Ke Ini Mbon En̄wen Ẹsede Fi, Nso ke Mmọ Ẹsikpep Ẹto Fi?
1. Ke ini mme mbet Jesus ẹkesede enye, nso ke mmọ ẹkekpep ẹto enye?
1 Jesus ọkọdọhọ ete: “Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi.” (Matt. 11:29) Nte an̄wan̄ade, enye akada eti uwụtn̄kpọ esie ekpep mme owo n̄kpọ, ikedịghe nditetịn̄ kpọt. Kere se mme mbet ẹkekpepde ẹto Jesus ke ini mmọ ẹkesede nte enye ẹkesinamde n̄kpọ. Enye ekedi sụn̄sụn̄ owo, ọfọn ido onyụn̄ ama mme owo. (Matt. 8:1-3; Mark 6:30-34) Enye ama enen̄ede osụhọde idem. (John 13:2-5) Ke ini mme mbet Jesus ẹkesan̄ade ye enye ke an̄wautom, mmọ ẹma ẹkụt ke enye ekedi anamutom emi mîkpaha mba, emi ekesikụtde unen ndikpep mme owo akpanikọ. (Luke 8:1; 21:37, 38) Didie ke nte nnyịn isinamde n̄kpọ ke an̄wautom esitụk mme owo?
2. Didie ke nte ikamade idem inyụn̄ inamde n̄kpọ ke an̄wautom esitụk mme enyeneufọk?
2 Mme Enyeneufọk: Nte isisịnede ọfọn̄, nti edu uwem nnyịn, ye ata udọn̄ oro inyenede ke idem mme owo ekeme ndinen̄ede ntụk mme enyeneufọk. (2 Cor. 6:3; Phil. 1:27) Mmọ esikụt nte nnyịn isikotde ito Bible kpukpru ini. Esinem mbon eken ndikụt nte nnyịn ikpan̄de utọn̄ ukpono ukpono ke ini mmọ etịn̄de ikọ. Kûdedei ufre nte ke mme nti edinam emi ẹkeme ndinam mme owo ẹkop etop Obio Ubọn̄.
3. Didie ke nte isinamde n̄kpọ ekeme nditụk nditọete nnyịn?
3 Nditọete Nnyịn: Kere n̄ko nte se isinamde esitụkde nditọete nnyịn. Nnyịn ndisịn ifịk ke an̄wautom esinam mbon en̄wen ẹtiene ẹsịn ifịk. Kpa nte ukwak esibande ukwak ọsọp, nnyịn ndisitịm idem mbemiso iwọrọde an̄wautom ekeme n̄ko ndinam mbon en̄wen ẹtiene ẹnam ntre man ẹfori usụn̄ unyene nneme mmọ. (N̄ke 27:17) Ke ini isiwetde enyịn̄ ye adres mbon oro idifiakde ikese, inyụn̄ ifiakde ika nte ikọdọhọde, mbon en̄wen ẹkeme ndinam kpasụk ntre. Edieke inamde utom nnyịn ima, iyanam nditọete nnyịn ẹnam n̄kọri n̄ko ke utom ukwọrọikọ mmọ.—2 Tim. 4:5.
4. Ntak emi ikpodụn̄ọrede se inamde ke ini ke ini?
4 Ntak emi mûdụn̄ọkede se esinamde ye se esitịn̄de ke ini ke ini unyụn̄ use nte emi ekemede nditụk mbon en̄wen? Nti uwụtn̄kpọ nnyịn ẹyenem Jehovah esịt ẹnyụn̄ ẹnam itịn̄ ukem ikọ oro apostle Paul eketịn̄de ete: “Mbufo ẹkabade ẹkpebe mi, kpa nte ami n̄kekpebede Christ.”—1 Cor. 11:1.