Ekebe Mbụme

◼ Ndi ọfọn mme esop m̀mê mme owo ẹda mme idiọn̄ọ oro esop Jehovah esidade?

Idiọn̄ọ edi enyịn̄ m̀mê mbiet oro ẹdade ẹsọp ẹdiọn̄ọ n̄kpọ mmemmem mmemmem. Idiọn̄ọ Watch Tower ke ẹda ẹdiọn̄ọ Watch Tower Bible and Tract Society of Pennsylvania ye mme n̄ka en̄wen oro esop Abasi adade anam n̄kpọ. Bible oro ẹkụbọrede edi idiọn̄ọ oro ẹsidude ke mme leta oro Christian Congregation of Jehovah’s Witnesses ewetde. Mme n̄ka en̄wen oro Mme Ntiense Jehovah ẹdade ẹnam n̄kpọ ẹnyene nsio nsio idiọn̄ọ.

Mme esop m̀mê mme owo ikpenyeneke ndida mme idiọn̄ọ m̀mê mme enyịn̄ esop Abasi oro ibet ẹnyịmede, m̀mê mme mbiet idiọn̄ọ m̀mê enyịn̄, ke Ufọkmbono Obio Ubọn̄ mmọ, ke obukpọk, ke mme leta, ke mme ọkpọkpọ n̄kpọ ye mme n̄kpọ ntre. Ndida mme idiọn̄ọ esop Abasi nnam n̄kpọ ntre ekeme nditịmede mbon ukara, mme asuanetop, ye mbon en̄wen. Ke adianade do, oro ekeme ndinam mme owo ẹkere ke n̄kọk itieutom ọnọ mme leta oro ẹkụtde mme idiọn̄ọ emi, m̀mê ke mmọ ẹnọ unyịme.

Owo ikpenyeneke ndida idiọn̄ọ Watch Tower m̀mê mbiet esie ke Ufọkmbono Obio Ubọn̄ oro ẹdibọpde idem okposụkedi edide Watch Tower enyene Ufọkmbono Obio Ubọn̄ oro. Owo idọhọke mme esop oro ẹnyenede mme Ufọkmbono Obio Ubọn̄ oro ẹma ẹkebọp ẹma, oro ẹnyenede idiọn̄ọ emi ẹsọsọp ẹkpụhọ mmọ, sia emi ekeme ndiyom ẹnam ikpọ ukpụhọde onyụn̄ ekeme ndidia ekese ini, ukeme, ye okụk. Nte ededi, ẹkpenyene ndinam ukpụhọde edieke se oyomde ẹnam edide ekpri, mîdinyụn̄ ikponke utom. Edieke ukpụhọde emi okponde, ẹkeme ndinam enye ke ini ẹyomde ndidiọn̄ Ufọkmbono Obio Ubọn̄ oro.