Ekedi Akpan Asiakusụn̄ Isua 50

KE 1964, ẹma ẹnọ mi n̄kedi akpan asiakusụn̄ ke Manokwari ke West Papua. Etubom ufọkabasi kiet do ama ọkọbọ ekpri esop emi okodude do n̄kpa n̄kpa. Ikebịghike ke mma n̄kesịm do, ọkwọrọikọ Protestant ama ofụt esịt edi ufọk mi.

Enye ama ofiori idat idat ete: “Mmọn̄ n̄wụri ufọk emi nnyụn̄ mbịn Mme Ntiense Jehovah nsio ke Manokwari emi.”

Editịm esie ikanamke mi ndịk, sia nte akani owo bodisi mma ndiọn̄ọ ke enye idikemeke ndinam n̄kpọ ndomokiet. Kpa ye oro, mma mbọrọ enye sụn̄sụn̄, ndien ke akpatre enye ama ọnyọn̄ emem emem.—1 Pet. 3:15.

Ini oro, Mme Ntiense itiaita kpọt ẹkesikwọrọ ikọ ke Manokwari. Edi idahaemi, ke n̄kpọ nte isua 50 ama ekebe, esop ẹsịm itiaba. Ndien mbon emi ẹkedụkde akamba mbono 2014 ẹma ẹbe owo 1,200. Mma nti se Jehovah anamde ke obio emi, esinem mi tutu.