Bible Etịn̄ Se Iditịbede Inọ Ido-Ukpono

Ndi se esikụtde ke nsio nsio ido-ukpono esibiak fi m̀mê etek fi esịt? Kpa ye emi ido-ukpono ẹn̄wamde owo ifan̄ m̀mê obio ifan̄, mfịna emi enye adade edi awak akan nti n̄kpọ emi enye anamde. N̄wed kiet emi ẹkotde Encyclopedia of Religion and War ọdọhọ ke “Ndusụk ekọn̄ emi ẹn̄wanade ke ererimbot, ẹn̄wana ke ntak se ido-ukpono ẹkpepde.” Ediwak mme ada-iso ido-ukpono ẹsida ido-ukpono mmọ ẹnam mme owo ẹnam se ukara ẹyomde utu ke ndinam mme owo ẹkpono Abasi. Ndusụk mme ada-iso ido-ukpono ẹsidomo ndidịp mme obụrobụt ido ye udia-inọ emi mme ikpọ-owo ufọkabasi mmọ ẹnamde.

Edieke se ido-ukpono ẹsinamde esibiakde fi ntre, ekere ke etie Abasi didie ke idem? Bible anam idiọn̄ọ ke Abasi inemke esịt ye ediwak ido-ukpono ke ntak n̄kpọ emi mmọ ẹsinamde. Bible onyụn̄ ọdọn̄ọ mme prọfesi emi etịn̄de se Abasi edinamde idọ-ukpono. Bible ọnọ nnyịn nsio nsio uwụtn̄kpọ emi aban̄ade se Abasi edinamde ido-ukpono ke ofụri ererimbot, akananam utọ n̄kpọ emi itịbeke.

Bible ọdọhọ ke nso iditịbe inọ ido-ukpono?

Prọfesi: N̄wed Ediyarade etịn̄ aban̄a akpara kiet emi ekerede Akwa Babylon. Akpara oro odoro ke enyọn̄ ididuot idiọk unam. Aka ko, idiọk unam oro owot akpara oro.​—Ediyarade 17:3, 5, 16.

Se ọwọrọde: Akpara oro ekerede Akwa Babylon, ada aban̄a kpukpru nsu nsu ido-ukpono.a Ididuot idiọk unam ada aban̄a United Nations (UN).b Nte akpara oro odorode ke enyọn̄ ididuot idiọk unam oro, owụt nte nsu nsu ido-ukpono ẹsidomode ndinam ukara ẹnam se mmọ ẹyomde. Ndiọi unam oro ndikowot akpara oro owụt ke UN ye mme idụt eken oro ẹdianade ye mmọ ẹyen̄wana ye kpukpru nsu nsu ido-ukpono ẹnyụn̄ ẹsobo mmọ. Nte ẹdisobode nsu nsu ido-ukpono eyenyene uten̄e eti-eti.

Ẹdisan̄a didie isobo nsu nsu ido-ukpono?

Prọfesi: “Nnụk duop oro afo okokụtde, ye idiọk unam oro, mmọ ẹyesua akpara oro ẹnyụn̄ ẹsobo enye ẹnyụn̄ . . . ẹfọp enye ke ikan̄ ofụri ofụri. Koro edi Abasi ekesịn emi ke esịt mmọ [esịt mme andikara ererimbot] ete ẹnam ekikere imọ, oro edi, ẹnam ekikere kiet ke ndida obio ubọn̄ mmọ nnọ idiọk unam oro, . . . Ufen esie [edidi] ke usen kiet, n̄kpa ye mfụhọ ye akan̄, ndien ẹyefọp enye ofụri ofụri ke ikan̄, koro Jehovahc Abasi, emi ekpede ikpe esie, edide ọkpọsọn̄.”​—Ediyarade 17:16, 17; 18:8.

Se ọwọrọde: Abasi eyesịn ekikere esie ke esịt mme andikara ererimbot. Abasi ayanam mme andikara oro ẹyak “obio ubọn̄ mmọ,” m̀mê ukara mmọ ẹnọ UN. UN, ẹyeda obufa odudu oro ẹnọde mmọ ẹsobo kpukpru nsu nsu ido-ukpono ke ererimbot usọp usọp. Utọ n̄kpọ n̄kpa-idem emi editịbe inikiet inikiet nte n̄kpọ eke ẹdọhọde ke etịbe ke usen kiet, ndien ayakpa ata ediwak owo idem sia mmọ ikekereke-kere ke utọ n̄kpọ oro ekeme nditịbe.​—Ediyarade 18:21.

Ntak emi ẹdisobode nsu nsu ido-ukpono?

Prọfesi: “Mme idiọkn̄kpọ esie ẹboho ọtọkiet ẹkon̄ ẹsịm enyọn̄, Abasi omonyụn̄ eti mme ukwan̄ edinam esie.”​—Ediyarade 18:5.

