Mme Ntiense Jehovah Ẹsinam N̄kpọ Didie ye Owo Emi Mîdịghe Aba Ntiense Jehovah?

Imesidomo ndima kpukpru owo, mfọn ido ye mmọ, nnyụn̄ n̄kpono mmọ. Edieke Ntiense Jehovah ekededi mîsịnke idem inam n̄kpọ Abasi aba nte enye ekesinamde mîdịghe etetre ndinam, imesidomo ndineme nneme ye enye, ifiak iti enye adan̄a nte imade enye, inyụn̄ idomo ndin̄wam enye afiak ekpere Abasi.​—Luke 15:4-7.

Edi ndusụk ini nte owo esinamde n̄kpọ esinam ẹsio enye ẹfep ke esop. (1 Corinth 5:13) Edi ke ntak inen̄erede ima nditọ-ete nnyịn, imesidomo kan̄a ndin̄wam enye okpụhọde man owo idisio enye ifep ke esop. Idem ekpededi ẹsosio enye ẹfep ke esop, isisụk imama enye inyụn̄ ikpono enye nte Bible ọdọhọde inam.​—Mark 12:31; 1 Peter 2:17.

Nso isinam ẹsio owo ẹfep ke esop?

Bible enen̄ede osio etịn̄ ke edieke Christian anamde akwa idiọkn̄kpọ ndien enye inyụn̄ imaha ndikabade esịt, yak ẹsio enye ẹfep ke esop.a (1 Corinth 5:11-13) Bible asiak mme idiọkn̄kpọ emi ẹdide akwa idiọkn̄kpọ emi ẹkemede ndinam ẹsio owo ẹfep ke esop. Ke uwụtn̄kpọ, mme idiọkn̄kpọ oro ẹsịne utọ n̄kpọ nte, efịbe, ukpammịn, owo ndinam n̄kpọ afai afai ye ebe m̀mê n̄wan esie, ye inọ.​—1 Corinth 6:9, 10; Galatia 5:19-21; 1 Timothy 1:9, 10.

Edi, nnyịn isisọpke-sọp isio owo emi anamde akwa idiọkn̄kpọ ifep ke esop. Mbiowo esopb ẹsidomo ndin̄wam owo oro okpụhọde. (Rome 2:4) Mmọ ẹsinam n̄kpọ ifụre ifụre, sụn̄sụn̄, ẹnyụn̄ ẹfọn ido ye owo oro man ẹkeme ndin̄wam enye okpụhọde. (Galatia 6:1) Ndinam n̄kpọ ntre ye owo oro ekeme ndin̄wam enye okụt ke imọ ima idue onyụn̄ ebiere ndikpụhọde. (2 Timothy 2:24-26) Edieke edide kpa ye ofụri se ẹnamde man ẹn̄wam enye, edi enye osụk akaka iso ndibiat Ibet Abasi, ana ẹsio enye ẹfep ke esop. Ekem mbiowo ẹyetọt ke owo oro idịghe aba Ntiense Jehovah.

Nso isidi ufọn ndisio owo emi mîmaha ndikabade esịt mfep ke esop? Esop ayasana mme owo ke esop ẹyenyụn̄ ẹdu uwem nte Abasi ọdọhọde, oro oyonyụn̄ anam enye ikemeke ndibiat mbon en̄wen ke esop. (1 Corinth 5:6; 15:33; 1 Peter 1:16) N̄kpọ en̄wen edi ke anamidiọk oro ekeme ndibiere ndikabade esịt nnyụn̄ n̄kpụhọde usụn̄ uwem esie.​—Mme Hebrew 12:11.

Mme Ntiense Jehovah ẹsinam n̄kpọ didie ye mbon emi ẹsiode ẹfep ke esop?

Bible ọdọhọ mme Christian “ẹtre ndidụk ndụk” ye owo emi ẹsiode ẹfep ke esop, onyụn̄ ọdọhọ ‘ikûkam udia n̄kpọ ye utọ owo oro.’ (1 Corinth 5:11) Nnyịn isidụkke ndụk ye owo emi ẹsiode ẹfep ke esop. Edi, nnyịn isitopke enye iduọk ofụri ofụri. Imesinam n̄kpọ ye enye ukpono ukpono. Enye ekeme ndidụk mme mboho ikọ Abasi nnyịn, ndien Mme Ntiense Jehovah eken ẹkeme ndikọm enye.c Enye ekeme ndidọhọ mbiowo ẹn̄wam imọ ifiak ikpere Jehovah.

