Ndi Emetịm Idem Eben̄e Afanikọn̄?
1. Ntak emi owụtde eti ibuot nditịm idem mben̄e afanikọn̄?
1 Kpukpru isua, ediwak miliọn owo ke ofụri ererimbot, ẹsịnede ediwak nditọete nnyịn iren ye iban, ẹsibọ ufen ke ntak unyekisọn̄ ye ukwọ, ndutịme mbio obio, mme afanikọn̄ ubọkowo eken ye mme oto-obot afanikọn̄. Mme edinam oyomonsia m̀mê mme ekọn̄ ẹkeme nditịbe ke ebiet ekededi.
2. Nso mbuọtidem ke mme asan̄autom Jehovah ẹnyene?
2 Okposụkedi emi mme idaha ẹkemede ndidọdiọn̄ ndiọk, inaha mme asan̄autom Abasi ẹyak ndịk m̀mê editịmede esịt emen mmọ emen. Nte mbon oro ikpepde Bible, nnyịn imenen̄ede ifiọk se mme n̄kpọntịbe ererimbot emi ẹwọrọde ye ini emi nnyịn idude uwem. (2 Tim. 3:1, 13) Jehovah Abasi nnyịn ọn̄wọn̄ọ ke imọ idiyakke n̄kpọ anam ikọt imọ ke n̄kan̄ eke spirit. Ke uwụtn̄kpọ, enye ayan̄wam nnyịn ibọhọ ndiọkn̄kan afanikọn̄, kpa akwa ukụt, emi edisịmde ofụri ererimbot. Ke oro ebede, mbon oro ẹdibọhọde ẹyenyene mme edidiọn̄ Obio Ubọn̄ ke nsinsi. (Isa. 14:7) Mbemiso ini oro, mme afanikọn̄ ubọkowo ye mme oto-obot afanikọn̄ ẹdisụk ẹdodu. Sia mme afanikọn̄ ubọkowo ye mme oto-obot afanikọn̄ ẹsitịbede ke mbuari ẹnyụn̄ ẹkemede ndinọmọ owo nnyịn ekededi, owụt eti ibuot ndidu ke mben̄eidem.—N̄ke 21:5.
3. Anie enyene ndibiere m̀mê akpana ẹfehe ẹkpọn̄ ebiet oro afanikọn̄ etịbede?
3 Mbemiso Afanikọn̄ Etịbede: Ndusụk ini, ukara ẹsinam mme owo ẹfiọk ke n̄kpọ ọmọn̄ ẹtịbe. Ọfọn ẹkpan̄ utọn̄ ke ini ẹnọde utọ ntọt oro. (N̄ke 22:3) Ke mme utọ idaha oro, mbiowo ẹyedomo ndisobo ye kpukpru owo ke esop man ẹn̄wam mmọ ẹtịm idem nte ẹyomde. Mbiowo ẹkpenyene ndinọ ntịn̄enyịn akpan akpan ke se itịbede ke n̄kann̄kụk man ẹteme mme asuanetop se ẹkpenamde. Nte ededi, mbiowo inyeneke ndibiere se mbon en̄wen ẹkpenamde ke afan̄ emi ikponyụn̄ inyịkke mme asuanetop ẹnam se mmọ ẹbierede. Ntre, ikpanaha owo ndomokiet ebet tutu mbiowo m̀mê n̄kọk itieutom ẹnọ uyo mbemiso enye ọkpọn̄de ebiet emi afanikọn̄ oyomde nditịbe. Edieke afanikọn̄ etịbede, owo kiet kiet enyene ndibiere m̀mê iyefehe ika ebiet en̄wen m̀mê idifeheke. Owo ndomokiet ikpenyịkke owo ekededi ite osụhọde etie ke ebiet ekededi, m̀mê ndinyịk enye nte efehe aka ebiet en̄wen edieke enye mîben̄eke idem ndinam oro.—Gal. 6:5.
