Nte Ndutịm Ukpepn̄kpọ N̄wed Esop An̄wamde Nnyịn
1. Didie ke mbono esop ition oro nnyịn inyenede ke urua ke urua ẹsin̄wam nnyịn?
1 Ẹsida nsio nsio usụn̄ ẹnịm mbono esop ition oro nnyịn inyenede ke urua ke urua, mmọ ẹnyụn̄ ẹnyene nsio nsio uduak. Edi kpukpru mmọ ẹdi akpan n̄kpọ ke ndin̄wam nnyịn “ikere nte ikpedemerede kiet eken inọ ima ye nti utom.” (Heb. 10:24, 25) Nso idi ndusụk ikpehe ndutịm Ukpepn̄kpọ N̄wed Esop oro ẹdide n̄wọrọnda ẹnyụn̄ ẹnyenede ufọn?
2. Nso idi mme ufọn edisop idem ke ekpri otu ke Ukpepn̄kpọ N̄wed Esop?
2 An̄wam Nnyịn Ndikọri ke N̄kan̄ eke Spirit: Ibat mbon oro ẹsidụkde Ukpepn̄kpọ N̄wed Esop esinen̄ede ekpri akan ibat mbon oro ẹsidụkde mme mbono esop eken. Emi anam edi mmemmem n̄kpọ ndinam mme ufan oro ẹkemede ndin̄wam nnyịn ke n̄kan̄ eke spirit. (N̄ke 18:24) Nte afo emesịn ukeme ndidiọn̄ọ kpukpru owo ke otu Ukpepn̄kpọ N̄wed Esop mbufo, iso-ọfọn ọdọhọde owo mmọ kiet kiet asan̄a ye afo ke an̄wautom? Ndutịm Ukpepn̄kpọ N̄wed Esop n̄ko anam esenyịn Ukpepn̄kpọ N̄wed Esop ọfiọk nte n̄kpọ etiede ye owo kiet kiet ke otu oro enye esede enyịn, onyụn̄ ọnọ mmọ owo kiet kiet nsịnudọn̄.—N̄ke 27:23.
3. Didie ke ndutịm Ukpepn̄kpọ N̄wed Esop esisịn udọn̄ ọnọ mme owo ndinọ ibọrọ onyụn̄ esịn udọn̄ ọnọ nditọ ukpepn̄kpọ Bible nditiene nnyịn ndụk?
3 Nte omokot nditọ ukpepn̄kpọ Bible fo ẹditiene fi ẹdụk Ukpepn̄kpọ N̄wed Esop? Ekeme ndidi mbon oro ẹnyenede udọn̄, oro ẹsimen̄ede ndidụk ikpọ mbono esop nnyịn, idinen̄ekede ikop bụt ndidụk ekpri mbono esop, akpan akpan ke ufọk owo. Ufan ufan idaha oro esidude esinam edi mmemmem n̄kpọ mme uyen ye mbon oro ẹbuanade obufa obufa nditiene nnọ ibọrọ. Ndien sia mme owo mîwakke ke otu oro, nnyịn imesinyene ekese ifet nditoro Jehovah ebe ke ndinọ ibọrọ.—Ps. 111:1.
4. Ke mme usụn̄ ewe ke ndutịm Ukpepn̄kpọ N̄wed Esop ekeme ndifere owo ke idem?
4 Ẹsiwak ndinịm Ukpepn̄kpọ N̄wed Esop ke mme ebiet oro ẹfọnde ye mme owo ke efakutom. Ke adan̄aemi mîdịghe mmemmem n̄kpọ ndideme kpukpru owo ndọn̄ ke ebiet oro ẹkperede mmọ akan, ekeme ndiyom inam esisịt isan̄ man ikodụk Ukpepn̄kpọ N̄wed Esop ke ebiet oro ẹdemede nnyịn ẹsịn, ndien isan̄ emi isiyomke usụn̄ nte enye oro nnyịn isisan̄ade man ikodụk mme mbono esop eken. Ebiet oro ẹnịmde Ukpepn̄kpọ N̄wed Esop ekeme n̄ko ndidi eti itie ndisop idem nnọ mbono an̄wautom.
5. Didie ke nnyịn ikeme ndibọ un̄wam nto esenyịn Ukpepn̄kpọ N̄wed Esop ke an̄wautom?
5 An̄wam Nnyịn Ndibuana ke An̄wautom: Esenyịn Ukpepn̄kpọ N̄wed Esop enyene udọn̄ ndin̄wam owo kiet kiet ndibuana kpukpru ini ke an̄wautom ke usụn̄ oro on̄wụmde mfri onyụn̄ ọnọde idatesịt. Ke ntre, enye esidomo ndisan̄a ye kpukpru owo ke otu oro, ọnọde ọkpọkpọ un̄wam ke nsio nsio ikpehe an̄wautom. Edieke odude ikpehe an̄wautom oro ọsọn̄de fi, utọ nte edinam mfiakn̄ka, nam esenyịn Ukpepn̄kpọ N̄wed Esop mbufo ọfiọk. Enye ekeme ndinam ndutịm man asan̄a ye asuanetop oro enyenede mbufiọk ke otu mbufo. Afo emekeme ndifori ukeme fo ke ndinịm ukpepn̄kpọ Bible ebe ke ndinen̄ede ntịn̄ enyịn nse eti usụn̄ unọ ukpep oro esenyịn Ukpepn̄kpọ N̄wed Esop esidade enịm ukpepn̄kpọ.—1 Cor. 4:17.
6. Ntak emi nnyịn ikpọbọde ọyọhọ ufọn ito ndutịm Ukpepn̄kpọ N̄wed Esop?
6 Nso edidiọn̄ ke Ukpepn̄kpọ N̄wed Esop edi ntem! Ima ima ndutịm oro Jehovah anamde mi an̄wam nnyịn ndika iso nsọn̄ idem ke n̄kan̄ eke spirit ke n̄kpọsọn̄ ini oro nnyịn idude uwem mi.—Ps. 26:12.