Didie ke Abasi Esise Aban̄a Mme Inan
Mme inan ke ofụri ererimbot ẹkpere ndisịm miliọn 70, ndien ediwak mmọ ẹsisem kiet ke otu se ikande usem idiọn̄ọ 200 oro mme inan ẹsisemde. Se idiọkde edi ke mme owo isidaha mme inan ke n̄kpọ, ndien mme n̄kpọ oro ẹtienede mi ẹwụt oro:
Mbon National Association of the Deaf ke (U.S.), ẹdọhọ: “Ke ofụri ererimbot, mme owo isibatke unen oro mme inan ye mbon oro mîkopke n̄kpọ ọfọn ẹnyenede ke n̄kpọ ndomokiet.”
Mbon World Federation of the Deaf, ẹdọhọ: “Mme inan ke mme idụt emi mînyeneke n̄kpọ ẹdi ata ọkpọi-kpọi ubuene, ndien mmọ isikemeke ndika n̄wed, nnyene utom m̀mê ndikop se ikade iso.”
Abasi ada didie mme inan? Nso ke Bible etịn̄ aban̄a mmọ? Ndien, didie ke Mme Ntiense Jehovah ẹsin̄wam mmọ mfịn?
Nte Abasi Adade Mme Inan
Bible owụt ke Jehovaha Abasi enen̄ede ekere aban̄a mme inan. Enye oyom ẹnam n̄kpọ ye mmọ nte ẹnamde ye kpukpru owo. Enye onyụn̄ oyom mmọ ẹtiene ẹkpep kpukpru se Enye ekpepde nnyịn.
Itie Bible: “Kûsụn̄i inan.”—Leviticus 19:14.
Se Ọwọrọde: Ibet oro Jehovah ọkọnọde nditọ Israel ikayakke ẹsinam n̄kpọ ye mme inan nte ẹmama.
Itie Bible: “Abasi inamke asari.”—Utom 10:34.
Se Ọwọrọde: Jehovah ekere aban̄a kpukpru owo inamke n̄kpọ m̀mê ẹsinam n̄kpọ didie ke edem mmọ m̀mê ewe usem ke mmọ ẹsinyụn̄ ẹsem. Mme inan ẹsịne do n̄ko.
Itie Bible: “Jesus asan̄a akanade . . . , ọkwọrọ eti mbụk obio ubọn̄.”—Matthew 9:35.
Se Ọwọrọde: Jesus ekedi isọn̄ man edinam mme owo ẹdiọn̄ọ ẹban̄a Obio Ubọn̄ Abasi ye se Obio Ubọn̄ oro edinamde inọ kpukpru owo esịnede mme inan.—Matthew 6:10.
Itie Bible: Jesus ama akam anam “mme inan ẹkop ikọ, imụm ẹnyụn̄ ẹtịn̄ ikọ.”—Mark 7:37.
Se Ọwọrọde: Jesus ama anam ikụt se Obio Ubọn̄ Abasi edinamde ini mme inan ẹdikemede ndikop nnyụn̄ ntịn̄ ikọ. Isan̄ kiet, Jesus ama ada ubọk etịn̄ ikọ ye owo emi ekedide inan mbemiso anamde enye okop ikọ onyụn etịn̄ ikọ.—Mark 7:31-35.
Itie Bible: “Utọn̄ ẹyenyụn̄ ẹsịrede mme inan.”—Isaiah 35:5.
Se Ọwọrọde: Jehovah ama etetịn̄ ke mme inan ẹyekop ikọ.—Isaiah 29:18.
Nte Mme Ntiense Jehovah Ẹn̄wamde Mme Inan Mfịn
Mme Ntiense Jehovah ẹsikwọrọ etop idotenyịn ẹnọ mme inan ke ofụri ererimbot. Nso ke inam man ikeme ndinam ofụri emi? Imọsio Bible ye mme vidio emi idade ikpep mme owo Bible ke se ibede usem idiọn̄ọ 100. Imesikpep mme owo Bible inyụn̄ inịm mme mbono esop nnyịn ke usem idiọn̄ọ. Isinam kpukpru emi ke mfọn inọ owo ekededi emi oyomde Abasi an̄wam imọ. Ntak isinamde kpukpru emi? Jesus ọkọdọhọ ete: “Mbufo ẹkebọ ke mfọn, ẹnọ ke mfọn.”—Matthew 10:8.
