Mbono District “Edinyan̄a Emekpere!” eke Mme Ntiense Jehovah eke 2006
1. Didie ke ikọt Abasi ẹkewụt esịtekọm ẹban̄a utuakibuot akpanikọ ke eset, ndien nso ukem ifet ke nnyịn inyene mfịn?
1 Edidem Hezekiah eke Judah eset ama ọnọ mbonitọk mme n̄wed ẹda ẹsọk mme owo man ẹdisop idem ọtọkiet ke Jerusalem. (2 Chron. 30:6, 13) Usụn̄ oro mme owo ẹkenamde n̄kpọ ama owụt edu mmọ kaban̄a utuakibuot akpanikọ. (2 Chron. 30:10-12) Ke mîbịghike, mme asan̄autom Jehovah mfịn ẹyenyene ukem ifet oro ndiwụt ntotụn̄ọ esịtekọm oro mmọ ẹnyenede ẹban̄a ifet edisop idem ọtọkiet man ẹtuak ibuot ẹnọ Jehovah. Ẹnọ esop mbufo leta, emi ẹkotde mbufo ẹdidụk Mbono District “Edinyan̄a Emekpere!” Didie ke afo edinam n̄kpọ aban̄a ikot oro?
2. Nso ke nnyịn ikeme ndinam idahaemi man ibọ ọyọhọ ufọn ito mbono emi?
2 Nam Ndutịm Idahaemi: Oyom idụk ofụri ndutịm mbono oro man ibọ ọyọhọ ufọn ito ima ima ndutịm eke spirit emi. Ọfọn nditọn̄ọ idahaemi nnam ntịmidem ekededi oro oyomde man afo ye ubon fo ẹdụk kpukpru usen mbita. (N̄ke 21:5) Utọ ntịmidem oro ekeme ndisịne ndiben̄e eteutom fo ini ndida ndụk mbono emi, ndineme ye nsan̄a ndọ fo oro mînịmke ke akpanikọ mban̄a ndutịm emi afo anamde, ndinam ndutịm mban̄a ufọkidụn̄, ye ndin̄wam nditọ ukpepn̄kpọ Bible ndidụk kpukpru usen. Kûbet tutu ini ebe akaha ndise mban̄a mme akpan n̄kpọ emi. Utu ke oro, bọn̄ akam nọ Jehovah ban̄a mme n̄kpọ emi, enyenede mbuọtidem nte ke “enye ayanam” n̄kpọ.—Ps. 37:5.
3. Ntak emi nnyịn ikpetienede mme ndutịm oro ẹnamde ẹban̄a mme ufọkidụn̄ nnyịn?
3 Esop Jehovah emesịn ọkpọsọn̄ ukeme man okụt ete ke ufọkidụn̄ odu ekem ke obio mbono kiet kiet. Ndiwụt esịtekọm mban̄a ukeme ofụri esịt oro nditọete emi ẹnamde utom ọkpọsọn̄ ẹsịnde ke ndinam mme ndutịm emi, ndikere mban̄a ekemmọ mme andidụk mbono, ye ndiwụt ukpono nnọ ndutịm ukara Abasi ẹkpenyene ndinam nnyịn itiene mme ndausụn̄ oro ẹnọde ke ibuotikọ emi ketket.—1 Cor. 13:5; 1 Thess. 5:12, 13; Heb. 13:17.
4. Nso idi mme akpan n̄kpọ oro nnyịn ikpetide ke ini iyomde ndibọ ufọkidụn̄, ndien ntak-a? (Sịn ekebe oro odude ke page 4.)
