Dụri Ntịn̄enyịn Wụt “Un̄wana Ererimbot”
1. Ewe akwa un̄wana ke Ikọ Abasi ekebem iso etịn̄ aban̄a, ndien ewe edinam enen̄ede odụri ntịn̄enyịn owụt un̄wana emi?
1 Jehovah ama ada prọfet Isaiah ebem iso etịn̄ ete: “Mbio oro ẹkesan̄ade ke ekịm ẹkụt akwa un̄wana: amaedi mmọ eke ẹketiede ke isọn̄ mfụt n̄kpa, un̄wana ayama ọnọ mmọ.” (Isa. 9:2) Ẹma ẹkụt “akwa un̄wana” oro ke edu uwem Eyen Abasi, kpa Jesus Christ. Utom esie ke adan̄aemi enye okodude ke isọn̄ ye mme edidiọn̄ oro uwa esie adade edi ama edemede udọn̄ mbon oro ẹkedude ke ekịm ke n̄kan̄ eke spirit. Utọ un̄wana oro ke mbon eyo nnyịn emi odude ke ekịm mi ẹyom. Udia Mbubreyo Ọbọn̄ ọnọ nnyịn san̄asan̄a ifet ndidụri ntịn̄enyịn mme owo n̄wụt “un̄wana ererimbot.” (John 8:12) Isua oko, ediwak miliọn owo ẹma ẹwụt ke imenyene mbuọtidem ke ndidiana ye nnyịn nnam ewụhọ Jesus oro: “Ẹka iso ẹnam emi nditi mi.” (Luke 22:19) Nte edinam Editi isua emi asan̄ade ekpere, didie ke nnyịn ikeme ndidụri ntịn̄enyịn mme owo n̄wụt akwa un̄wana oro Jehovah anamde ayama?—Phil. 2:15.
2. Didie ke nnyịn ikeme ndinen̄ede n̄wụt esịtekọm mban̄a uwa ufak, ndien nso utịp ke emi edida edi?
2 Ẹwụt Esịtekọm: Ini Editi edi eti ifet nditie n̄kere mban̄a akwa ima oro Jehovah ye Jesus ẹkewụtde ke ndinọ ubonowo uwa ufak. (John 3:16; 2 Cor. 5:14, 15) Eyịghe idụhe nte ke ndinam emi ayanam nnyịn idọdiọn̄ iwụt esịtekọm inọ edisana edinam emi. Ọyọfọn kpukpru ikọt Abasi ndisio ini nnịm man ẹkot ẹnyụn̄ ẹtie ẹkere ẹban̄a san̄asan̄a edikot Bible eke Editi nte ẹwụtde ke Ẹdụn̄ọde N̄wed Abasi ke Usen ke Usen. Ndikere mban̄a mme anana-mbiet edu Jehovah emi ẹnen̄erede ẹkụt ke enye ndinọ ufak anam esịt enem nnyịn ndinyene enye nte Abasi nnyịn. Nditịm n̄kere mban̄a se ufak emi ọwọrọde ọnọ nnyịn owo kiet kiet ayanam nnyịn inen̄ede ima Abasi ye Eyen esie, onyụn̄ onụk nnyịn ndisịn ofụri ukeme nnam uduak Abasi.—Gal. 2:20.
3. Didie ke nnyịn ikeme ndiwụt esịtekọm mban̄a Editi?
3 Edieke nnyịn iwụtde ntotụn̄ọ esịtekọm inọ ndutịm edinyan̄a oro Jehovah anamde, nditọ ukpepn̄kpọ Bible, mme mfiakn̄ka, mme iman, mme mbọhọidụn̄, mme nsan̄a ufọkn̄wed, mme nsan̄autom, ye mbon efen oro nnyịn ikotde ẹdi akpan edinam emi ẹyekụt ifiopesịt oro inyenede inọ Editi emi. (Luke 6:45) Ke ntre, sịn ọkpọsọn̄ ukeme ndikot kpukpru mmọ, ọnọde n̄wedikot Editi man mmọ edifre edinam emi. Man ẹkûfre owo ndomokiet, ediwak owo ẹsiwewet enyịn̄ mbon oro mmọ ẹsikotde ẹdi Editi, ẹnyụn̄ ẹdian mbufa enyịn̄ ke isua ke isua. Ndinam emi ke usụn̄ oro ọfọnde, nnyụn̄ nsịn ofụri ukeme ndikot mbon oro ẹnyenede udọn̄ oyowụt esịtekọm oro nnyịn inyenede inọ Jehovah Abasi “ke ntak enọ mfọn esie oro owo mîkemeke ndibụk.”—2 Cor. 9:15.
