Tịm Nịm

Ndinịm Ukpepn̄kpọ Bible Oro Enyenede Uforo

Esịne-esịt emi ọdọn̄ọ mme akpan n̄kpọ ẹtode udịm udịm ibuotikọ ke ndinịm ukpepn̄kpọ Bible oro enyenede uforo emi ẹdude ke Utom Obio Ubọn̄ Nnyịn. Ẹsịn udọn̄ ẹnọ kpukpru owo nditịm esịne-esịt emi nnịm nnyụn̄ nda enye nnam n̄kpọ ke ini ẹnịmde ukpepn̄kpọ Bible. Ke adianade do, ẹkeme ndineme mme akpan n̄kpọ oro ẹdude ke esịne-esịt emi ke ini ẹnịmde mbono an̄wautom, ndien mme esenyịn utom ẹkeme ndida enye ntịm utịn̄ikọ mmọ ke ini ẹkade ẹkese otu ukpepn̄kpọ n̄wed.

Ikpehe 1: Nso Idi Ukpepn̄kpọ Bible?

Edieke afo akamade Bible m̀mê osiode ibuotikọ ke kiet ke otu n̄wed oro ẹdọhọde ẹkama ọtọn̄ọ ndineme Bible ke nde ke nde kpukpru ini, okposụkedi nneme oro ẹdide mbio mbio, afo enịm ukpepn̄kpọ Bible. Ẹkeme nditọt ukpepn̄kpọ oro ke ẹma ẹkenịm enye ikaba ọtọn̄ọde ke ini oro ẹkenamde ndutịm ukpepn̄kpọ ẹwụt ẹnyụn̄ ẹtịmde ẹkụt ẹte ukpepn̄kpọ emi ayaka iso.—km-EF 7/04 p. 1.

Mme N̄wed Ẹdọhọde Ẹkama

◼ Nso ke Abasi Oyom Oto Nnyịn?

◼ Ifiọk Oro Adade Osịm Nsinsi Uwem

◼ Tuak Ibuot nọ Ata Abasi Kierakiet

◼ Ẹkeme ndikpep ediye uduot ekpri n̄wed oro Afo Emekeme Ndidi Ufan Abasi! ye mbon oro ẹnyenede esisịt ifiọkn̄wed m̀mê oro mîkemeke ndikot n̄wed.

Ikpehe 2: Nditịm Idem Ndinịm Ukpepn̄kpọ

Nnyịn inyene ndikpep n̄kpọ ke usụn̄ oro esịmde esịt eyen ukpepn̄kpọ. Emi oyom eti ntịmidem onyụn̄ oyom ikere iban̄a eyen ukpepn̄kpọ oro.—km-EF 8/04 p. 1.

Nte Ikpetịmde Idem

◼ Dụn̄ọde ibuotikọ, n̄kpri ibuotikọ, ye mme ndise ke ikpehe ukpepn̄kpọ oro.

◼ Yom ibọrọ ke mbụme oro ẹmịn̄de-mịn̄, odụride udịm ke mme ọkpọ ikọ kpọt.

◼ Mek m̀mê ewe itie N̄wed Abasi oro ẹsiakde ẹsịn ke ẹdikot ke ini ukpepn̄kpọ. Wet n̄kpri n̄kpọ ke mben n̄wed ukpepn̄kpọ oro.

◼ Tịm ibio ibio ndụn̄ọde ke mme akpan n̄kpọ.

Nam Ukpepn̄kpọ oro Ebehe Eyen Ukpepn̄kpọ

◼ Bọn̄ akam ban̄a eyen ukpepn̄kpọ ye mme n̄kpọ oro enye oyomde.

◼ Domo ndikere mban̄a mme n̄kpọ oro mîdin̄wan̄ake eyen ukpepn̄kpọ m̀mê oro ẹdisọn̄de enye ndinyịme.

◼ Kere ise: Nso ke enye enyene ndifiọk m̀mê ndinam man anam n̄kọri ke n̄kan̄ eke spirit? Didie ke n̄keme ndisịm esịt esie?

