Obufa Ndutịm Mbono Esop
1, 2. Mme ukpụhọde ewe ke ẹdinam ke mme mbono esop ọtọn̄ọde ke January 2009?
1 Ẹma ẹnọ nditọete ke ofụri ererimbot akpan ntọt ke urua April 21-27, 2008. Ẹkedọhọ ẹte: “Ọtọn̄ọde ke January 1, 2009, ẹdisinịm Ukpepn̄kpọ N̄wed Esop ke ukem usen oro ẹnịmde Ufọkn̄wed Utom Ukara Abasi ye Esoputom. Owo idikotke enye aba Ukpepn̄kpọ N̄wed Esop edi ẹdikot Ukpepn̄kpọ Bible Esop.”
2 Ndutịm Mbono Esop Eke Urua ke Urua Emi: Ofụri ini mbono esop, esịnede ikwọ ye akam, edidi hour kiet ye minit 45. Ẹdida ikwọ ye akam (min. 5) itọn̄ọ mbono esop emi, ekem Ukpepn̄kpọ Bible Esop (min. 25) eyetiene. Ke oro ebede, Ufọkn̄wed Utom Ukara Abasi (min. 30) eyetiene. Ekem, ẹyekwọ ikwọ (min. 5) ndida ntọn̄ọ Esoputom (min. 35). Ẹdida ikwọ ye akam (min. 5) iberi mbono esop emi. Ẹyemịn̄ ndutịm Ukpepn̄kpọ Bible Esop, Ufọkn̄wed Utom Ukara Abasi, ye Esoputom ke Utom Obio Ubọn̄ Nnyịn ke ọfiọn̄ ke ọfiọn̄ man ẹn̄wam fi etịm idem ọnọ mme mbono esop emi.
3. Ẹdinịm Ukpepn̄kpọ Bible Esop didie?
3 Ukpepn̄kpọ Bible Esop: Ẹdinịm mbono esop emi ukem nte ẹsinịmde Ukpepn̄kpọ Enyọn̄-Ukpeme. Ufọn ididụhe ndibem iso ndụn̄ọde se ẹkekpepde ke urua emi ekebede. Utu ke oro, ẹdida ibio ibio ntọn̄ọikọ iberede mbono esop emi. Emi ayanam mbon oro ẹdụkde ẹnyene ini oro ekemde ndinọ mbio mbio ibọrọ. Esenyịn oro etiede ibuot edinọ mbiowo usen emi mmọ ẹdinịmde mbono esop emi, ebiowo kiet urua kiet.
4. Esoputom edikpụhọde adan̄a didie?
4 Esoputom: Esoputom edisụk etie nte etiede idahaemi, edi edinyene mbio mbio ikpehe. Mme Ntọt ẹdisidi minit ition. Emi eyekem se ẹdade ẹnọ mme akpan ntọt ẹnyụn̄ ẹkot ndusụk leta emi ẹtode n̄kọk itieutom. Amaedi mme utọ ntọt nte ndutịm an̄wautom, edinịm Ufọkmbono Obio Ubọn̄ asana, ntọt ibatokụk, ye mme leta ofụri ini oro ẹsitode n̄kọk itieutom ẹdi, owo ididaha ke mbot utịn̄ikọ ikot mmọ edi ẹdidian mmọ ke obukpọk ntọt man nditọete ẹkpekot. Mbon oro ẹnọde n̄kpọ ẹnam ẹkpenyene nditịm idem ọfọn ẹnyụn̄ ẹtịm ẹkpeme ini ye mme item oro ẹnọde.
5. Ẹdinịm mbono esop didie ke urua oro esenyịn circuit edide?
5 Edidi Esenyịn Circuit: Owo idinamke ukpụhọde ke ndutịm urua edidi esenyịn circuit. Ke Tuesday, ẹyenịm Ufọkn̄wed Utom Ukara Abasi ye Esoputom ndien ekem ẹkwọ ikwọ. Ke oro ebede, esenyịn circuit ọyọnọ utịn̄ikọ ke minit 30. Nte ẹsụk ẹnamde idahaemi ke enye akade ndise esop, ẹdinịm Ukpepn̄kpọ Bible Esop usen en̄wen ndien ke ẹma ẹkekwọ ikwọ, esenyịn circuit ọyọnọ utịn̄ikọ utom. Ẹdida ikwọ ye akam iberi mbono esop emi.
6. Nso ididi utom esenyịn otu?
6 Mme Mbono An̄wautom: Otu mbiowo ẹyemek mme esenyịn otu man ẹse ẹban̄a mme otu an̄wautom ẹnyụn̄ ẹbọk mbon oro ẹdude ke otu mmọ. Edieke edide asan̄autom unamutom ese aban̄a emi, ẹdikot enye “asan̄autom otu.”
7. Nso ke nnyịn ikeme ndidori enyịn mban̄a ke obufa ndutịm mbono esop emi?
7 Se inemede emi owụt ke iyokop inem eti ndutịm udia eke spirit oro edin̄wamde nnyịn ikọri ke n̄kan̄ eke spirit. Emi ayanam nnyịn ikụt unen nte mme ọkwọrọikọ ye mme andikpep oro ẹbọde ukpep man utom ukwọrọikọ nnyịn enen̄ede on̄wụm mfri.—Eph. 4:13, 14; 2 Tim. 3:17.
8. Didie ke edibem iso ntịm idem edinyene ufọn ọnọ nnyịn ye mbon en̄wen?
8 Ndibem iso ntịm idem nnọ mme mbono esop emi ayan̄wam nnyịn inọ ntịn̄enyịn ke mme akpan n̄kpọ oro ẹsiode ẹwụt ke mbono esop kiet kiet. Kpukpru nnyịn iyenyene ifet ndisitiene nnọ ibọrọ nnyụn̄ ntịp nsịn ke nsịnudọn̄ eke otode edem mbiba. (Rome 1:11, 12; Heb. 10:24) Nnyịn ikpenyene ‘nditịm nsiak ikọ akpanikọ’ man otodo ‘kpukpru owo ẹkpekụt n̄kọri nnyịn.’—1 Tim. 4:15; 2 Tim. 2:15.
9. Nso ke nnyịn ibiere ndinam, ndien ntak-a?
9 Akwa ukpụhọde emi ke mme mbono esop nnyịn enen̄ede adat nnyịn esịt. Ẹyak nnyịn ika iso itiene ndausụn̄ emi “ofụn emi anamde akpanikọ onyụn̄ enyenede ọniọn̄” ọnọde, inyụn̄ isọn̄ọ iyịre ye Akwa Ekpemerọn̄ nnyịn nte enye etịmde nnyịn idem man ibọhọ akwa “ukụt” emi enen̄erede ekpere.—Matt. 24:21, 45; Heb. 13:20, 21; Edi. 7:14.