4 Ufọkidụn̄: Man efere mbufo ke idem, ẹyenam ndutịm ndinọ ufọkidụn̄ ke mme obio mbono kiet kiet. Ufọk esidu ke ediwak itie mbono, edide ufọk ibio ini m̀mê ufọkidụn̄ oro ẹbọpde man ediwak owo ẹdụn̄. Mbọk ẹti ẹte ke esop Abasi idikemeke ndibọp ufọkidụn̄ nnọ kpukpru mme andidụk mbono. Mbon oro Itieutom Unọ Ufọkidụn̄ ẹnọde unyịme kpọt ẹdidụn̄ ke ufọkidụn̄ emi. Nte ededi, ẹsịn udọn̄ ẹnọ mme andidụk mbono oro ẹdụn̄de ke dọmitri nditịp etịbe ke ofụri esịt man ẹda ẹse ẹban̄a mme ufọk emi sia ẹsibiatde uwak okụk ke nditịm mmọ n̄kama. Edieke ẹnọde fi ufọkidụn̄ ke ebiet efen, afo ekpenyene ndibere ye Itieutom Unọ Ufọkidụn̄ onyụn̄ odu ke ufọkidụn̄ fo. Ti ke ekeme ndiyom ẹkpekpe usụn̄ ẹka itie mbono kpukpru usen. Oyom n̄ko ẹtịp etịbe kaban̄a utom ofụri ererimbot. Ntem, oyom esịn emi ke ndutịm fo ke ini afamde okụk enịm ọnọ mbono. (1 Cor. 16:1-4; 2 Cor. 9:7) Mbemiso ewetde n̄kpọ ọyọhọ babru Room Request, dụn̄ọde mme akpan n̄kpọ oro ẹdude ke ekebe oro “Nte Ẹkpebọde Ufọkidụn̄.”
5, 6. Didie ke ẹkeme ndise mban̄a mbon oro ẹyomde san̄asan̄a un̄wam?
5 San̄asan̄a Un̄wam: Mme N̄ke 3:27 ọdọhọ ete: “Kûsịn ndida eti n̄kpọ nnọ mmọ eke ẹkpenyenede enye, ke ini ubọk fo ekemede ndinam.” Didie ke afo ekeme ndinam eti n̄kpọ nnọ mbon en̄wen ke mbono emi? Ekeme ndidi oyoyom ẹn̄wam mme asuanetop oro ẹma ẹkesọn̄, mbon n̄kpọnnam, mbon oro ẹnamde utom uyọhọ ini, ye mbon efen kaban̄a nte mmọ ẹdisan̄ade idisịm m̀mê ndinyene ebietidụn̄. Mme iman ẹnyene akpan mbiomo ndise mban̄a mbon emi. (1 Tim. 5:4) Edieke mmọ mîkemeke ndinam emi, ekemmọ mme andinịm ke akpanikọ ẹkeme ndin̄wam. (Gal. 6:10) Mme esenyịn ukpepn̄kpọ n̄wed esop ẹkpenyene ndika mbịne mbon oro ẹdude ke otu mmọ, emi ẹyomde san̄asan̄a un̄wam man ẹkụt ke mmọ ẹnam ndutịm ke eti ini mbemiso mbono.
6 Edi mme asuanetop oro mbonubon m̀mê esop mmọ mîkemeke ndinọ mmọ ufọkidụn̄ kpọt ẹdiwet n̄kpọ ẹyọhọ ikpehe oro ẹwetde Special Need ke Room Request Form. Kọmiti Utom Esop ekpenyene ndise m̀mê asuanetop oro odot, ẹdade mme ndausụn̄ oro ẹdude ke babru oro. Ẹnam ndutịm emi ẹnọ sụk mme asuanetop oro ẹdude ke eti idaha, esịnede nditọ mmọ oro ẹdude eti uwem.
7. (a) Ntak emi nnyịn ikpodụkde mbono oro ẹdemede nnyịn ẹsịn? (b) Nso idi mme n̄kpọ oro afo akpanamde edieke mme idaha oyomde afo odụk mbono efen?
7 Ndidụk Mbono Efen: Man ẹkụt ke n̄kpọitie, n̄wed, ufọkidụn̄, ye mme n̄kpọ eken ẹyedu ekem, ẹsịn udọn̄ ẹnọ fi ndidụk mbono oro ẹdemede esop mbufo ẹsịn. Edieke mme idaha ediyomde afo odụk mbono efen, mbọk sobo ye ewetn̄wed esop mbufo man ọnọ fi adres mbono oro afo edidụkde, oro ẹmịn̄de ke edem babru Room Request Form. Edieke ẹdinịmde se iwakde ikan mbono kiet ke obio oro, wet usenọfiọn̄ mbono oro afo oyomde ndidụk.
8. Nso idi usụn̄ kiet oro nnyịn ikemede nditịp n̄kpọ nsịn ke idatesịt mbono oro edide?
8 Mme Anamutom Unyịmesịt: Eyịghe idụhe nte ke kpukpru mbon oro ẹdidụkde mbono emi ẹyenen̄ede ẹkop idatesịt ẹnyụn̄ ẹbọ ufọn ẹto udia eke spirit ye ebuana oro ọbọpde-bọp. Nnyịn iyenen̄ede ikop inemesịt edieke inọde idem nnyịn unyịme unyịme ndin̄wam ke utom oro anade ẹnam man mbono oro okụt unen. (Utom 20:35) Idibịghike, mme Kọmiti Mbono n̄kann̄kụk ẹyetọn̄ọ ndikot mbon efen man ẹditiene ẹbuana ke utom emi. Nte afo emekeme ndinọ idemfo?—Ps. 110:3.
