Ufiop Okpon Etieti ke Ererimbot​—Nso ke Bible Etịn̄ Aban̄a Emi?

Ke July 2022, ẹma ẹdọhọ ke ufiop okpon etieti ke ediwak itie ke ererimbot:

• “Ọyọhọ ikaba edi emi China ẹdọhọde ke n̄kpọ nte ikpọ obio 70 ọmọn̄ enen̄ede ofiop ọfiọn̄ emi.”​—July 25, 2022, CNN Wire Service.

• “Ke ntak Europe enen̄erede ofiop, ikan̄ obụbode ata ikpọ akai.”​—July 17, 2022, The Guardian.

• “Ke Sunday ediwak ikpọ obio ke United States ama ofiop akan nte esifiopde ke ntak ufiop ofụm ọkọwọrọde ke United States.”​—July 24, 2022, The New York Times.

Nso ke kpukpru emi ọwọrọ? Ndi eyenyene ini emi mme owo mîdikemeke ndidụn̄ ke ererimbot? Nso ke Bible etịn̄ aban̄a emi?

Ndi Bible ama etịn̄ ke ererimbot oyofiop ntem?

Ih. Nte ererimbot ofiopde emi ekem ye ndusụk se Bible eketịn̄de aban̄a eyo nnyịn emi. Ke uwụtn̄kpọ, Jesus ama etetịn̄ ke iyokụt “n̄kpọ ndịk.” (Luke 21:11) Nte ererimbot ofiopde usen ifan̄ emi anam idem enyek mme owo onyụn̄ anam mme owo ẹkere ke ererimbot emi ididịghe se mme owo ẹdụn̄de aba ke ntak se mme owo ẹnamde.

Ndi eyenyene ini emi mme owo mîdikemeke ndidụn̄ ke ererimbot?

Ihih. Abasi okobot ererimbot man mme owo ẹdụn̄ ke nsinsi. (Psalm 115:16; Ecclesiastes 1:4) Utu ke Abasi ndiyak mme owo ẹbiat isọn̄, enye ọn̄wọn̄ọ ‘ndisobo mbon oro ẹbiatde isọn̄.’​—Ediyarade 11:18.

Se prọfesi iba en̄wen emi owụtde se Abasi aduakde ndinam:

• “Wilderness ye edisat ebiet ẹyedara, ndien unaisọn̄ desat ayadara onyụn̄ asiaha ikọn̄ nte saffron.” (Isaiah 35:1) Abasi idiyakke ererimbot emi etie nte desat emi mme owo m̀mê n̄kpo ndomokiet mîkemeke ndidụn̄, edi ọyọdiọn̄ mme ebiet oro abiarade.

• “Afo ọmọwọn̄ọde ntịn̄enyịn fo ọnọ isọn̄, man anam enye on̄wụm ekese.” (Psalm 65:9) Abasi ọyọdiọn̄ isọn̄ onyụn̄ anam enye akabade edi paradise.

Okpoyom ndinen̄ede ndiọn̄ọ se Bible etịn̄de aban̄a nte ererimbot ofiopde, kọt ibuotikọ emi “Climate Change and Our Future​—What the Bible Says.”

Edieke oyomde ndidiọn̄ọ se Bible etịn̄de aban̄a nte ererimbot emi edifiakde ifọn, kot ibuotikọ emi “Who Will Save the Earth?”