Nso kaban̄a owo emi ẹsiode ẹfep ke esop edi n̄wan m̀mê ebe esie ye nditọ esie emi ẹdụn̄de kiet ye enye ke ẹdedi Mme Ntiense Jehovah? Enye edisụk idadiana kiet ye ubon esie nte owo ubon oro, edi ididianake ye mmọ inam mme n̄kpọ ikọ Abasi. Sia mmọ ẹsụk ẹdụn̄de ufọk kiet, mmọ ẹsụk ẹdedi ebe ye n̄wan, nditọ oro ẹsụk ẹdedi nditọ mmọ, ntre akpana ubon oro ẹsụk ẹwụt ke imama enye.

Owo emi ẹkesiode ẹfep ke esop ekeme ndidọhọ mbiowo ẹdin̄wam imọ, mbiowo ẹma ẹka ẹkese enye, mmọ ẹyeda Bible ẹteme enye se enye edinamde, ẹnyụn̄ ẹdọhọ enye akabade esịt onyụn̄ afiak ọnyọn̄ ebịne Jehovah. (Zechariah 1:3) Enye ekpetre idiọkn̄kpọ oro onyụn̄ enen̄ede owụt ke imọ imoyom ndidu uwem nte Bible ọdọhọde, ẹyefiak ẹda enye ke esop. Nditọ-ete ke esop ẹnyene “ndifen nnọ enye nnyụn̄ ndọn̄ enye esịt,” ukem nte mme Christian ke Corinth ẹkenamde ye owo emi akakabarede esịt etre idiọkn̄kpọ emi enye akanamde.​—2 Corinth 2:6-8.

Esitie mbon emi ẹkesiode ẹfep ke esop didie ke idem ẹma ẹfiak ẹda mmọ?

Kop se ndusụk Mme Ntiense Jehovah emi ẹkesiode ẹfep ke esop emi ẹkefiakde ẹnyọn̄ ẹbịne Abasi ẹtịn̄de mi.

“Ini n̄kebierede ke mmoyom ndifiak nnyọn̄ ndi esop, n̄kekere ke mbiowo ẹyeyom ndidiọn̄ọ kpukpru se n̄kanamde ke ofụri ediwak isua oro ẹkesiode mi ẹfep ke esop do. Utu ke oro, mmọ ẹkedọhọ ete: ‘Nnyịn iyom fi ayak ekikere fo esịn ke se ekemede ndinam nnọ Abasi idaha-emi.’ Se mmọ ẹketịn̄de oro ama anam esịt ana mi sụn̄.”​—Maria ke United States.

“Nditọ-ete ẹketetie ẹbet usen emi ndifiakde nnyọn̄ ndi esop. Mma n̄kụt ke mmọ ẹnen̄ede ẹma mi. Nditọ-ete ẹma ẹn̄wam mi n̄kụt ke Jehovah efen ọnọ mi, ke mmọ n̄ko ẹnyụn̄ ẹfen ẹnọ mi, ndien oro ama an̄wam mi n̄kûsutie nduọhọ idemmi ke se iketịbede oro. Mbiowo ẹkesida ke ikpat ndin̄wam mi nnen̄ede n̄kpere Jehovah. Mmọ ẹma en̄wam mi n̄kụt ke Jehovah osụk amama mi ke enye inyụn̄ idaha mi ibre mbre.”​—Malcom ke Sierra Leone.

“Enen̄ede enem mi ndikụt nte Jehovah amade ikọt esie tutu enye esikụt ete ke ẹnam esop esie asana kpukpru ini. Mbon oro mîdịghe Mme Ntiense Jehovah ẹkere ke nnyịn ndisio anamidiọk mfep ke esop owụt ke nnyịn isọsọn̄ ido ye enye, edi n̄kpọ oro akam edi n̄kpọ anade ẹnam onyụn̄ owụt ke ẹma owo oro ye mbon eken ke esop. Enem mi nte edima Ete nnyịn ke heaven amade nnyịn esinyụn̄ efende ọnọ nnyịn.”​—Sandi ke United States.