◼ Nte oyomde, tịm uwụtn̄kpọ, edinam an̄wan̄a, m̀mê udịm udịm mbụme oro ẹdin̄wamde eyen ukpepn̄kpọ ndifiọk se ẹtịn̄de m̀mê itie N̄wed Abasi.

Ikpehe 3: Ndida Mme Itie N̄wed Abasi Nnam N̄kpọ Mfọn Mfọn

Uduak nnyịn ke ndinịm mme ukpepn̄kpọ Bible edi ‘ndinam mme mbet’ ebe ke ndin̄wam mmọ ẹfiọk ẹnyụn̄ ẹnyịme mme ukpepn̄kpọ Ikọ Abasi ẹnyụn̄ ẹda mmọ ẹsịn ke edinam ke uwem mmọ. (Matt. 28:19, 20; 1 Thess. 2:13) Ke ntre, ukpepn̄kpọ oro ekpenyene ndikọn̄ọ ke N̄wed Abasi.—km-EF 11/04 p. 4.

Da N̄wed Abasi Nọ Ukpep

◼ Wụt eyen ukpepn̄kpọ nte enye ekemede ndiyom mme akpan itie ke Bible esie.

◼ Kot nyụn̄ neme mme itie N̄wed Abasi oro ẹsọn̄ọde se nnyịn inịmde ke akpanikọ.

◼ Bụp mme mbụme. Utu ke nditịn̄ se mme itie Bible ẹwọrọde nnọ eyen ukpepn̄kpọ, dọhọ enye akam ẹtịn̄ se mmọ ẹwọrọde ọnọ fi.

◼ Nam ukpepn̄kpọ edi mmemmem. Kûdomo ndinam kpukpru n̄kpọ oro ẹdude ke itie N̄wed Abasi ẹn̄wan̄a. Sịn mme n̄kpọ oro ẹyomde kpọt man ẹsọn̄ọ se ẹnemede.

◼ Wụt nte enyenede ebuana. N̄wam eyen ukpepn̄kpọ okụt nte mme itie Bible ẹtụkde enye.

Ikpehe 4: Ndikpep Nditọ Ukpepn̄kpọ nte Ẹtịmde Idem

Eyen ukpepn̄kpọ oro ebemde iso okot se ẹdikpepde, esịnde idiọn̄ọ ke ibọrọ, onyụn̄ ekerede nte ọkpọbọrọde ke ikọ idemesie ayanam n̄kọri eke spirit usọp usọp. Ke ntre, ke ama ọkọtọn̄ọ ukpepn̄kpọ Bible, da ibuot ukpepn̄kpọ kiet wụt eyen ukpepn̄kpọ nte enye ekpetịmde idem. Ye ata ediwak nditọ ukpepn̄kpọ, ọyọfọn ndida ofụri ibuot m̀mê ikpehe ukpepn̄kpọ kiet n̄wụt nte ẹtịmde idem.—km-EF 12/04 p. 1.

Ndisịn Idiọn̄ọ Nnyụn̄ N̄wet N̄kpọ

◼ Nam an̄wan̄a nte ẹkpekụtde nnennen ibọrọ mbụme oro ẹmịn̄de-mịn̄ ke n̄wed.

◼ Wụt eyen ukpepn̄kpọ n̄wed fo emi afo esịnde idiọn̄ọ ke mme ọkpọ ikọ m̀mê ubak udịm ikọ kpọt.

◼ N̄wam enye okụt ke itie N̄wed Abasi kiet kiet oro ẹsiakde ẹsịn ọsọn̄ọ akpan n̄kpọ ke ikpehe ekikere, nyụn̄ wụt enye nte ẹkemede ndiwet n̄kpọ mbio mbio ke mben n̄wed ukpepn̄kpọ esie.