4. Nso ikeme ndin̄wam nnyịn ndisịn ekese ini ke an̄wautom ke March ye April?
4 Sịn Ekese Ini ke An̄wautom: Nte emekeme ndisịn ekese ini ke an̄wautom ke March ye April? Ndidomo ndibuana “un̄wana ubọn̄ ubọn̄ eti mbụk emi aban̄ade Christ” ye mbon en̄wen iditreke ndida edidiọn̄ Abasi ndi. Jehovah, kpa ebiet emi kpukpru un̄wana eke spirit ẹtode, okowụk ete: “Yak un̄wana ayama ke ekịm.” (2 Cor. 4:4-6) Edieke ẹdiyomde, mbiowo ẹyediomi mme mbono an̄wautom ke mme ini ye ebiet efen efen, ẹnyụn̄ ẹda usụn̄ ke ndinọ mme asuanetop oro ẹyomde ndisịn ekese ini ke an̄wautom ibetedem. Emi ekeme ndisịne unọ ikọ ntiense efak ke ntọn̄ọ ntọn̄ọ usenubọk, mîdịghe ndinam ndutịm nnọ edinọ ikọ ntiense to ke enyịnusụn̄ sịm enyịnusụn̄ ke ntọn̄ọ ntọn̄ọ mbubịteyo emi ediwak owo ẹsidude ke ufọk. Man ekeme ndisịn ekese ini ke an̄wautom, nịm ibat hour oro edikemede ndinọ, nyụn̄ domo ukeme ndisịm utịtmbuba oro. Ediwak owo ẹsinam utom usiakusụn̄ unọ un̄wam nte usụn̄ kiet ndinọ Jehovah mfọnn̄kan inyene.—Col. 3:23, 24.
5. Didie ke ediwak owo ẹbọ ufọn ẹto usụhọde ibat hour oro ẹyomde ẹto mme asiakusụn̄ unọ un̄wam?
5 Nte Afo Emekeme Ndinam Usiakusụn̄ Unọ Un̄wam? N̄kpọ nte isua itiaba ebe idahaemi tọn̄ọ nte ẹkesụhọde ibat hour oro ẹyomde ẹto mme asiakusụn̄ unọ un̄wam. Ukpụhọde emi anam ediwak mbon efen ẹtiene ẹnyene edidiọn̄ oro utom usiakusụn̄ unọ un̄wam akamade. Ndi emesibuana ke utom emi? Edi ido ndusụk owo ndinam ntre kpukpru isua. Ediwak mme asuanetop ke ediwak esop ẹsibọ babru eben̄e ndinam utom emi, ndien emi esikabade edi akpan iso utom oro esop akanamde ke isua oro. Nte emekeme ndinam ndutịm man abuana ke idara idara utom usiakusụn̄ unọ un̄wam ke ini Editi? April edidi ata eti ọfiọn̄ ọnọ ndusụk owo, sia enye enyenede utịt urua ition.
