Nen̄ede Kere Ban̄a Mbon Efen—Ebe ke Nditịm Idem
1 Ndinam eti ntịmidem nnọ an̄wautom an̄wam nnyịn ndiwụt ke imenen̄ede ikere iban̄a mbon efen. Didie? Ke ini nnyịn inen̄erede itịm idem, nnyịn iditịmekede esịt iban̄a se iditịn̄de ndien emi ekeme ndinam nnyịn inen̄ede inọ enyeneufọk akpan ntịn̄enyịn. Ke adianade do, emi ayanam nnyịn ikûnyek idem onyụn̄ anam nnyịn itịn̄ ikọ ke ofụri esịt. Didie ndien ke nnyịn ikeme nditịm nneme oro enyenede uforo?
2 Da Nneme Oro Odotde: Mek kiet ke otu nneme oro odotde ye efakutom mbufo to se ẹnọde ekikere ẹban̄a ke Utom Obio Ubọn̄ Nnyịn eke January 2005, nyụn̄ se nte ekemede ndida enye nsịn ke ikọ idemfo. Kpụhọde nneme fo ekekem ye efakutom mbufo. Ke uwụtn̄kpọ, edieke afo esiwakde ndisobo mme owo oro ẹnyenede akpan ido ukpono m̀mê mme owo oro ẹtode ekpụk efen, kere nte nneme fo ekemede ndidemede udọn̄ mmọ. Ndikpụhọde nneme fo ntiene nsio nsio owo oro osobode owụt ke emenen̄ede ekere aban̄a mmọ.—1 Cor. 9:22.
3 Nte ọtọn̄ọde ndida usụn̄ unyene nneme emi n̄kwọrọ ikọ, ka iso ndinam nneme oro enen̄ede enyene inem. Sia ntọn̄ọikọ enen̄ede edi akpan n̄kpọ, tịm se nte mme owo ẹnamde n̄kpọ ẹban̄a ntọn̄ọikọ fo. Nte mmọ ẹma ibuot nneme oro? Nte mmọ ẹsibọrọ mme mbụme oro obụpde? Edieke mmọ mînọhọ ibọrọ, kpụhọde usụn̄ nneme fo tutu afo enyene enye oro etịmde odot.
4 Mme N̄kpọ Ẹdin̄wamde Fi Nditi: Ẹsisọn̄ ediwak owo nditi se ẹkeyomde nditịn̄ ke ini ẹsịmde enyịnusụn̄ ufọkowo. Edieke emi esitịbede ọnọ fi, ndi emesinam mme ndomonse ebe ke nditịn̄ se edinemede ọnọ owo efen? Emi ekeme ndinam enyene se editịn̄de in̄wan̄-in̄wan̄ ke ekikere ndien emekeme nditịn̄ enye mmemmem mmemmem, ye ke usụn̄ oro owụtde ifiọk. Emi n̄ko ekeme nditịm fi idem man ese aban̄a nsio nsio usụn̄ oro mme owo ẹdinamde n̄kpọ.
5 N̄kpọ efen oro ekemede ndinam fi eti se edinemede edi ndiwet se editịn̄de ibio ibio ke ekpri n̄wed, nnyụn̄ nse enye esisịt ini mbemiso esịmde enyịnusụn̄ ufọkowo. Ndusụk owo ẹkụt ke ibio ibio n̄kpọ editi emi esinam mmimọ ikûkop nnyekidem, inyụn̄ ineme nneme nte ọfọnde ye mme owo. Ke mme usụn̄ emi, eti ntịmidem ekeme ndin̄wam nnyịn iwụt ke imenen̄ede ikere iban̄a mbon efen, inyụn̄ inam n̄kọri ke eti mbụk oro itan̄ade.