Tịn̄ Ibio Ibio Se Idude Nyụn̄ Nam Ndụn̄ọde

◼ Wụt eyen ukpepn̄kpọ nte ẹkemede ndidụn̄ọde ibuot n̄wed m̀mê ibuotikọ ukpepn̄kpọ, n̄kpri ibuotikọ, ye mme ndise mbemiso ọtọn̄ọde ndinam ọyọhọ ntịmidem.

◼ Sịn udọn̄ nọ eyen ukpepn̄kpọ odụn̄ọde mme akpan n̄kpọ mbemiso okụrede ntịmidem esie.

Ikpehe 5: Ndibiere Udomo N̄kpọ Oro Ẹkpekpepde

Udomo n̄kpọ oro ẹkpekpepde edikọn̄ọ ke ukeme ye idaha andikpep ye eke eyen ukpepn̄kpọ.—km-EF 1/05 p. 1.

Kọri Ọkpọsọn̄ Mbuọtidem

◼ Oyom anam Ikọ Abasi an̄wan̄a eyen ukpepn̄kpọ utu ke ndikpep uwak n̄kpọ ke esisịt ini.

◼ Biat ini oro ọniọn̄de ekem man an̄wam eyen ukpepn̄kpọ oro ọfiọk onyụn̄ enyịme se enye ekpepde.

◼ Nọ ini oro ekemde man ẹkot mme akpan itie N̄wed Abasi oro ẹsọn̄ọde ukpepn̄kpọ oro.

Kûwọn̄ọde Ntịn̄enyịn

◼ Edieke eyen ukpepn̄kpọ esimade nditịn̄ uwak ikọ mban̄a ọkpọkpọ mbubehe, emekeme ndinam ndutịm man eneme mme n̄kpọ emi ke ukpepn̄kpọ ama okokụre.

◼ Kûtịn̄ ikọ awak akaha ke ini ukpepn̄kpọ. Kûyak n̄kpọ oro ẹtịn̄de ẹdian m̀mê ifiọkutom oro ẹbụkde ẹwak m̀mê ẹniọn̄ ẹkaha man mmọ ẹdibiọn̄ọ eyen ukpepn̄kpọ ndinyene nnennen ifiọk aban̄ade mme akpan ukpepn̄kpọ Bible.

Ikpehe 6: Ke Ini Eyen Ukpepn̄kpọ Obụpde Mbụme

Ke ndondo oro ukpepn̄kpọ Bible enyenede iwụk, esifọn ndikpep mme ukpepn̄kpọ Bible ke adiana ke adiana utu ke ndidi owo ikpepke ibuot nneme kiet ikụre ẹbe ẹka efen. Emi esin̄wam eyen ukpepn̄kpọ ndikọ nnennen ifiọk nnyụn̄ nnam n̄kọri ke n̄kan̄ eke spirit.—km-EF 2/05 p. 6.

Wụt Mbufiọk

◼ Emekeme ndibọrọ mme mbụme oro ẹnyenede ebuana ye se ẹkpepde ke ubọk ke ebe oro.

◼ Emekeme ndibọrọ mme mbụme oro mînyeneke ebuana ye ukpepn̄kpọ oro m̀mê mme mbụme oro ediyomde ẹnam ndụn̄ọde ke ini efen. Ndiwet utọ mbụme oro nnịm ekeme ndin̄wam.

◼ Edieke n̄kpọ kiet ọsọn̄de eyen ukpepn̄kpọ ndinyịme, kpep enye n̄wed efen oro enemede ibuot nneme oro ọyọhọ ọyọhọ.

◼ Edieke eyen ukpepn̄kpọ mîsụk inịmke ke akpanikọ, kpọn̄ ibuot nneme enye oro tutu ini efen nyụn̄ ka iso ke ukpepn̄kpọ mbufo.

Nyene Nsụhọdeidem

◼ Edieke mûfiọkke ibọrọ mbụme, kûtịn̄ ekikere idemfo.

◼ Wụt eyen ukpepn̄kpọ nsịtnsịt nte enye ekemede ndinam ndụn̄ọde.