6. Nso aduai-owo-idem ndutịm ke ẹnam?
6 Ndi esenyịn circuit edidi esop mbufo ke March m̀mê April? Edidiọn̄ efen efen ekeme ndisịm fi. Nte ẹma ẹkebebem iso ẹtọt, ke isua utom 2006, kpukpru mme asiakusụn̄ unọ un̄wam ke ọfiọn̄ oro esenyịn circuit edidide ẹyedụk akpa ikpehe mbono oro ẹsinịmde ye mme asiakusụn̄ ke urua oro. Eyịghe idụhe nte ke ntọt oro esisọn̄ọde owo idem ke n̄kan̄ eke spirit emi ẹsinọde ke mbono oro ayan̄wam ediwak mme asiakusụn̄ unọ un̄wam ndinam se ẹkemede man ẹkabade ẹdi mme asiakusụn̄ ofụri ini. Ke adianade do, ke March nnyịn iyokop idatesịt ndin̄wam mme owo ẹdidụk un̄wana Abasi ebe ke ndikpep obufa n̄wed ukpepn̄kpọ oro Nso ke Bible Enen̄ede Ekpep? Ntak mûnamke edi utịtmbuba fo nditọn̄ọ ukpepn̄kpọ Bible ke obufa n̄wed emi?
7, 8. (a) Nso ikeme ndin̄wam nnyịn inam ndutịm inọ utom usiakusụn̄ unọ un̄wam? (b) Didie ke ubon ndidiana kiet ekeme ndin̄wam, ndien didie ke ofụri ubon ẹdibọ ufọn?
7 Nte afo ekerede aban̄a hour 50 oro ẹyomde ẹto mme asiakusụn̄ unọ un̄wam, nam ndutịm oro ediyakde fi anam un̄wana akpanikọ ayama ke n̄kpọ nte hour 12 kpukpru urua. Nyene nneme ye mbon oro ẹkekụtde unen ke ndinam emi, nyụn̄ neme ye mbon efen n̄ko. Nneme emi ekeme ndisịn udọn̄ nnọ mmọ nditiene fi mbuana. Mme asuanetop oro ẹma ẹkena baptism—n̄kpri ye ikpọ—ẹkụt ke isọn̄ke ndisịm utịtmbuba emi edieke ẹnamde eti ndutịm. Sịn edinam emi ke akam. Ndien, edieke ekemede, nam ndutịm fo, nyụn̄ kop inem usiakusụn̄ unọ un̄wam!—Mal. 3:10.
8 Ediwak ubon ẹkụt nte ke ini kpukpru owo ẹnọde edinam emi ibetedem, owo kiet ke ubon ke nsụhọde n̄kaha eyekeme ndisịm utịtmbuba emi. Ubon kiet ama ebiere ke kpukpru mimmọ owo ition oro ima ikana baptism iyabuana ke utom usiakusụn̄ unọ un̄wam. Nditọ iba eken oro mîkanaha baptism kan̄a ẹma ẹsịn ekese ukeme nditat utom mmọ. Didie ke ubon oro ẹkebọ ufọn ẹto ukeme oro mmọ ẹkesịnde do? Mmọ ẹkewet ete: “Ekedi ata eti ọfiọn̄, ndien nnyịn ima inen̄ede ikụt ke mbọbọ ubon nnyịn ama enen̄ede ọsọn̄. Imọkọm Jehovah ke utịbe edidiọn̄ esie!”
9. Didie ke nnyịn ikeme ndinam un̄wana nnyịn ayama ke ini Editi emi?
9 Nte akpan utom oro idinamde ke March ye April eyedemede udọn̄ nnyịn, anamde inen̄ede isan̄a ikpere Ete nnyịn eke heaven? Emi edinen̄ede ọkọn̄ọ ke ukeme oro nnyịn owo kiet kiet idisịnde ke ndinam ima oro inyenede inọ Abasi ye Eyen esie ọdọdiọn̄ ọkọri, ye ke ndinam ekese ke an̄wautom. Nnyịn ikpakam ibiere ndinam ukem nte andiwet psalm emi ọkọkwọde ete: “Nyọkọm Jehovah eti-eti ke inua mi; nnyụn̄ ntoro enye ke otu uwak owo.” (Ps. 109:30) Jehovah ọyọdiọn̄ ifịk ifịk utom nnyịn ke ini Editi emi. Ntre, ẹyak nnyịn inam akwa un̄wana ayama man ediwak mbon efen efen ẹkpekeme ndiwọrọ ke ekịm nnyụn̄ ‘nnyene un̄wana uwem.’—John 8:12.