inyụn̄ ikere ke mmọ ẹyetiene ẹbọ enọ Abasi emi. Edi nnyịn inịmke ke ndisan̄a n̄kwọrọ ikọ edinọ nnyịn edinyan̄a. (Rome 1:17; 3:28) Se idude edi ke inyeneke se owo ndomokiet akpanamde man odot ndibọ edinyan̄a. Bible ọdọhọ ke Abasi edinyan̄a nnyịn ke ntak mbọm, idịghe ke ntak “utom edinen ido oro nnyịn ikanamde.”—Titus 3:5.