Kpep Mbon Oro Mînen̄ekede Ifiọk Ndikot N̄wed
1. Nso n̄kpọ-nta ke ikeme ndisobo ke an̄wautom?
1 Ke utom ukwọrọikọ nnyịn, ndusụk ini imesisobo mme owo oro mînen̄ekede ifiọk ndikot n̄wed emi ẹyomde ikpep mmọ akpanikọ. Nso ke ikeme ndinam?
2. Didie, ndien ntak emi nnyịn ikpokponode mbon oro mînen̄ekede ifiọk ndikot n̄wed-e?
2 Wụt Mmọ Ukpono: Esịt owo edi akpan n̄kpọ ọnọ Jehovah, idịghe ukpep oro enye ọbọde ke ufọkn̄wed. (1 Sam. 16:7; N̄ke. 21:2) Ntre nnyịn isehe mbon oro mînen̄ekede ifiọk ndikot n̄wed ke usụhọde. Utọ mbon emi ẹkeme ndinyịme un̄wam oro inọde ke ini iwụtde mmọ ukpono inyụn̄ inyene ime. (1 Pet. 3:15) Emi ekeme ndiwọrọ nditre ndiyịre ke ana owo oro okot itie N̄wed Abasi m̀mê ikpehe ekikere. Nte owo emi akade iso ẹkpep mme ọsọn̄urua akpanikọ Bible, ekeme ndinen̄ede ndọn̄ enye ndikot n̄wed ọdọnọ man enyene idatesịt oro otode edikot Ikọ Abasi “ke uwemeyo ye ke okoneyo.”—Ps. 1:2, 3.
3. Mme usụn̄ unọ ukpep ewe ke ẹkeme ndida nnọ mbon oro mînen̄ekede ifiọk ndikot n̄wed ukpep?
3 Mme Usụn̄ Ndikpep Mme Owo Bible: Ndise ẹdi ata eti usụn̄ ndida n̄kpep mme owo n̄kpọ nnyụn̄ n̄n̄wam mmọ ẹti se mmọ ẹkpepde. Emekeme ndidọhọ eyen ukpepn̄kpọ etịn̄ n̄kpọ aban̄a ndise ke n̄wed ukpepn̄kpọ oro ẹkamade. Ekem bụp mme akpan mbụme oro ẹdin̄wamde enye ọdiọn̄ọ se ndise oro ekpepde. Kot mme itie N̄wed Abasi oro ẹkpepde ndusụk akpan n̄kpọ oro ẹdude ke ndise emi. Emekeme ndikama ndise emi n̄ko ndụn̄ọde ukpepn̄kpọ oro. Kûkpep n̄kpọ awak akaha ke ebe kiet. Sọn̄ọ tịn̄ ibuotikọ ye mme akpan n̄kpọ oro ẹdude ke ukpepn̄kpọ oro, kûnyụn̄ uda mme n̄kpọ oro mîdụhe ke n̄wed ukpepn̄kpọ udusịn. Kot nnennen to Bible nyụn̄ bụp mme mbụme man okụt ete ke se okokotde an̄wan̄a eyen ukpepn̄kpọ. Emi ekeme ndinam enen̄ede ọdọn̄ enye ndikot n̄wed ọdọnọ man enye ekeme ndidụn̄ọde akpanikọ Bible ke idemesie.
4. Didie ke nnyịn ikeme ndin̄wam eyen ukpepn̄kpọ Bible nnyịn okot n̄wed ọdọnọ?
4 Mme N̄kpọ Emi Ẹkemede Ndin̄wam Owo Okot N̄wed Ọdọnọ: Mme owo oro mînen̄ekede ifiọk ndikot n̄wed m̀mê oro mîkenyeneke ifet ndikpep nte ẹkotde n̄wed ọdọnọ ẹkeme ndimụm nnyụn̄ nti se ẹkpepde mmọ mfọn mfọn. Emekeme ndisịn udọn̄ nnọ utọ mbon emi ẹsibre ẹnyụn̄ ẹkpan̄ utọn̄ ẹnọ usan m̀mê ọkpọ umụm ikọ n̄wed nnyịn. Ndinen̄ede n̄kpan̄ utọn̄ n̄kop nte ẹkotde ke adan̄aemi enye etienede ese n̄wed oro, idem etienede okot ke nsụhọde-uyo, ayan̄wam enye okot n̄wed ọdọnọ. Mbiowo ẹkeme ndidiomi mme otu oro ẹkpepde nte ẹkotde n̄wed ẹnyụn̄ ẹwetde n̄kpọ. Nti ekikere emi ẹkeme ndin̄wam nnyịn ikpep mbon oro mînen̄ekede ifiọk ndikot n̄wed ẹdiọn̄ọ “ndisana uwetn̄kpọ” emi ẹkemede ndinam mmọ ẹnyene ọniọn̄ ẹbọ edinyan̄a.—2 Tim. 3:15.