Se Nte Jesus Emi Edide Akwa Oku Nnyịn Esituade Owo Mbọm

1-2. (a) Ntak emi Jehovah ọkọdọn̄de Eyen esie edi isọn̄? (b) Idineme nso ke ibuotikọ emi? (Mme Hebrew 5:7-9)

N̄KPỌ nte isua 2,000 emi ekebede, Jehovah Abasi ama ọdọn̄ Eyen esie emi enye amade akan edi isọn̄. Ama awak ntak-o, edi kiet ekedi man enye edifak ubonowo osio ke isụn̄i idiọkn̄kpọ ye n̄kpa, afiak anam n̄kpọ emi edinamde ẹkeme ndinen̄ede kpukpru se Satan akabiatde. (John 3:16; 1 John 3:8) Jehovah ama ọdiọn̄ọ n̄ko ke Jesus ndidi ndidu ke isọn̄ ayanam enye edi Akwa Oku emi etịmde okop nnyịn mbọm onyụn̄ atuade nnyịn mbọm. Jesus ọkọtọn̄ọ utom Akwa Oku oro ke enye ama akana baptism ke isua 29 eyo esie.a

² Ke ibuotikọ emi, imọn̄ ineme nte Jesus ndikodu ke isọn̄ akan̄wamde enye etetịm odot ndidi Akwa Oku emi atuade owo mbọm. Ama enen̄ede an̄wan̄a nnyịn nte ‘ẹkenamde Jesus ọfọn ama,’ oro edi, etetịm odot ndinam utom oro, iyokụt nte edinen̄erede imem nnyịn utom ndika mbịne Jehovah idem ke ini mme idiọkn̄kpọ nnyịn m̀mê ndudue nnyịn anamde idem emem nnyịn.​—Kot Mme Hebrew 5:7-9.

EDIMA EYEN ABASI EDI ISỌN̄

3-4. Nso ke Jesus ọkọkpọn̄ ke heaven ini enye edide isọn̄? Uwem eketie didie ye Jesus ke isọn̄?

³ Enyene ini emi n̄kpọ okokpụhọrede ke uwem ediwak nnyịn. Ke uwụtn̄kpọ, ana-edi ama edi se ikpọn̄de ufọk emi ekenemde-nem nnyịn ikodu ke ebiet en̄wen, ndien oto ke oro nnyịn ikpọn̄ ubon nnyịn ye mme ufan nnyịn. Isimemke-o. Edi idụhe owo ke isọn̄ emi, emi n̄kpọ okpụhọrede ke uwem esie nte eke Jesus. Ini Jesus odude ke heaven, enye ekedi akakan ke otu mme angel Jehovah. Jehovah akama enye ata ima, Jesus ama onyụn̄ okop idatesịt kpukpru ini sia enye okodu ke “ubọk nnasia” Abasi anam utom. (Ps. 16:11; N̄ke 8:30) Kpa ye oro, Philippi 2:7 ọdọhọ ke enye “ama asana” ubọn̄ ubọn̄ itie esie oro ke heaven “ayak” man edidụn̄ ke isọn̄ emi ye mme owo emi mîfọnke ima, ke enye akanam oro ke idemesie, owo ikenyịkke-nyịk enye.

⁴ Kere n̄ko ban̄a emana Jesus ye nte uwem eketiede ye enye ini enye ekedide ekpri. Jesus akamana odụk ufọk ubuene. Nte isan̄ade idiọn̄ọ edi ke n̄kpri inuen iba ke ete ye eka esie ẹkekeme ndidep mmen n̄kawa ke enye ama akamana. (Lev. 12:8; Luke 2:24) Ini Edidem Herod ibak okokopde ke Jesus amana, enye ama odomo ndiwot Jesus. Ete ye eka esie ẹma ẹmen enye ẹfehe ẹkedụn̄ kan̄a ke Egypt man Herod idiwot enye. (Matt. 2:13, 15) Nte uwem eketiede ye Jesus ke isọn̄ ekedi ata isio ye nte eketiede ke heaven!