4. Nso ke ikpanam edieke ndutịme mbio obio m̀mê mme edinam oyomonsia ẹtịbede ke edem nnyịn?
4 Ndutịme mbio obio ye mme edinam oyomonsia ẹsiwak nditịbe ke mbuari. Bible ọdọhọ nnyịn inam n̄kpọ ye mbufiọk inyụn̄ idu ke ukpeme kpukpru ini. (N̄ke 27:12) Mmọdo, nnyịn owo kiet kiet ikpenyene ndika iso n̄kama enyịn nse nte n̄kpọ etiede ke n̄kann̄kụk nnyịn. Nnyịn imodori enyịn ke owo kiet kiet ayanam nnennen n̄kpọ man anyan̄a uwem mme owo edieke oyomde ẹnam oro. Emi ekeme ndiyom owo ọwọrọ ọkpọn̄ ebiet emi mfịna odude, edieke enye ekemede, aka ebiet emi mfịna mîdụhe tutu n̄kpọ afiak ana sụn̄. Esịt enem nnyịn ndifiọk ke ediwak nditọete ẹnanam emi kpa ye oro inyene mmọ ẹtakde. Uwem nnyịn ọsọn̄ urua akan inyene. (Luke 12:15) Edieke owo mîfeheke ikpọn̄ ebiet oro afanikọn̄ odude ke ntak inyene, ọwọrọ ke enye idaha uwem ke akpan n̄kpọ.
5. Edieke idụn̄de ke ebiet emi afanikọn̄ esiwakde nditịbe, didie ke ikpebere ye mbiowo?
5 Edieke esop odude ke ebiet emi afanikọn̄ esiwakde nditịbe, mîdịghe edieke edide enyene se inamde ẹnịm ke ndutịme mbio obio m̀mê mme mfịna efen ẹmọn̄ ẹtịbe, mbiowo ẹkeme ndidọhọ mme asuanetop ẹnọ enyịn̄ ye nọmba telefon iman m̀mê ufan mmọ oro odụn̄de ke ebiet efen, emi ẹkpekotde ke ini mbabuat n̄kpọntịbe. Emi ayan̄wam mbiowo ẹfiọk ebiet emi mbon oro ẹwọrọde ẹkpọn̄ itie afanikọn̄ ẹdude. Mbiowo ẹkeme ndinam ndutịm esop ndinyene utọ n̄kpọ nte babru emi ẹwetde mme akpan n̄kpọ oro ẹkpemende ke ini mbabuat n̄kpọntịbe, ẹnam ndutịm kaban̄a nte ẹdisan̄ade ẹwọrọ ẹkpọn̄ itie afanikọn̄, ye nte ẹdisan̄ade ẹn̄wam mbon oro ẹyomde san̄asan̄a un̄wam. Ọfọn ẹbere ye ima ima ndutịm emi.—Heb. 13:17.
6. (a) Nso ke ikpanam edieke afanikọn̄ etịbede ke edem nnyịn? (b) Ntak emi ikpasiande mbiowo obufa adres ye nọmba telefon nnyịn?
6 Ke Afanikọn̄ Ama Eketịbe: Nso ke akpanam edieke afanikọn̄ etịbede m̀mê ndutịme mbio obio ọtọn̄ọde ke edem mbufo? Kụt ete ke emese aban̄a n̄kpọ obụkidem oro mbonubon fo ẹyomde ini oro. N̄wam mbon en̄wen oro unọmọ ẹsịmde adan̄a nte ekekeme. Domo ndisobo ye esenyịn otu an̄wautom mbufo m̀mê ebiowo efen usọp usọp nte ekekeme. Nam emi ekpededi unyeneke mfịna unyụn̄ uyomke un̄wam. Edieke oyomde un̄wam, fiọk ete ke nditọete fo ke ẹdomo ofụri ukeme mmọ ndin̄wam fi. (1 Cor. 13:4, 7) Ti ete ke Jehovah ọfiọk nte n̄kpọ etiede ye afo; beri edem ke enye kaban̄a un̄wam. (Ps. 37:39; 62:8) Ben̄e idem ndida mme ifet oro ẹbererede nsọn̄ọ mbon efen idem ke n̄kan̄ eke spirit nnyụn̄ ndọn̄ mmọ esịt. (2 Cor. 1:3, 4) Mbiowo ẹyedomo n̄ko ndiyom kpukpru mbon oro ẹsibuanade ye esop man ẹfiọk m̀mê mmọ ẹma ẹbọhọ unọmọ oro ẹnyụn̄ ẹfiọk utọ un̄wam oro mmọ ẹyomde. Ekeme ndibiat ini emi ẹkpedade ẹnam akpan n̄kpọ edieke mbiowo mînyeneke obufa adres ye nọmba telefon nditọete. Mmọdo, ọfọn mme asuanetop ẹsian ewetn̄wed esop ye esenyịn otu an̄wautom mmọ obufa adres ye nọmba telefon mmọ.