9. Nso ke afo ama ke mbono district eke isua ke isua, ndien nso ikpedi ubiere fo?
9 Ke ini eyeneren isua ition okodụkde mbono district, enye ọkọdọhọ ete: “Mbono district edi ndutịm utuakibuot Jehovah oro mmade n̄kan.” Se eyen emi eketịn̄de ke ofụri esịt mi owụt nte esinemde kpukpru nnyịn ke idem ndidụk mbono district nnyịn eke isua ke isua. Enye enen̄ede edi nte andiwet psalm ọkọkwọde ete: “Usen kiet ke okụre fo ọmọfọn akan tọsịn.” (Ps. 84:10) David ama ọkwọ ete ke ọdọn̄ imọ ‘ndidụn̄ ke ufọk Jehovah ke ofụri uwem imọ man itịm ibụp ke temple esie.’ (Ps. 27:4) Enye ama enen̄ede okop inemesịt ndisịne ke otu mme andituak ibuot nnọ Jehovah. Nnyịn ikpakam iwụt esịtekọm ukem nte David okowụtde kaban̄a utuakibuot akpanikọ ebe ke ndidụk ofụri usen ita oro ke Mbono District “Edinyan̄a Emekpere!”
[Ekebe ke page 3]
Mme Ini Edinam
Friday 9:20 a.m. - 4:55 p.m.
Saturday 9:00 a.m. - 4:05 p.m.
Sunday 9:00 a.m. - 3:40 p.m.
[Ekebe ke page 4]
Nte Ẹkpebọde Ufọkidụn̄
1. Bọ ewetn̄wed esop mbufo babru Room Request.
2. Babak wet n̄kpọ yọhọ babru Room Request emi. Mbọk kụt ete ke ọmọnọ ọyọhọ ntọt aban̄a enyịn̄, isua emana, nyụn̄ wụt m̀mê owo oro oyomde itieidụn̄ edi eren m̀mê n̄wan, asiakusụn̄ m̀mê asuanetop.
3. Ewetn̄wed esop ekpenyene ndise nnyụn̄ nsịn ubọk ke babru Room Request onyụn̄ ọnọ enye aka itiembono IDỊGHE N̄KỌK ITIEUTOM. Ntak edi nte ke ubiatini ekeme ndidu edieke ẹnọde babru emi aka n̄kọk itieutom mbemiso esịmde Itieutom Unọ Ufọkidụn̄.
4. Kûnọ enyene-ebiet okụk oro awakde akan se Itieutom Unọ Ufọkidụn̄ ọkọnọde man afo enyene itieidụn̄.
5. Ke anamde ọkpọkpọ ndutịm man enyene itieidụn̄, mbọk bụp Itieutom Unọ Ufọkidụn̄ mbak afo udubọ ukem itieidụn̄ oro owo efen ọkọbọde.
Mbọk
◼ Ẹnyịme ndibọ itieidụn̄ oro Itieutom Unọ Ufọkidụn̄ ọnọde. Ẹkûdụn̄ ke mme ufọkidụn̄ an̄wa mbono edieke Itieutom Unọ Ufọkidụn̄ mîdọhọke mbufo ẹdụn̄ do. Ẹkûyak ibat owo oro ẹdụn̄de do awak akan se ẹkenyịmede.
◼ Ẹkûdụk mme itie oro ẹdọhọde ẹkûdụk ke itieidụn̄ oro mbufo ẹdude. Ẹtem udia n̄kukụre edieke ẹnyịmede ẹnam oro ye ke itie oro ẹdọhọde ẹtem.
◼ Ẹkpenyene ndibabak nnọ babru Room Request ẹsọk Itieutom Unọ Ufọkidụn̄. Emi ọyọnọ Itieutom Unọ Ufọkidụn̄ ini oro ekemde ndiyom eti itieidụn̄ nnọ fi.
◼ Ẹnyene ndiwet n̄kpọ ke babru Room Request ediye ediye ye nte ẹkemede ndikot.