5. Nso ye nso ke Jesus okokụt ke isọn̄? Didie ke oro eketịm enye idem ọnọ utom Akwa Oku? (Se ndise n̄ko.)

⁵ Ini Jesus okodude ke isọn̄, ebiet eke enye ọwọwọn̄ọde aka, ufen emi mme owo ẹkebọde ikedịghe ekpri. Imenịm ke enye ama okop n̄ko nte esitiede owo ke idem owo esie ama akpa, koro imenịm ke Joseph ebe Mary emi ekemende enye akama nte eyen ama esịne ke otu mbon esie emi ẹkekpade. Ini Jesus osụk ọkwọrọde ikọ ke isọn̄, enye ama osobo mbon akpamfia, mme nnan, mbon akpa-uben̄, ye mbon emi eyen akakpade ọkpọn̄, mbọm mmọ ama onyụn̄ anam enye. (Matt. 9:2, 6; 15:30; 20:34; Mark 1:40, 41; Luke 7:13) Ini Jesus odude ke itie ubọn̄ esie oro ke heaven, enye ama okụt ufen ubonowo. Edi ini enye edide edidu ke isọn̄ nte owo, enyịn emi enye akadade okụt ufen ubonowo ekedi isio ye enyịn emi enye okokụtde ini enye etiede ke heaven. (Isa. 53:4) Mme n̄kpọ emi Jesus okokụtde ke isọn̄ ama anam ubiak ye ukụt ubonowo etetịm an̄wan̄a enye, ama onyụn̄ an̄wan̄a enye nte etiede mme owo ke idem. Jesus ke idemesie ama okop mfụhọ, ekaha, ọkpọsọn̄ editịmede esịt, ye mme n̄kpọ ntre emi mme owo ẹsikopde.

JESUS ESIWỤT KE IMEKERE IBAN̄A MME OWO

6. Nso ke mme uwụtn̄kpọ emi prọfet Isaiah ọkọnọde ẹkpep nnyịn ẹban̄a nte Jesus edikopde mme owo mbọm inyụn̄ itua mmọ mbọm? (Isaiah 42:3)

⁶ Ofụri ini emi Jesus ọkwọrọde ikọ ke isọn̄, enye ama esinen̄ede okop mbon emi idem ekememde ye mbon emi mme owo mîkadaha ke n̄kpọ mbọm. Enye ndikanam ntre ama osu prọfesi. Ke N̄wed Abasi Usem Hebrew, ndusụk ini ẹsimen mbon emi ẹforode ye mbon emi ẹkopde idem ẹdomo ye in̄wan̄esa emi ẹduọkde mmọn̄ yak n̄kpọ eye idem m̀mê anyan akamba eto emi ọsọn̄de idem. (Ps. 92:12; Isa. 61:3; Jer. 31:12) Edi ẹmen mme ubuene ye mbon emi ẹfịkde ẹdomo ye nnyanyan̄a eke anuahade ye ọfọn̄ utuenikan̄ eke ekperede ndinịme. N̄kpọ iba oro ẹnyene ufọn ẹnọ anie? (Kot Isaiah 42:3; Matt. 12:20) Spirit Abasi akanam prọfet Isaiah ada mme uwụtn̄kpọ oro etịn̄ prọfesi aban̄a nte Jesus edimade mme ikpîkpu owo emi mbon en̄wen ẹdade ke inyeneke ufọn ndomokiet, ye nte enye edituade mmọ mbọm.

7-8. Didie ke Jesus okosu prọfesi Isaiah?

⁷ Matthew emi eketienede ewet mme Gospel ọkọdọhọ ke ikọ Isaiah emi: “Enye idibụn̄ke nnyanyan̄a eke anuahade; enye idinyụn̄ inịmeke ọfọn̄ utuenikan̄ eke ekperede ndinịme” okosu Jesus ke idem. Ndusụk utịben̄kpọ emi Jesus akanamde ama an̄wam mbon emi ẹkefịkde, emi eketiede mmọ ke idem nte mmọ ẹdi nnyanyan̄a eke anuahade, m̀mê mbon emi mîkenyeneke idotenyịn aba, emi eketiede mmọ ke idem nte mmimọ idi ọfọn̄ utuenikan̄ eke ekperede ndinịme. Uwụtn̄kpọ kiet edi ete kiet emi akpamfia ọkọyọhọde idem. Ndi utọ owo oro ama odori enyịn ke iyọbọhọ utọ udọn̄ọ oro, ifiak ikodu ye mbonubon ye mme ufan imọ? (Luke 5:12, 13) Owo efen ntre ekedi ete emi ọkọdọn̄ọde inan, mîkonyụn̄ ikemeke nditịn̄ ikọ ọfọn. Kere ise nte ekesitiede enye ke idem enye ama okụt nte mme owo ẹnemede nneme ẹsak, edi enye ikopke, se ẹtịn̄de inyụn̄ in̄wan̄ake enye. (Mark 7:32, 33) Edi ikokụreke ke oro.

