“Ẹben̄e Idem Ndinam Kpukpru Nti Utom”
1 Ke ini Jesus ọkọtọn̄ọde obufa ndutịm ukwọrọikọ, enye ama ada ini etịm mme mbet esie idem. (Matt. 10:5-14) Okposụkedi emi kpukpru nnyịn inyenede ekese ndinam, nnyịn ndida idem ọkpọkọm minit ifan̄ ntịm idem mbemiso ibuanade ke utom ukwọrọikọ eke ufọk ke ufọk ayan̄wam nnyịn ndinyene nti utịp.—2 Cor. 9:6.
2 Nte Ẹkpetịmde Idem: Eti ntịmidem ọtọn̄ọ ye owo ndimehe ye mme n̄wed oro enye oyomde ndinọ. Nnyịn ikpenyene n̄ko ndikere mban̄a mme owo oro ẹdude ke efakutom nnyịn. Nso idi mfịna mmọ? Nso ke mmọ ẹsikpep ke ido ukpono mmọ? Imekeme ndikpep n̄kpọ nto mme usụn̄ unyene nneme oro ẹsinọde ke Utom Obio Ubọn̄ Nnyịn ye n̄wed Reasoning From the Scriptures m̀mê ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible.
3 Ndinen̄ede n̄wụk ntịn̄enyịn ke mme nnamn̄wụt oro ẹnamde ke Esoputom ayan̄wam nnyịn n̄ko. Nte nnyịn inyenede mbufiọk ke ukwọrọikọ nnyịn, nnyịn idinen̄ekede ibiat ini nditịm idem. Nte ededi, kpukpru ini mbemiso iwọrọde an̄wautom, edieke nnyịn ikerede iban̄a se iditịn̄de inyụn̄ ikade iso idiọn̄ usụn̄ unyene nneme nnyịn, nnyịn iyenen̄ede inyene uforo. Ikpenyene n̄ko ndida esisịt ini nse m̀mê n̄kpọ ekem ke ekpat ukwọrọikọ nnyịn.
4 Nso idin̄wam nnyịn nditi se iduakde nditịn̄? Usụn̄ kiet nditi se nnyịn iyomde nditịn̄ edi ndikpep ukwọrọikọ nnyịn uyo ọwọrọ. Ndusụk owo ẹsima ndinam ndomonse ke ini ukpepn̄kpọ ubon mmọ. Mbon en̄wen ẹsikụt ke ọfọn ndiwet se mmimọ iditịn̄de ibio ibio ke ekpri n̄wed ẹnyụn̄ ẹse se ẹkewetde esisịt ini mbemiso ẹsịmde enyịnusụn̄ owo.
5 Ntak Enyenede Ufọn: Ndinen̄ede ntịm idem anam nnyịn inen̄ede inyene uforo ye idatesịt ke an̄wautom. Emi isiyakke idem enyek nnyịn esinyụn̄ an̄wam nnyịn imụm idem ikama ke ufọk owo. Enye n̄ko esin̄wam nnyịn ikeme ndinen̄ede nnọ enyeneufọk ntịn̄enyịn utu ke ndikere n̄kukụre mban̄a se iyomde nditịn̄. Adianade do, ndimehe ye n̄wed nnyịn ayan̄wam nnyịn nditịn̄ ikọ nsịn ufiop ke ini iyomde ndinọ n̄wed.
6 N̄wed Abasi esịn udọn̄ ọnọ nnyịn ‘ndiben̄e idem ndinam kpukpru nti utom.’ (Titus 3:1) Ewe utom ọfọn akan utom edikwọrọ eti mbụk? Ke ndinen̄ede ntịm idem, nnyịn iwụt ukpono inọ enyeneufọk oro enyịmede ndikpan̄ utọn̄, inyụn̄ iwụt ukpono inọ Jehovah, kpa Abasi emi nnyịn idade ke ibuot esie.—Isa. 43:10.