Dọn̄ Mbon Oro Ẹfụhọde Esịt
1. Ntak emi mbon oro ẹfụhọde ẹyomde ndọn̄esịt?
1 Esinen̄ede abiak mme owo ke ini n̄kpa adade owo oro mmọ ẹmade, akpan akpan mbon oro mînyeneke idotenyịn Obio Ubọn̄. (1 Thess. 4:13) Ediwak owo ẹsiwak ndikere ẹte: ‘Ntak emi mme owo ẹsikpade? Mmọ ẹsikpa ẹka m̀mọ̀n̄? Ndi nyafiak n̄kụt mmọ?’ Ẹnọ mme ekikere ke idak emi ẹban̄a nte ẹkemede ndinọ mbon oro nnyịn isobode ke an̄wautom ndọn̄esịt, emi ẹfụhọde n̄kpa iman m̀mê ufan mmọ.—Isa. 61:2.
2. Edieke enyeneufọk asiande nnyịn ke owo imọ akpa, ndi akpana isụk iyom usụn̄ ndinọ anyan ikọ ntiense?
2 To ke Enyịnusụn̄ Sịm Enyịnusụn̄: Enyeneufọk ekeme ndisian nnyịn ke owo akpa ke ufọk mmimọ. Ndi enye ke atatua? Ndi omokụt ediwak iman esie ke ufọk oro ẹtienede enye ẹfụhọ? Ke utọ idaha oro, ikpọfọnke ndinọ anyan ikọ ntiense. (Eccl. 3:1, 7) Ọkpọfọn ndiseme ye enye, ndinọ enye tract, magazine, m̀mê n̄wed ekededi oro odotde, ndien idọhọ ke imọn̄ inyọn̄. Ekem imekeme ndifiak n̄ka ini efen oro odotde man ikada Bible inen̄ede idọn̄ enye esịt.
3. Edieke idaha esie ayakde, mme itie N̄wed Abasi ewe ke ikeme ndikot nnọ owo emi ofụhọde?
3 Ke mme idaha efen, nnyịn imekeme ndikụt ke idiọkke ndisụk ntịn̄ ikọ esisịt ke akpa ediwaha. Okposụkedi emi mîdịghe ini ndida nnen̄ede mme ukwan̄ ekikere, nnyịn imekeme ndikot un̄wọn̄ọ Bible aban̄ade ediset ke n̄kpa nnọ mmọ. (John 5:28, 29) Mîdịghe imekeme ndineme se Bible etịn̄de aban̄a idaha mme akpan̄kpa. (Eccl. 9:5, 10) Ndiwụt mmọ nte ẹkenamde owo eset ke Bible ekeme ndidọn̄ mmọ esịt. (John 11:39-44) Usụn̄ efen edi ndikot ikọ emi anam-akpanikọ owo oro, Job eketịn̄de aban̄a idotenyịn oro enye enyenede ke Jehovah. (Job 14:14, 15) Mbemiso inyọn̄de, imekeme ndinọ ediye uduot ekpri n̄wed Nso Itịbe inọ Nnyịn ke Ini Nnyịn Ikpade?, Ke Ini Owo Oro Afo Amade Akpade, ekpri n̄wed efen, m̀mê tract oro odotde. Mîdịghe imekeme ndinọ n̄wed Bible Ekpep, iwụt mmọ se idude ke ibuot 6, inyụn̄ inam ndutịm ndineme ibuotikọ oro ke ini ifiakde isobo.
4. Tịn̄ mme ini efen oro nnyịn ikemede ndidọn̄ mme owo esịt.
4 Ke Mme Ini Efen: Edieke ẹnọde utịn̄ikọ ubụkowo ke Ufọkmbono Obio Ubọn̄, ndi mbon oro mînịmke ke akpanikọ ẹyetiene ẹdi? Ẹkeme ndinọ mmọ mme n̄wed oro ẹdọn̄de owo esịt. Ke ndusụk itie ubụkowo, mme owo ẹsima ndibọ mme n̄wed oro ẹdọn̄de owo esịt. Ke ndusụk ini, etop n̄kpa oro ẹkotde ke n̄wedmbụk n̄kpọntịbe esinam ẹwet ibio ibio etop ndọn̄esịt ẹnọ ẹsọk ubon oro owo mmọ akpade. Isan̄ kiet, ke owo emi n̄wan esie akakpade ọbọde leta emi ẹsịnde mme tract ke esịt, enye ama asan̄a ye eyen esie an̄wan aka ufọk asuanetop emi ọkọnọde mmọ leta emi okobụp ete: “Ndi mbufo ẹkenọ leta emi ẹda ẹsọk mi? Ọfọn, mmoyom ndifiọk n̄kpọ efen efen mban̄a Bible.” Ete oro ye eyen esie ẹma ẹnyịme ndikpep Bible ẹnyụn̄ ẹtọn̄ọ ndisidụk mme mbono esop.
5. Ntak emi nnyịn ikpodude ke edidemede man ikụt mme ifet oro ẹbererede ẹnọ nnyịn ndidọn̄ mbon oro ẹfụhọde esịt-e?
5 Ecclesiastes 7:2 ọdọhọ ete: “Ọfọn ndika ufọk ntuan̄a, akan ndika ufọk udia.” Owo emi ofụhọde esima ndikop Ikọ Abasi n̄kan adia-uwem-owo. Kpukpru nnyịn ikpenyene ndidu ke edidemede man ikụt mme ifet oro ẹbererede ẹnọ nnyịn ndidọn̄ mbon oro ẹfụhọde n̄kpa owo mmọ esịt.