Emekeme ndikụt mme n̄kpọ emi ke Intanet mîdịghe osion̄o mmọ ke mme ikpehe Intanet ẹsiakde mi ọdọn̄ ke fon fo:
JW.ORG. Fịk ebiet emi ẹkemede ndikpụhọ usem emi odude ke enyọn̄ page ekededi ke ikpehe Intanet emi, man okụt mme n̄kpọ oro ẹdọn̄de ke usem idiọn̄ọ emi amade.
JW Library Usem Idiọn̄ọ. Sịn app emi ke fon m̀mê kọmputa fo, oro ayan̄wam fi ekeme ndisio m̀mê ndise mme vidio usem idiọn̄ọ.
Nso ye Nso ke Inam Emi Isidade Ikpep Bible?
Bible ke usem idiọn̄ọ. Bible Edisana N̄wed Abasi—Edikabade Eke Obufa Ererimbot ke usem idiọn̄ọ America ekedi akpa ofụri Bible emi ẹkesiode ke usem idiọn̄ọ. Bible Edikabade Eke Obufa Ererimbot odu ofụri ofụri m̀mê ubak ubak ke ediwak usem idiọn̄ọ, ndien kpukpru isua ke idian mbon en̄wen. (Edieke oyomde ndikụt ibat usem emi isiode Bible emi m̀mê ndise Bible emi ke Intanet, se ekebe emi “The New World Translation of the Bible in Sign Language.”)
Se vidio emi The Complete New World Translation Is Available in ASL man okụt utom oro ẹkenamde man ẹkeme ndisio Bible ke usem idiọn̄ọ.
Edieke oyomde ndinen̄ede ndiọn̄ọ nte okpokotde Bible ke usem idiọn̄ọ, sịn JW Library Sign Language app ke fon m̀mê kọmputa fo. App emi ayan̄wam fi emek mme ufan̄ikọ oro oyomde ke usem idiọn̄ọ.
Dmytro ye Vita ẹdi inan, edi nditọ mmọ idịghe inan. Se mme ufọn oro ubon mmọ ẹsibọde ndisise Bible usem idiọn̄ọ kpukpru usen.
Mme vidio emi isidade ikpep Bible. Mme Ntiense Jehovah ẹsion̄o mme vidio usem idiọn̄ọ emi ekemede ndin̄wam mme owo ẹdiọn̄ọ ẹnyụn̄ ẹnanam mme item oro Bible ọnọde . . .
Ndikpep Bible iso ye iso. Nam owo esidi edikpep fi Bible ke usem idiọn̄ọ, onyụn̄ ada ini ekpep fi nte idaha fo ayakde. Dọhọ ẹnanam ẹwụt fi nte isikpepde mme owo Bible ke mfọn.
Jeson Senajonon odụn̄ ke Philippines. Se nte ndikpep Bible ye Mme Ntiense Jehovah akan̄wamde enye edi ufan Abasi.
Mario Antúnez ekedi pastọ ufọkabasi ke Honduras. Se nte enye ekedikụtde mme ibọrọ mbụme oro enye ekesibụpde ke Bible, nte enye etịn̄de ke mbụk esie emi “Mma Nnyene Ata Ediwak Mbụme.”
Mbono esop ye mme mboho Ikọ Abasi. Imenyene mme esop ye mme otu usem idiọn̄ọ ke ofụri ererimbot, do ke mme inan ẹsika ẹkekpep Ikọ Abasi ẹnyụn̄ ẹkpono Abasi kpukpru urua. Imesinyụn̄ inịm mme ikpọ mboho Ikọ Abasi ke usem idiọn̄ọ kpukpru isua. Ke mme mbono esop ye mme mboho Ikọ Abasi nnyịn, mme owo ẹsidu ndikabade se ẹkwọrọde nnọ mbon ẹdide inan ye nnan. Imesinyụn̄ inọ mme owo mme n̄wed nnan ke mfọn.
Yom esop emi ekperede fi.
Yom usụn̄ diọn̄ọ ini emi ididụkde akamba mbono nnyịn ye mbono circuit.
Tiene dụk Editi n̄kpa Jesus emi edide ata akpan edinam oro isinịmde kpukpru isua.
José Luis Ayala odụn̄ ke Mexico. Enye akamana inan, ekem akabade nnan. Se nte ẹken̄wamde enye ndikpep mbon en̄wen Bible.
a Jehovah edi ata enyịn̄ Abasi. (Psalm 83:18) Kot ibuotikọ emi “Anie Edi Jehovah?”