Ndi Ofụri Se Ẹnamde Man Emem Odu Ayanam Emem Odu ke Ofụri Ererimbot?

Ekọn̄ ye en̄wan ke aka iso ke nsio nsio itie ke ererimbot. Oro anam United Nations ye mme n̄ka eken ẹdomo ndinam ofụri se mmọ ẹkekeme man emem odu. Se mmọ ẹsinamde esịne ndidọn̄ mbon mmọ ẹka mme ebiet oro mfịna odude. Uduak mmọ esidi ndifiak nnam emem odu ke mme ebiet oro ẹn̄wanade ekọn̄ do. António Guterres emi edide akwa-owo United Nations ọdọhọ ete: ‘Se idide akpan n̄kpọ ke ofụri se isinamde emi edi ndinam emem odu ke ofụri ererimbot.’

Ke ediwak isua idaha-emi, ukeme oro United Nations ye mme n̄ka eken ẹsịnde man emem odu osụk enyene ndusụk ufọn. Ke uwụtn̄kpọ, se mmọ ẹnamde emi esisụk ekpeme uwem mme owo, an̄wam mbon emi ẹkedide mbon itọkekọn̄ ẹfiak ẹnyọn̄ọ mme idụt mmọ. Mmọ ẹsinọ mme owo udia ye mme n̄kpọ eken ẹnyụn̄ ẹn̄wam ẹfiak ẹdiọn̄ mme n̄kpọ oro ẹkebiatde. Edi enyene ndusụk n̄kpọ emi enen̄erede anam ọsọn̄ mbon United Nations ye mme n̄ka eken ndinam emem odu ke ererimbot emi. Ndi odu se ikemede ndinam ata emem odu ke isọn̄ emi ke nsinsi? Nso ke Bible ọdọhọ?

Se inamde ọsọn̄ ndinam emem odu ye se Bible ọdọhọde ke Abasi ayanam

Se inamde ọsọn̄: mme owo imaha ndidiana kiet. Ke ini ẹdomode ndinam emem odu, isimemke utom ndinam nsio nsio n̄ka, edide eke mbonekọn̄ ye eke mbon oro mîdịghe mbonekọn̄ ke nsio nsio idụt ẹdiana kiet. Ndusụk ini, mme n̄ka emi isikemeke ndidiana kiet nnam utom ke ntak emi mmọ ẹnyenede nsio nsio n̄kpọ emi mmọ ẹkerede ke akpana ẹnam ye ke ntak emi mîsinyụn̄ in̄wan̄ake mmọ se mbon n̄ka en̄wen ẹyomde ẹnam.

Se Bible ọdọhọde: “Abasi enyọn̄ oyowụk obio ubọn̄ . . . onyụn̄ osobo kpukpru mme obio ubọn̄ emi [ukara owo], ndien enye ayada ke nsinsi.”​—Daniel 2:44.

Se inamde ọsọn̄: unana okụk, mbonutom ye mme n̄kpọ eken. Idịghe kpukpru ini ke nsio nsio n̄ka oro ẹsidomode ndinam emem odu ẹsinyene mbonutom ekem, ẹnyene okụk ye mme n̄kpọ eken, ndien emi esinam ọsọn̄. N̄ko esiyom mbon mmọ ẹka mme ebiet emi mfịna enen̄erede ọsọn̄ ubọk ndien mme utọ itie oro esinam mmọ ndịk ndika.

Se Bible ọdọhọde: ‘Abasi Ọbọn̄ nnyịn Jesus Christ anam Jesus etie ke ubọk nnasia ke mme itie eke heaven, emi etịmde okon̄ akan kpukpru ukara ye odudu.’​—Ephesus 1:17, 20, 21.

Jehovah,a emi edide ata ọkpọsọn̄ Abasi, ọnọ Jesus kpukpru se enye oyomde man enye ekeme ndikara nte Edidem Obio Ubọn̄ Abasi. (Daniel 7:13, 14b) Abasi ọnọ Jesus odudu, ifiọk, ọniọn̄, ye mbufiọk ndien idụhe ukara owo m̀mê n̄ka ekededi emi enyenede utọ enye Abasi ọnọde Jesus. (Isaiah 11:2) N̄ko, Jesus enyene mme okopodudu angel ke udịm ke udịm ndin̄wam enye. (Ediyarade 19:14) Idụhe se isọn̄de ikan Jesus.

Se inamde ọsọn̄: mme ibet ukara. Ndusuk ini, mbon nsio nsio n̄ka oro ẹsidomode ndinam emem odu isikemeke ndinam kpukpru se mmọ ẹkpemade ndinam ke ntak emi ibet ndusụk idụt mîn̄wan̄ake mmọ m̀mê ke ntak emi ibet ndusụk idụt mîyakke mmọ ẹnam se mmọ ẹkpemade ndinam. Mme utọ ibet emi ẹkeme ndikpan mmọ ndinam mme n̄kpọ emi ẹkpekpemede uwem mme owo mîdịghe ndinam se mmọ ẹkeduakde.

Se Bible ọdọhọde: “Ẹnọ [Jesus] ofụri odudu ke heaven ye ke isọn̄.”​—Matthew 28:18.

Abasi anam Jesus ọdiọn̄ọ ofụri se anade enye anam man emem odu ke ofụri ererimbot onyụn̄ ọnọ enye odudu ndinam oro. (John 5:22) Tutu amama Jesus idinamke idiọk; enye idisarike owo, iditen̄eke owo enyịn idinyụn̄ ibọhọ ubọkedem. (Isaiah 11:3-5) Oro anam Bible okot Jesus “Ọbọn̄ Emem,” onyụn̄ ọdọhọ ke enye edida “unenikpe ye edinen ido” anam ukara esie ọsọn̄ọ ada.​—Isaiah 9:6, 7.

Obio Ubọn̄ Abasi edinam ata emem odu

Ndusụk ini, mbon oro ẹsidomode ndinam emem odu ẹsikeme ndinam ekọn̄ ye en̄wan ẹtre ke ndusụk itie. Edi, mmọ isikemeke ndisio ata akpan ntak oro esinamde mme owo ẹn̄wana, oro edi, usua emi esịnede-sịne ediwak owo ke esịt.

“Ata akpan mfịna edi ke owo ikemeke ndinam emem odu ke ebiet emi emem mîkodụhe-du.”​—Dennis Jett, akani ambassador U.S.

Edi Obio Ubọn̄ Abasi kpọt ekeme ndinam emem odu sia enye ayan̄wam mme owo ẹtre ndisua kiet eken. Ke uwụtn̄kpọ, kûfre ke ini Jesus okodude ke isọn̄ emi, enye ama ekpep mme mbet esie nte mmọ ẹkpemade ẹnyụn̄ ẹdude ke emem ye kiet eken onyụn̄ ananam owụt mmọ nte ẹkpenamde emi:

Jesus ama ọdọhọ n̄ko ke se ẹdidade idiọn̄ọ mbon oro ẹdidude ke Obio Ubọn̄ Abasi edi nte mmọ ẹmade kiet eken. Se Bible etịn̄de n̄ko anam idiọn̄ọ ke Abasi idiyakke mbon oro ẹsisuade owo ẹdu ke Obio Ubọn̄ esie:

Jehovah Abasi, emi okobotde owo, ọdiọn̄ọ mfọnn̄kan ye n̄kukụre usụn̄ emi enye edinamde emem odu ke isọn̄ emi. Obio Ubọn̄ esie ayanam se mme owo, esịnede se mbon nsio nsio n̄ka emi ẹsidomode ndinam emem odu mîkekemeke ndinam.