Mbono District Mme Ntiense Jehovah eke 2009
1. (a) Nso edidiọn̄ ke idinyene edieke idụkde mbono district ke ofụri usen ita oro? (b) Nso ndutịm ke ikpanam idahaemi?
1 Kpukpru nnyịn ke itie ibet mbono district eke 2009 ye ifet efen ndifiak nsop idem ọtọkiet ye ekemmọ mme anditoro Jehovah, oro “ẹkerede ẹban̄a unana mmọ ke n̄kan̄ eke spirit.” (Matt. 5:3) Sia usen Jehovah enen̄erede ekpere, nnyịn isịn udọn̄ inọ kpukpru owo ndidụk mbono emi ofụri usen ita man ẹbọ ọyọhọ ufọn ẹto inem inem itie ebuana nditọete ye nsịnudọn̄ edem mbiba man ẹsọn̄ọ ẹda ke mbuọtidem. (Zeph. 1:14) Nam mme andikpep ye mme eteutom ẹdiọn̄ọ ke mbono edi akpan ikpehe utuakibuot fo. Babak nam ndutịm fo ye unana ndịk nyụn̄ ben̄e edidiọn̄ Jehovah; enye iditreke ndin̄wam fi.—Isa. 50:10.
2. Idem edieke owo mîkotke nnyịn ididụk mbono ofụri ererimbot, nso ke ikeme ndidori enyịn ndikụt oro edinamde etie nte idụk mbono ofụri ererimbot?
2 Ikpọ Mbono Ofụri Ererimbot: Sia ẹdinịmde mme mbono emi ke ibat ibat idụt ye obio, mbon oro ẹnọde unyịme kpọt ẹkpedụk. Edieke itienede ndausụn̄ emi, owo idiwakke ikaha. (1 Cor. 14:40; Heb. 13:17) Nte ededi, ediwak mbono district ẹdibiet mbono ofụri ererimbot sia ediwak mme isụn̄utom, mbon oro ẹnamde utom Bethel ke esenidụt, ye mme asan̄autom ofụri ererimbot ẹdidụk mbono emi ke obio emana mmọ.
3. Didie ke ikeme ndiwụt ndusụk owo ke esop nnyịn ima Christian?
3 N̄wam Mbon En̄wen Ẹdụk: Ndi ndusụk owo ke esop mbufo ẹyom un̄wam man ẹdụk akamba mbono emi? Mbon inan akpan akpan ẹkeme ndiyom un̄wam man ẹdụk mbono Usem Idiọn̄ọ Mbon America, Benin City 7, emi ẹdinịmde ofụri ofụri ke Usem Idiọn̄ọ Mbon America. Ke ini an̄wamde mbon en̄wen ẹtiene ẹdụk, ọwọrọ ke “usehe uban̄a ọkpọkpọ mbubehe fo kpọt, edi ese aban̄a mbubehe mbon en̄wen n̄ko.”—Phil. 2:4.
4, 5. Edieke anade odụk akamba mbono oro owo mîdemeke esop mbufo isịn, nso ke akpanam?
4 Ndibụp N̄kpọ Mban̄a Mbono: Mbọk ẹbem iso ẹbụp ewetn̄wed esop mbufo mbụme oro ẹnyenede, man ẹsụhọde ibat ini oro ẹkotde n̄kọk itieutom ke urụk ukopikọ ẹbụp usen ye ebiet ẹdinịmde mbono.
5 Edieke oyomde ndidụk mbono emi mîdịghe enye oro ẹdemede esop mbufo ẹsịn, emekeme ndibọ Room Request Form. Wet n̄kpọ yọhọ babru emi nyụn̄ nọ ẹsọk nnennen adres oro odude ke edem Room Request Form eke ndondo emi. Ẹyesọp ẹnọ mme babru emi ẹsọk mme ewetn̄wed esop.
6. Nso ke ẹkpenam ke ini asuanetop emi enyenede san̄asan̄a idaha oyomde ẹn̄wam imọ ẹbọ ufọkidụn̄?
6 San̄asan̄a Un̄wam: Ke ini asuanetop oyomde ẹn̄wam imọ ẹbọ ufọkidụn̄, Kọmiti Utom Esop enyene ndibiere m̀mê enye odot ndiwet n̄kpọ nyọhọ ikpehe “Special Needs” ke Room Request Form. Mmọ ẹkpenyene ndidụn̄ọde ndausụn̄ oro ẹnọde ke babru oro mbemiso ewetn̄wed esop ọnọde babru emi ẹsọk Itieutom Unọ Ufọkidụn̄ Mbono.
7. (a) Didie ke ikpọbọ ufọkidụn̄? (b) Nso ke ikpeti emi edin̄wamde nnyịn inyene eti enyịn̄ ke ebiet ekededi emi nnyịn idụn̄de? (Se ekebe oro “Mme Item Ẹnọde Mme Andiyom Ufọkidụn̄.”)