⁸ Ke eyo Jesus, ediwak mme Jew ẹkenịm ke mbon emi ẹdọn̄ọde m̀mê ẹbiomode ndo ẹkebọ ufen idiọkn̄kpọ mmọ m̀mê eke ete ye eka mmọ. (John 9:2) Nsu emi mmọ ẹkenịmde do ama anam mmọ ẹnam utọ mme owo oro ẹkere ke mmimọ iwọrọke n̄kpọ ndomokiet. Jesus ama anam idem ọsọn̄ mme owo oro onyụn̄ anam mmọ ẹkụt ke Abasi ekere aban̄a mmọ. Enye ndikanam oro ama osu prọfesi Isaiah. Oro anam inen̄ede inịm nso?

9. Didie ke Mme Hebrew 4:15, 16 owụt ke Akwa Oku nnyịn emi odude ke heaven esinen̄ede okop mbon emi mîfọnke ima mbọm?

⁹ Kot Mme Hebrew 4:15, 16. Ẹyak inịm ke Jesus iditreke nditua nnyịn mbọm. Se itịn̄de oro ọwọrọ nso? Owo emi esituade owo mbọm edi owo emi ufen mbon en̄wen esitụkde enye, nte etiede mbon en̄wen ke idem onyụn̄ an̄wan̄a enye. Ikọ Greek emi ẹkabarede nte “nditua mbọm” ọwọrọ owo ndidi n̄kpọ ama etịbe ọnọ owo en̄wen, owo oro ekere nte etiede owo emi enyenede mfịna oro ke idem, nte etiede owo oro onyụn̄ an̄wan̄a enye. (Se n̄ko Mme Hebrew 10:34, emi Paul adade ukem ikọ Greek oro etịn̄ ikọ.) Mme mbụk utịben̄kpọ Jesus ẹnam ikụt nte ufen mbon en̄wen ẹkesinen̄erede otụk enye. Jesus ikesikọkke mme owo udọn̄ọ nte n̄kpọ emi ẹdọhọde ke se ẹkenyụn̄ ẹdọn̄de enye edinam edi oro, okụre ke oro. Enye ama esinen̄ede ekere aban̄a mme owo oro onyụn̄ oyom ndin̄wam mmọ. Se uwụtn̄kpọ mi. Ini enye ọkọkọkde ete oro akpamfia, enye akpakada ke anyan usụn̄ anam utịben̄kpọ oro. Edi mbọm ama anam enye otuk ete oro. Ekeme ndidi ediwak isua ama ebe ubọk owo ndomokiet itụkke ete oro! Ini Jesus okoyomde ndinam ete emi ekedide inan okop n̄kpọ, Jesus ama emen enye ọkpọn̄ otu-owo ye kpukpru uyom ye ndusịghede oro aka ebiet emi odobode. Enyene mma kiet emi ekedide anamidiọk, emi akakabarede esịt. Enye ama ada mmọn̄eyet esie eyet Jesus ukot onyụn̄ ada idet ibuot esie ọkwọhọde Jesus ukot. Ini Pharisee kiet ekesede mma oro ke ndek, Jesus ikodopke ise, enye ama enen̄ede Pharisee oro. (Matt. 8:3; Mark 7:33; Luke 7:44) Jesus ikesisọnke mbon emi ẹkedọn̄ọde m̀mê mbon emi ẹkenamde ikpọ idiọkn̄kpọ. Utu ke oro, enye ama esimen mmọ adian idem, okop mmọ mbọm, onyụn̄ owụt mmọ ke imama mmọ. Ẹyak inịm ke enye oyonyụn̄ atua nnyịn mbọm.

