Mme Iyịre Emi Ẹkesidade Ẹkọ Iyak ke Eyo Bible

Mbon emi ẹsikotde Bible ẹkeme nditi ke ndusụk mbet Jesus ẹkedi mme ọkọ-iyak. (Mark 1:16-20) Mmọ ẹkesida iyịre ẹkọ iyak ke Inyan̄ Galilee.

Ẹkesida twine (oro edi, urụk mbakara) m̀mê urụk emi ẹdade flax ẹnam ẹtobo nsio nsio ediwak ẹkpụk, ndudu onyụn̄ odu ke ufọt nsio nsio ekpụk oro. Ẹkot ndudu oro enyịn iyịre. Ekpedi iyịre emi ẹdidade ẹmụm n̄ken̄e iyak, enyịn iyịre ẹdidi n̄ken̄e n̄ken̄e. Ekpedi ẹdida imụm ikpọ iyak, enyịn iyịre oyokpon. Ẹma ẹsiwak ndiyịri n̄ket mîdịghe itiat ke n̄kpri iyịre man ẹkeme nditen̄ ndụk esịt mmọn̄. Ke eke ikpọ iyịre emi ẹkotde iyịre mbakara m̀mê ekpabrukịm, ẹma ẹsiyịri n̄kpọ emi odobide ke n̄kan̄ emi oyomde nditen̄ ndụk esịt mmọn̄ ndien ẹyịri eto m̀mê n̄kpọ en̄wen nte ikịmuwam ke n̄kan̄ emi edifiọrọde ke enyọn̄ mmọn̄.

Iyịre ukọ-iyak ama esisọn̄ urua. Ikpọ itiat ke isọn̄ inyan̄ ama esibiat iyịre. Iyak emi ẹmụmde akpawak akaha, iyịre ama esiwaha. (Luke 5:6) Bible etịn̄ nte James ye John ‘ẹdiọn̄de iyịre.’ Ekeme ndidi mmọ ẹkeda abiabon ye urụk emi ẹdade flax ẹnam ẹdiọn̄. (Matt. 4:21) Etie nte mme ọkọ-iyak ẹkesidiọn̄ iyịre mmọ kpukpru ini emi mmọ ẹnyọn̄de ọkọ. Luke onyụn̄ etịn̄ nte mme ọkọ-iyak “[ẹdararede] iyịre mmọ.” Mbat m̀mê mbio ke mmọ ẹdararede ẹsio oro. (Luke 5:2) Ekem mmọ ẹyekọn̄ iyịre oro man asat. Ana-edi ẹsinam ntre man idimem, idiyap, inyụn̄ ikpoho.​—Ezek. 47:10.

Irenowo emi ekemehede mmọ ndida iyịre n̄kọ iyak ke Jesus ọkọdọhọ ẹdidi “mme ọkọ owo.”​—Mark 1:17.