7 Ufọkidụn̄: Edieke oyomde ufọkidụn̄ ke obio mbono onyụn̄ oyomde Itieutom Unọ Ufọkidụn̄ ẹn̄wam fi, mbọk nam se itienede mi:
◼ Bọ ewetn̄wed esop mbufo Room Request Form.
◼ Babak wet n̄kpọ yọhọ Room Request Form emi. Mbọk kụt ete ke ọmọnọ ọyọhọ ntọt aban̄a enyịn̄, isua emana, onyụn̄ owụt m̀mê owo oro oyomde itieidụn̄ edi eren m̀mê n̄wan, asiakusụn̄ m̀mê asuanetop. Ẹnyene ndiwet n̄kpọ ke mme Room Request Form ediye ediye ye nte ẹkemede ndikot.
◼ Ewetn̄wed esop ekpenyene ndise nnyụn̄ nsịn ubọk ke Room Request Form onyụn̄ ọnọ enye aka itie mbono, IDỊGHE n̄kọk itieutom. Ntak edi nte ke ubiatini ekeme ndidu edieke ebemde iso ẹnọ babru emi aka n̄kọk itieutom.
◼ Ẹkpenyene ndibabak nnọ mme Room Request Form ẹsọk Itieutom Unọ Ufọkidụn̄. Emi ọyọnọ itieutom emi ini oro ekemde ndiyom eti itieidụn̄ nnọ fi.
8. Didie ke nnyịn ndibere ye Itieutom Unọ Ufọkidụn̄ ekeme ndinam kpukpru owo ẹbọ ufọkidụn̄ ke mmemmem ekọmurua?
8 Nnyịn imọdiọn̄ọ ke idịghe kpukpru mme andidụk mbono ẹkeme ndidụn̄ ke dọmitri oro odude ke an̄wa mbono. Ndusụk owo ẹkeme ndiyom ndidụn̄ ke mme ufọkisen. Nte ededi, ke ini iyomde ndidụn̄ ke mme ufọkisen, ọkpọfọn ibụp Itieutom Unọ Ufọkidụn̄ m̀mê mmọ ẹma ẹbọbọ itie oro ẹnọ owo efen. Edieke edide ẹma ẹbọbọ itie oro, ọkpọfọn okoyom ufọk ke itie efen. Edieke eberede ye ndutịm emi, ayan̄wam kpukpru owo ẹnyene ufọk ke mmemmem ekọmurua.—1 Cor. 10:24.
9. Nso ikpenen̄ede ibehe nnyịn nte itịmde idem ndidụk mbono district eke 2009?
9 Mme Edinam Oro Adade Itoro Ọsọk Abasi: Ke ini ision̄ode mbun̄wụm spirit ke kpukpru n̄kpọ oro inamde, inen̄erede ikpeme nte itịn̄de ikọ inyụn̄ ikamade idem nnyịn ke ini inamde n̄kpọ ye mme enyene ufọkidụn̄ ye mbon en̄wen ke obio mbono, nnyịn iyetịp isịn ke eti enyịn̄ oro ikọt Jehovah ẹnamde inyụn̄ ifep ndinam mbon en̄wen ẹtuak ukot ẹduọn̄ọ. (1 Cor. 10:31; 2 Cor. 6:3, 4) Yak edidu fo ke itie mbono oro ye nte anamde n̄kpọ ada itoro ọsọk Abasi ke mme utọ usụn̄ emi ke mbono district eke 2009!—1 Pet. 2:12.
[Ekebe ke page 4]
Mme Ini Edinam:
Thursday (Mbono Ofụri Ererimbot Kpọt)
1:20 uwemeyo - 4:55 mbubreyo
Friday ye Saturday
9:20 usenubọk - 4:55 mbubreyo
Sunday
9:20 usenubọk - 4:00 mbubreyo
[Ekebe ke page 5]
Mme Item Ẹnọde Mme Andiyom Ufọkidụn̄:
◼ Ẹnyịme ndibọ itieidụn̄ oro Itieutom Unọ Ufọkidụn̄ ọnọde. Ẹkûdụn̄ ke mme ufọkidụn̄ an̄wa mbono edieke Itieutom Unọ Ufọkidụn̄ mîdọhọke mbufo ẹdụn̄ do. Ẹkûyak ibat owo oro ẹdụn̄de do awak akan se ẹkenyịmede.
◼ Ẹkûdụk mme itie oro ẹdọhọde mme owo ẹkûdụk ke itieidụn̄ oro mbufo ẹdude. Ẹtem udia n̄kukụre edieke ẹnyịmede ẹnam oro ye ke itie oro ẹdọhọde ẹtem.
◼ Kûnọ enyene-ebiet okụk awak akan se Itieutom Unọ Ufọkidụn̄ ọkọnọde man afo enyene itieidụn̄.
◼ Ke anamde ọkpọkpọ ndutịm man enyene itieidụn̄, mbọk bụp Itieutom Unọ Ufọkidụn̄ mbak afo udubọ ukem ufọkidụn̄ oro owo efen ọkọbọde.