Ikpehe 7: Ndibọn̄ Akam Mbemiso Ẹtọn̄ọde Ẹnyụn̄ Ẹtrede Ukpepn̄kpọ

Man nditọ ukpepn̄kpọ Bible ẹnam n̄kọri ke n̄kan̄ eke spirit, oyom edidiọn̄ Jehovah. Ke ntre, odot ẹtọn̄ọ ẹnyụn̄ ẹtre ukpepn̄kpọ ye akam.—km-EF 3/05 p. 4.

Nte Ẹkemede Nditọn̄ọ ye Akam

◼ Ẹkeme ndibọn̄ akam toto ke akpa ini oro ẹtọn̄ọde ndinịm ukpepn̄kpọ ye mbon oro ẹnyenede udọn̄ ke ido ukpono.

◼ Ye mbon efen, oyom nnyịn itịm ifiọk ini oro odotde ẹtọn̄ọ ndibọn̄ akam.

◼ Ẹkeme ndida Psalm 25:4, 5 ye 1 John 5:14 n̄wụt ntak ẹbọn̄de akam.

◼ Ẹkeme ndida John 15:16 n̄wụt ntak anade ibọn̄ akam inọ Jehovah ke enyịn̄ Jesus Christ.

Se Ẹkemede Ndisịn ke Akam

◼ Odot ẹtoro Jehovah nte Andinọ item oro.

◼ Sịn mme ikọ emi ẹwụtde udọn̄ oro enyenede ke idem eyen ukpepn̄kpọ oro.

◼ Wụt esịtekọm ban̄a esop oro Jehovah adade anam n̄kpọ.

◼ Bọn̄ akam ben̄e Jehovah ọdiọn̄ ukeme emi eyen ukpepn̄kpọ esịnde ndinam se enye ekpepde.

Ikpehe 8: Ndimen Nditọ Ukpepn̄kpọ N̄wụt Esop

Uduak nnyịn ke ndinịm mme ukpepn̄kpọ Bible ikụreke ke ndikpep mme owo n̄kpọ edi abuana n̄ko ndin̄wam nditọ ukpepn̄kpọ ẹdi ẹdibuana ye esop Christian. Da minit ifan̄ kpukpru urua neme akpan n̄kpọ kiet ban̄a esop Jehovah ke ini enịmde ukpepn̄kpọ Bible.—km-EF 4/05 p. 8.

Mme Mbono Esop

◼ Neme ban̄a mbono esop kiet kiet. Tọn̄ọ ke akpa ukpepn̄kpọ, kot mmọ ẹdi.

◼ Neme mme akpan n̄kpọ oro ẹkenemede ke mme mbono esop.

◼ Demede udọn̄ nọ Editi, mbono, ye ini edidi esenyịn circuit.

◼ Da mme ndise ke mme n̄wed nnyịn n̄wam mmọ ẹfiọk se isikade iso ke mme mbono emi.

◼ Sịn udọn̄ nọ mmọ ndikot ediye uduot ekpri n̄wed Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ?

Da Mme Vidio Nam Udọn̄ Ọkọri

◼ Jehovah’s Witnesses—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Ikpehe 9: Nditịm Nditọ Ukpepn̄kpọ Idem Ndinọ Ikọ Ntiense Ido Nneme

Nte nditọ ukpepn̄kpọ Bible ẹtọn̄ọde ndibuọt idem ke se mmọ ẹkpepde, esinụk mmọ nditịn̄ mban̄a emi.—km-EF 5/05 p. 1.

Sịn Udọn̄ nọ Mmọ Ẹnọ Ikọ Ntiense

◼ Nte odu mme ufan ye mbonubon emi mmọ ẹkemede ndidọhọ ẹtiene ẹdụk ukpepn̄kpọ Bible mmimọ?

◼ Nte mme nsan̄autom mmọ, mme nsan̄a ufọkn̄wed, m̀mê mme ọdiọn̄ọ en̄wen ekededi ẹwụt udọn̄ ke eti mbụk?