NTE IKPEBEDE AKWA OKU NNYỊN MFỊN

10. Mme n̄kpọ Ikọ Abasi ewe ke ikeme ndida n̄n̄wam mme inan ye mme nnan? (Se mme ndise n̄ko.)

¹⁰ Sia idide mme mbet Jesus, imesidomo ndima mbon en̄wen, ndikere mban̄a mmọ, ndinyụn̄ n̄kop mmọ mbọm nte enye ekesinamde. (1 Pet. 2:21; 3:8) Nnyịn idikemeke ndinam inan okop ikọ m̀mê ndinam nnan okụt usụn̄, edi imekeme ndin̄wam mmọ ẹdiọn̄ọ Jehovah ẹnyụn̄ ẹnen̄ede ẹkpere enye. Ke uwụtn̄kpọ, mme n̄wed Ikọ Abasi nnyịn ẹdu ke se ibede usem idiọn̄ọ 100. Imonyụn̄ inyene n̄wed mme nnan ke se ibede usem 60. Ke mme ebiet emi owo mîtịn̄ke ikọ ke mme vidio nnyịn, idaha-emi ẹsitịn̄ se ikade iso do man ẹn̄wam mme nnan ye mbon emi mîkwe n̄kpọ ọfọn. Ẹnam oro ke se ibede usem 100. Mme n̄kpọ emi ẹn̄wam mme inan ye mme nnan ẹnen̄ede ẹkpere Jehovah ye Eyen esie.

11. Didie ke esop Jehovah ẹwụt ke mmimọ imekere iban̄a kpukpru orụk owo ukem nte Jesus? (Utom 2:5-7, 33) (Se mme ndise n̄ko.)

¹¹ Esop Jehovah ẹdomo ndin̄wam kpukpru orụk owo. Ti ke Jesus ama ekeset, ke enye ama an̄wan̄a edisana spirit ọduọk mme mbet esie man mmọ ẹkwọrọ ikọ ẹnọ kpukpru mbon emi ẹkesopde idem ke usọrọ Pentecost “ke usem mmọ” kiet kiet. (Kot Utom 2:5-7, 33.) Esop Abasi ẹkpebe Jesus ke n̄kpọ enye oro. Mmọ ẹnam mme n̄kpọ Ikọ Abasi ẹdu ke se ibede usem 1,000; ndusụk usem emi, mbon emi ẹsemde enye iwakke. Ke uwụtn̄kpọ, ndusụk usem mbon Amerindian emi ẹsemde ke North America ye ke South America, mbon emi ẹsemde enye iwakke. Kpa ye oro, ẹnam mme n̄kpọ Ikọ Abasi nnyịn ke se ibede usem Amerindian 160 man ẹn̄wam adan̄a ediwak owo nte ẹkekeme ẹkop eti mbụk ke usem oro. Imenyene n̄ko mme n̄wed Ikọ Abasi ke se ibede usem mbon Romany 20. Ediwak tọsịn mme owo emi ẹsemde utọ mme usem oro ẹtọn̄ọ ndinam n̄kpọ nnọ Jehovah.

12. Tịn̄ mme n̄kpọ en̄wen emi esop Abasi ẹnamde ẹn̄wam mme owo.

¹² Ndisuan etop eti mbụk idịghe n̄kukụre utom emi esop Jehovah ẹnamde. Mmọ ẹsin̄wam mme owo ke ini mmọn̄, ikan̄, m̀mê oyobio abiatde n̄kpọ mmọ. Ediwak tọsịn nditọ-ete ẹdu emi ẹben̄ede idem ndika n̄kan̄wam nditọ-ete mmọ ke utọ ini oro. N̄kpọ en̄wen emi esop Jehovah ẹnamde edi ndinam ẹnyene eti itie emi mîdịghe uwo-uwo, emi mme owo ẹkemede ndisop idem n̄kpep ediwak n̄kpọ mban̄a ima emi Abasi amade mmọ.

AKWA OKU NNYỊN EKEME NDIN̄WAM FI

13. Tịn̄ ndusụk usụn̄ emi Jesus esin̄wamde nnyịn.

¹³ Sia Jesus edide eti ekpemerọn̄ emi esede aban̄a nnyịn, enye esikụt ete ke nnyịn owo kiet kiet imenyene se idin̄wamde nnyịn inen̄ede ikpere Jehovah. (John 10:14; Eph. 4:7) Ndusụk ini se itịbede inọ nnyịn ekeme ndinam etie nnyịn ke idem nte idi nnyanyan̄a eke anuahade m̀mê ọfọn̄ utuenikan̄ eke ekperede ndinịme. Ata idiọk udọn̄ọ, ndudue emi inamde, m̀mê mfịna emi inyenede ye eyenete ekeme ndinam idem enen̄ede emem nnyịn. Ekeme ndisọn̄ nnyịn ndisio ekikere n̄kpọn̄ n̄kpọ emi abiakde nnyịn idaha-emi onyụn̄ ọsọn̄ nnyịn ndisịn ekikere ke nti n̄kpọ emi idoride enyịn ndikụt ke ini iso. Edi ti ke Jesus okụt se iwọrọde fi, ke nte etiede fi ke esịtidem enen̄ede an̄wan̄a enye. Jesus ayan̄wam fi sia mbọm fo anam enye. Ke uwụtn̄kpọ, enye ekeme ndida edisana spirit nsọn̄ọ fi idem, idem ama emem fi. (John 16:7; Titus 3:6) N̄kpọ en̄wen edi ke Jesus ekeme ndida “irenowo” emi ‘ẹnọde nte enọ’ ye nditọ-ete eken ke esop nsọn̄ọ fi idem, mberi fi edem, nnyụn̄ n̄n̄wam fi.​—Eph. 4:8.