7. Didie ke ikpese iban̄a idem nnyịn ke n̄kan̄ eke spirit ke adan̄aemi idude ke ebiet oro ifehede ika?
7 Ke Adan̄aemi Odude ke Ebiet Oro Efehede Aka: Ke ebiet ekededi oro ifehede ika ke ini afanikọn̄, ana ika iso ise iban̄a idem nnyịn ke n̄kan̄ eke spirit inyụn̄ ika iso isọn̄ọ ida ke mbuọtidem. Edieke enen̄erede ọsọn̄ ndidụk mme mbono esop ke Ufọkmbono Obio Ubọn̄ ke mme utọ ini oro, mme asuanetop ẹkeme ndisop idem ke n̄kpri otu, utọ nte otu an̄wautom, nneme ndutịm mbono esop urua oro, edieke ẹkemede. Edi edieke mbufo mîkemeke ndinam emi, ẹmekeme ndineme ndutịm mbono esop urua oro ke mbubreyo Utuakibuot Ubon tutu n̄kpọ afiak ana sụn̄ ndien mbufo ẹkeme ndifiak nnịm mme mbono esop nte ẹkesinịmde. Ke utọ ini ntem, akpana kpukpru mbufo ẹka iso ẹda mbufiọk ẹbuana “eti mbụk eti n̄kpọ” ye owo ekededi emi edimade ndikop. (Isa. 52:7) Ke ọfiọn̄ okụrede, asuanetop kiet kiet ekpenyene ndiyom usụn̄ nnọ ibatutom an̄wautom esie nnennen ẹsọk ewetn̄wed esop m̀mê esenyịn otu an̄wautom m̀mê eyenete emi esin̄wamde enye. Ntem ke nnyịn idinam utom nnyịn emi edide ‘ndikwọrọ ikọ ke ini eke ọfọnde ye ke ini afanikọn̄.’—2 Tim. 4:2.
8. Didie ke mme Christian ẹsinam n̄kpọ ke ini ẹkopde ke afanikọn̄ m̀mê ndutịme ọmọn̄ etịbe?
8 Ke adan̄aemi mbon ererimbot ẹsitịmerede esịt ke ini ẹkopde ke afanikọn̄ m̀mê ndutịme ọmọn̄ etịbe, ndịk inamke nnyịn iban̄a ini iso. Ibịghike kpukpru afanikọn̄ ẹdidi n̄kpọ eset. (Edi. 21:4) Kan̄a ke emi, nnyịn imekeme ndinam n̄kpọ man idu ke mben̄eidem inọ mme ini afanikọn̄ ke adan̄aemi ikade iso ndisịn ifịk ntan̄a eti mbụk nnọ mbon en̄wen.
[Ekebe ke page 6]
Mme N̄kpọ Ndinam man Itịm Idem Iben̄e Afanikọn̄:
• Bon mme n̄wed akpan n̄kpọ ke ebiet oro edikemede ndisọp mmen n̄wọrọ n̄kpọn̄ ebiet oro afanikọn̄ etịbede.
• Kụt ete emenyene mme n̄kpọ oro edikemde ke usen ition utọ nte udia, ibọk, ye edin̄wọn̄ mmọn̄ oro ekemede n̄ko ndimen ke ini ọwọrọde ọkpọn̄ ebiet oro afanikọn̄ etịbede.
• Ben̄e idem ndikpọn̄ ebiet oro afanikọn̄ etịbede nyụn̄ fiọk ebiet emi edikade.
• Tiene ndausụn̄ ukara n̄kann̄kụk ye mbiowo.