“Ẹmen Ọkpọnọ Mi Ẹkọn̄ọ ke Itọn̄ Mbufo”
1 Ke ererimbot emi mfịghe ye editịmede esịt ẹyọhọde, nnyịn emi iyerede ufiop ufiop ikot oro Jesus ọnọde imọbọ ata nduọkodudu ke ndimen ọkpọnọ esie n̄kọn̄ọ. (Matt. 11:29, 30) Ndinyịme ndimen ọkpọnọ oro owụtde ke idi mbet Jesus n̄kọn̄ọ esịne ndibuana ke utom emi akamade n̄kpọ-ata onyụn̄ ọnọde nduọkodudu. Enye abuana edikwọrọ eti mbụk Obio Ubọn̄ ye edin̄wam mbon en̄wen ẹtiene nnyịn ẹkụt nduọkodudu ke idak mmemmem ọkpọnọ Jesus.—Matt. 24:14; 28:19, 20.
2 Nduọkodudu Otode Edikwọrọ Ikọ: Jesus ikọdọhọke mme anditiene enye ẹmen mbiomo imọ ẹdian ye eke mmọ ẹbiom. Enye okokot mmọ ẹte ẹmen ndodobi mbiomo mmọ ẹdikpụhọ ye mfefere mbiomo imọ. Editịmede esịt ye unana idotenyịn editịm n̄kpọ emi idobike nnyịn mbiomo aba; nnyịn inyụn̄ ikpaha utom inọ mme inyene oro mînyeneke iwụk. (Luke 21:34; 1 Tim. 6:17) Okposụkedi emi nnyịn mînen̄ekede inyene ini onyụn̄ anade inam utom man inyene mme n̄kpọ oro iyomde ke usen ke usen, ata akpan n̄kpọ ke uwem nnyịn edi utuakibuot Abasi. (Matt. 6:33) Edieke inyenede nnennen ekikere iban̄a se idide akpan n̄kpọ ikan, nnyịn iyokụt ke utom ukwọrọikọ idobike owo mbiomo, edi akam ọnọnọ nduọkodudu.—Phil. 1:10.
3 Nte ido edide, nnyịn imesima nditịn̄ mban̄a se ededi oro esịt nnyịn amade. (Luke 6:45) Kpukpru mme Christian ẹnen̄ede ẹkere ẹban̄a Jehovah ye mme edidiọn̄ Obio Ubọn̄ oro enye ọn̄wọn̄ọde. Ke ntre, esinọ nduọkodudu didie ntem ndineme mban̄a “eti mbụk nti n̄kpọ” nnyụn̄ mfre mban̄a mfịna nnyịn ke ini ibuanade ke an̄wautom! (Rome 10:15) Nte ededi, nte nnyịn inamde n̄kpọ ke ubọk ke ubọk, ntre ke iditịm ifiọk ndinam n̄kpọ oro, ntre n̄ko ke idatesịt nnyịn edikpon. Mmọdo, edieke ikemede ndibiat ekese ini ke an̄wautom, nnyịn iyenen̄ede ikụt nduọkodudu. Ndien esinem nnyịn didie ntem ke ini mme owo ẹnyịmede ukwọrọikọ nnyịn! (Utom 15:3) Idem ke ini isobode mbon oro mînyeneke udọn̄ m̀mê mbon oro ẹbiọn̄ọde nnyịn, utom ukwọrọikọ ọyọnọ nnyịn nduọkodudu ke n̄kan̄ eke spirit edieke nnyịn itide nte ke utom nnyịn enem Jehovah esịt ye nte ke nti utịp ekededi oro inyenede edi edidiọn̄ esie.—Utom 5:41; 1 Cor. 3:9.
4 Ebede ke ndinyịme ikot Jesus, nnyịn imenyene ifet ndinam utom ye enye nte Mme Ntiense Jehovah. (Isa. 43:10; Edi. 1:5) Idụhe se ikemede ndinọ nduọkodudu n̄kan emi!