Nte Ẹkpen̄wamde Mbon Oro Mîkemeke Ndikot N̄wed

1. Ndinịm ukpepn̄kpọ Bible ye mbon oro mîkemeke ndikot n̄wed esikama nso mfịna?

¹ Mme enyeneufọk oro mîkemeke ndikot n̄wed ẹkeme ndinyene udọn̄ ke ikọ Abasi, edi ndikot Bible ye mme n̄wed en̄wen ekeme ndinam mmọ ndịk. Ekeme ndidi ufọn ididụhe ndinọ utọ mme owo emi n̄wed Bible Ekpep ke ntọn̄ọ. Didie ke ikeme ndin̄wam mmọ ke n̄kan̄ eke spirit? Nnyịn ima ibụp mme asuanetop oro ẹtode nsio nsio idụt 20 se mmọ ẹsinamde. Kop se mmọ ẹtịn̄de mi.

2. Mme n̄wed ewe ẹfọn ndida n̄kpep owo oro mîkemeke ndikot n̄wed ye owo oro ekemede ndikot esisịt?

² Edieke eyen ukpepn̄kpọ mîkemeke ndikot n̄wed, afo emekeme ndida ediye uduot ekpri n̄wed Kpan̄ Utọn̄ Nọ Abasi m̀mê Kpan̄ Utọn̄ Nọ Abasi Nyụn̄ Du Uwem ke Nsinsi ntọn̄ọ ukpepn̄kpọ ye enye. Asiakusụn̄ kiet ke United States ama owụt owo kiet ndiye uduot n̄kpri n̄wed iba oro onyụn̄ obụp m̀mê ewe ke enye akpama ndikpep. N̄kọk itieutom ke Kenya ọdọhọ ke n̄wed iba emi ẹnen̄ede ẹfọn do sia ke Africa ẹsiwak ndida mbụk n̄kpep mme owo n̄kpọ utu ke nneme mbụme ye ibọrọ. Ke adan̄aemi mbon oro ẹfiọkde n̄wed ẹkemede ndisọsọp nnyịme ndikot n̄wed nnyụn̄ mbọrọ mme mbụme, mbon oro mîfiọkke n̄wed imaha utọ usụn̄ ukpepn̄kpọ emi. Edieke eyen ukpepn̄kpọ ekemede ndikot n̄wed esisịt, ediwak mme asuanetop ẹsima nditọn̄ọ ukpepn̄kpọ ye mmọ ke ndiye uduot n̄kpri n̄wed Eti Mbụk Emi Otode Abasi! m̀mê Afo Emekeme Ndidi Ufan Abasi!, mîdịghe ẹkama N̄wed Mi eke Mme Mbụk Bible.

3. Ndidiọn̄ọ nso mban̄a mbon oro mîkemeke ndikot n̄wed edin̄wam nnyịn ikpep mmọ n̄kpọ ọfọn?

³ Toro Mmọ: Mbon oro mîkemeke ndikot n̄wed esikop bụt, ndien ediwak mmọ ẹsikere ke mmimọ idikemeke ndikpep n̄kpọ. Akpa n̄kpọ emi ọfọnde ndinam man ikeme ndikpep mmọ akpanikọ edi ndin̄wam mmọ ẹtre ndikere ntre. Ediwak mbon oro mîkemeke ndikot n̄wed ẹnyene ifiọk ẹnyụn̄ ẹkeme ndikpep n̄kpọ. Kpono mmọ nyụn̄ nam n̄kpọ ye mmọ uku uku. (1 Pet. 3:15) Edieke mmọ ẹkụtde ke ukeme oro mmimọ isịnde enyene ufọn ye nte ke imanam n̄kọri ke n̄kan̄ eke spirit, mmọ ẹyema ndika iso n̄kpep n̄kpọ. Ke ntre, toro mmọ ke ubọk ke ubọk.