Se ọwọrọde: Nsu nsu ido-ukpono ẹbak ibak eti-eti ke ediwak isua idaha-emi. Se ndusụk “idiọkn̄kpọ esie” emi edinamde Abasi osobo enye mi:

Ubre pọlitiks. Jesus Christ ama ekpep mbet esie ete ẹkûtiene usịn idem ke n̄kpọ ukara, utu ke oro yak mmọ ẹdori enyịn ke Obio Ubọn̄ Abasi, oro edi ukara heaven emi edidade itie ukara owo mi ke isọn̄.d (Daniel 2:44; Matthew 6:9, 10; John 6:15; 18:36) Nsu nsu ido-ukpono ẹkam ẹkpep mme owo ndidori enyịn ke ukara owo. Ke ntak emi enye odụkde-dụk enyịne ke pọlitịks utu ke ndisọn̄ọ nda ye Abasi, prọfesi oro ke Ediyarade ọdọhọ ke Akwa Babylon esinam “use” ndien ke oro anam ẹkot enye “akwa akpara.”​—Ediyarade 17:1, 2; James 4:4.



Afai. Edọhọ ke nsu nsu ido-ukpono ẹkama iyịp “kpukpru mbon oro ẹkewotde ke isọn̄.” (Ediyarade 18:24) Ediwak ido-ukpono ikpepke mbon mmọ nditie emem emem, edi mmọ ẹsinyịme mîdịghe ẹdọdọn̄ mme owo ẹka ẹkọn̄ mîdịghe ẹsịn ntịme ke obio.



Idiọk itọn̄. Nsu nsu ido-ukpono ẹdu “ọkpọmiọk inem uwem unana iso o-bụt.” (Ediyarade 17:4; 18:7) Ediwak ido-ukpono ẹda odudu oro mmọ ẹnyenede ye mbon emi mmọ ẹdiọn̄ọde ẹkọ ediwak inyene ẹnọ idemmọ. Abasi imaha utọ idiọk itọn̄ oro.​—Titus 1:7.



Nsu. Nsu nsu ido-ukpono ẹkpep ẹnyụn̄ ẹnam se mîsịneke ke Bible.e Sia edide nsu nsu ido-ukpono ẹsikpep mme owo ẹnyụn̄ ẹnyịme mme owo ẹnam mme n̄kpọ emi ẹsuenede Abasi, oro anam prọfesi oro okot enye “eka . . . mme mbubiam n̄kpọ eke ẹdude ke isọn̄.”​—Ediyarade 17:5; 18:23.

Ndi kpukpru ido-ukpono ke ẹdisobo?

Ihih. N̄wed Ediyarade etịn̄ aban̄a mbon emi ẹtode kpukpru idụt emi ẹkotde “akwa otuowo.” (Ediyarade 7:9) Ẹdọhọ ke akwa otuowo emi “ẹsịne mfia ọfọn̄idem,” emi ọwọrọ ke mmọ ẹtuak ibuot ẹnọ Abasi ke usụn̄ oro enye amade. Ẹdọhọ n̄ko ke mmọ ẹbọhọ “akwa ukụt,” emi Bible ọdọhọde ke edi ini emi ẹdisobode nsu nsu ido-ukpono ye kpukpru mme asua Abasi. (Ediyarade 7:13, 14; 19:11, 19-21) Akwa otu-owo emi ẹsịnede mfia ọfọn̄idem ẹdu ke ido-ukpono akpanikọ, ndien ido-ukpono akpanikọ emi edidu ke nsinsi.f

Nso ufọn ke edidia ẹma ẹsobo nsu nsu ido-ukpono?

Esịt ekeme ndina fi sụn̄ ndidiọn̄ọ ke idịghe Abasi ọdọn̄ nsu nsu ido-ukpono mme enyene ndịk n̄kpọ oro mmọ ẹnamde. Imodori enyịn ke n̄kpọ ọyọfọn ke ini iso, sia imọdiọn̄ọ ke ibịghike Abasi oyosobo kpukpru nsu nsu ido-ukpono emi ẹsuenede enye ẹnyụn̄ ẹnamde mme owo ẹbọ ufen.

Diọn̄ọ ke imekeme ndituak ibuot nnọ Abasi ke usụn̄ emi enye enyịmede. Bible ọdọhọ ete: “Ini ke edi, . . . eke ata mme andituak ibuot ẹdituakde ibuot ẹnọ Ete ke spirit ye ke akpanikọ, koro edi utọ mme owo emi ke Ete oyom ete ẹtuak ibuot ẹnọ imọ.” (John 4:23) Enye ọdọhọ mmọ ete: “Mbufo ikọt mi ẹwọn̄ọ ke esịt esie [Akwa Babylon], edieke mbufo mîyomke nditiene mbuana ke mme idiọkn̄kpọ esie, edieke mbufo mînyụn̄ iyomke nditiene mbọ mme ufen esie.” (Ediyarade 18:4) Abasi ke oyom mme owo ẹdituak ibuot ẹnọ imọ ke nnennen usụn̄. (1 Timothy 2:3, 4) Enye ọn̄wọn̄ọ ke mbon oro ẹnamde oro ẹyedu uwem ke nsinsi.​—1 John 2:17.