14. Nso ke ikeme ndinam idem ama emem nnyịn?

¹⁴ Ekpedi edeme-ikan̄ fo ekpere ndinịme mîdịghe spirit fo anuaha, oro edi ke idem emem fi, ti ke Jesus edi Akwa Oku nnyịn nyụn̄ nen̄ede kere ufọn emi edidiade ito enye. Ti ke Jehovah ọkọdọn̄ enye edi isọn̄ emi edikpa afak mme owo, edi ikụreke ke oro. Ntak en̄wen emi Jehovah ọkọdọn̄de enye edi isọn̄ ekedi man enye edidu mi yak mme mfịna emi mbon emi mîfọnke ima ẹsobode ẹtetịm an̄wan̄a enye. Idem ama emem nnyịn ke ntak idiọkn̄kpọ nnyịn m̀mê ke ntak mme ndudue nnyịn, Jesus eben̄e idem ndin̄wam nnyịn “ke nnennen ini,” owo idinyụn̄ inyịkke-nyịk enye an̄wam.​—Heb. 4:15, 16.

15. Nọ mbụk emi owụtde nte ẹkemede ndin̄wam owo emi ama okoyo ọkpọn̄ otu-erọn̄ Jehovah afiak ọnyọn̄ edi.

¹⁵ Jesus esinyụn̄ ada ikọt esie usụn̄ yak ẹyom mbon emi ẹma ẹkeyo ẹkpọn̄ otu-erọn̄ Jehovah ẹnyụn̄ ẹn̄wam mmọ. (Matt. 18:12, 13) Kop uwụtn̄kpọ Stefano.b Ke ẹma ẹkesio enye ke esop ke isua 12, enye ama ebiere ndidụk mbono esop. Enye ọdọhọ ete: “Ikememke inọ mi, edi n̄koyom ndifiak nsịne ke ubon Jehovah nnyụn̄ ndiana ye nditọ-ete mi emi ẹmade mi. Mbiowo emi ẹkesobode ye ami ẹma ẹnam enem mi ke idem. Ndusụk ini ama esitie mi nte n̄wọrọke n̄kpọ, ami nnyụn̄ nyom ndiyak idem emem mi. Edi mme brọda oro ẹma ẹti mi ke Jehovah ye Jesus iyomke n̄kpa mba. Ini ẹkefiakde ẹda mi ke esop, kpukpru owo ke esop ẹma ẹdara mi ye ubon mi. Nte ini akakade, n̄wan mi ama enyịme ndikpep Bible. Mfịn emi, ami ye ubon mi idiana kiet inam n̄kpọ inọ Jehovah.” Imenịm ke enem Akwa Oku nnyịn emi amade nnyịn ndikụt nte ẹn̄wamde mme anamidiọk emi ẹkabarede esịt ẹfiak ẹnyọn̄ ẹdi esop!

16. Nso inam enen̄ede enem fi ndinyene Akwa Oku emi atuade owo mbọm ntre?

¹⁶ Ini Jesus okodude mi ke isọn̄, enye ama an̄wam anana-ibat owo ke nnennen ini. Mfịn nnyịn n̄ko imekeme ndinịm ke enye ayan̄wam nnyịn ini ekededi emi iyomde un̄wam. Ndien ke obufa ererimbot emi edidide ke mîbịghike, enye ayan̄wam mbon emi ẹkopde item ẹbọhọ kpukpru se idiọkn̄kpọ ye unana-mfọnmma anamde mmọ. Imenen̄ede ikọm Jehovah Abasi nnyịn emi akwa ima ye mbọm esie akanamde enye emek Eyen esie edi Akwa Oku emi esituade nnyịn mbọm!