4. Didie ke ikeme ndisịn udọn̄ nnọ mbon oro mîkemeke ndikot n̄wed ẹtịm idem ẹnọ ukpepn̄kpọ mmọ?

⁴ Idem ọkpọkọm eyen ukpepn̄kpọ inen̄ekede ifiọk ndikot n̄wed, sịn udọn̄ nọ enye etịm idem eben̄e ukpepn̄kpọ esie. Ndusụk mme asuanetop ke South Africa ẹsisịn udọn̄ ẹnọ nditọ ukpepn̄kpọ mmọ ẹte ẹdọhọ owo ke ubon mmọ m̀mê ufan mmọ oro ekemede ndikot n̄wed ọfọn an̄wam mmọ. Asuanetop kiet ke Britain esisịn udọn̄ ọnọ nditọ ukpepn̄kpọ esie ẹtịm idem ẹben̄e ukpepn̄kpọ mmọ. Enye esinam emi ke ndiyak n̄wed esie nnọ mmọ ẹse ikpehe ekikere ifan̄ ke ini ukpepn̄kpọ man mmọ ẹkụt nte ememde utom ndisọp n̄kụt mme ibọrọ oro ẹduride udịm. Eyenete kiet ke India esisịn udọn̄ ọnọ nditọ ukpepn̄kpọ esie ete ẹse mme ndise ke ukpepn̄kpọ oro ẹdikpepde urua en̄wen ẹnyụn̄ ẹkere ẹban̄a se mmọ ẹwọrọde.

5. Didie ke ikeme ndinyene ime ke ini inịmde ukpepn̄kpọ?

⁵ Nyene Ime: Se ededi n̄wed oro akamade, sio mme akpan n̄kpọ wụt nyụn̄ nam mme n̄kpọ oro ẹtim ẹn̄wan̄a eyen ukpepn̄kpọ fo. Ọyọfọn ada minit 10 esịm 15 ke ntọn̄ọ enyene nneme ye enye. Kûkpep enye n̄kpọ awak akaha ke ebe kiet, ikpehe ekikere ifan̄ ekem. Nyene ime edieke eyen ukpepn̄kpọ mîkotke n̄wed isọp inua. Nte enye ọtọn̄ọde ndikụt se Jehovah anamde ọnọ enye, ekeme ndidi ọyọdọn̄ enye ndisịn idem n̄kpep ndikot n̄wed ọfọn. Man an̄wam eyen ukpepn̄kpọ fo anam oro, ọfọn ọdọhọ enye toto ke ntọn̄ọ ete esidụk mbono esop.

6. Didie ke ikeme ndin̄wam mme owo ẹfiọk nte ẹkpekotde n̄wed?

⁶ Edieke nditọ ukpepn̄kpọ Bible ẹkpepde ndikot n̄wed, mmọ ẹyesọp ẹnam n̄kọri ke n̄kan̄ eke spirit. (Ps. 1:1-3) Ediwak owo ẹsida minit ifan̄ ke utịt ukpepn̄kpọ kiet kiet ẹkpep nditọ ukpepn̄kpọ mmọ nte ẹkpekotde n̄wed. Edieke eyen ukpepn̄kpọ okopde mmemidem, afo emekeme ndisịn udọn̄ ọnọ enye ke nditịn̄ ndusụk n̄kpọ oro enye ekekemede ndikot. Nam enye ọfiọk ke Jehovah ayan̄wam enye ke ukeme oro enye esịnde nyụn̄ sịn udọn̄ nọ enye ndisibọn̄ akam mban̄a oro. (N̄ke 16:3; 1 John 5:14, 15) Ndusụk mme asuanetop ke Britain ẹsisịn udọn̄ ẹnọ nditọ ukpepn̄kpọ mmọ ndinịm mme utịt mbuba oro mmọ edikemede ndinam—ekeme ndidi ndifiọk ndikot abisi kiet kiet, ndikeme ndikụbọde ndusụk itie Bible ke idem mmọ n̄kot, ndien ke akpatre, ẹdomo ndikot mme n̄wed nnyịn oro ẹwetde ke mmemmem Ikọmbakara. Man in̄wam mme owo ẹkeme ndikot n̄wed, oyoyom isịn udọn̄ inọ mmọ ẹma ndisikot n̄wed, idịghe sụk ndikpep mmọ nte ẹkpekotde.

7. Ntak emi nnyịn mîkpetreke ndinam mbon oro mîkemeke ndikot n̄wed ẹfiọk akpanikọ?

⁷ Jehovah isisehe mbon oro mîfiọkke n̄wed ke usụhọde. (Job 34:19) Enye esidụn̄ọde owo esịt. (1 Chron. 28:9) Ntem kûtre ndinam mbon oro mîfiọkke ndikot n̄wed ẹfiọk akpanikọ. Afo emenyene ediwak nti n̄wed oro ekemede ndikama. Nte ini akade, afo emekeme ndikpụhọ n̄kama n̄wed Bible Ekpep onyụn̄ anam enye enen̄ede ọfiọk se idude ke N̄wed Abasi.