Kpep Mmọ Ndineme Se Mmọ Ẹnịmde ke Akpanikọ ye Mbon Efen

◼ Ke mme akpan ikpehe ke ini ukpepn̄kpọ, bụp eyen ukpepn̄kpọ, “Didie ke afo akpada Bible anam akpanikọ emi an̄wan̄a ubon fo?”

◼ N̄wam eyen ukpepn̄kpọ ọfiọk ntak oyomde enye owụt ukpono onyụn̄ ọfọn ido ke ini etịn̄de aban̄a Abasi ye mme uduak esie.

◼ Nditọ ukpepn̄kpọ ẹkeme ndida ediye uduot ekpri n̄wed oro Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ? n̄n̄wam mme ufan ye mbonubon ndifiọk mme ukpepn̄kpọ ye mme edinam nnyịn oro ẹkọn̄ọde ke Bible.

Ikpehe 10: Ndikpep Nditọ Ukpepn̄kpọ Utom eke Ufọk ke Ufọk

Ke ini mbiowo ẹbierede ke eyen ukpepn̄kpọ Bible odot ndidi asuanetop oro mînaha baptism, enye ekeme nditọn̄ọ mbuana ye esop ke an̄wan̄wa utom ukwọrọikọ.—km-EF 6/05 p. 1.

Nditịm Idem Ọtọkiet

◼ Wụt obufa asuanetop ebiet emi enye ekemede ndikụt mme ekikere oro ẹnọde.

◼ N̄wam enye emek mmemmem usụn̄ ndida ntọn̄ọ nneme oro odotde ye efakutom n̄kann̄kụk.

◼ Sịn udọn̄ nọ enye ndikot Bible ke ini ọkwọrọde ikọ.

◼ Ẹnam ndomonse ọtọkiet. Wụt enye nte akpadade usọ ọbọrọ se ẹsitịn̄de.

Ndisan̄a Ntre N̄kwọrọ Ikọ

◼ Yak enye ese nte afo ọkwọrọde se mbufo mbiba ẹketiede ntre ẹtịm.

◼ Kere ban̄a edu ye ukeme eyen ukpepn̄kpọ oro. Ke ndusụk idaha, ekeme ndifọn ọdọhọ enye etịn̄ ndusụk ikọ.

◼ N̄wam obufa asuanetop emi anam ndutịm man akpabuana ke utom ukwọrọikọ kpukpru ini.

Ikpehe 11: Ndin̄wam Nditọ Ukpepn̄kpọ Ẹnam Mme Mfiakn̄ka

Ẹsitọn̄ọ nditịm idem nnọ mfiakn̄ka ke akpa ini oro ẹwahade. Sịn udọn̄ nọ eyen ukpepn̄kpọ oro ndinyene ata udọn̄ ke idem mbon oro enye etịn̄de ikọ ọnọ. Kpep enye nsịtnsịt ndinam mme enyeneufọk ẹtịn̄ ekikere mmọ, ndikpan̄ utọn̄ nnọ se mmọ ẹtịn̄de, nnyụn̄ ntịm mfiọk mme n̄kpọ oro ẹbehede mmọ.—km-EF 7/05 p. 1.

Nditịm Idem Ndifiak N̄ka

◼ Neme nte akpa ediwaha eketiede, nyụn̄ n̄wam eyen ukpepn̄kpọ oro emek ibuotikọ oro edidemerede enyeneufọk udọn̄.

◼ Tịm ibio ibio nneme oro esịnede itie Bible kiet ọkọrọ ye ikpehe ekikere kiet ke n̄wed ukpepn̄kpọ.

◼ Kere ban̄a mbụme oro ẹkemede ndibụp ke utịt nneme oro.

Sịn Ifịk Nam Mfiakn̄ka

◼ Sịn udọn̄ nọ eyen ukpepn̄kpọ ọsọsọp afiak ebịne kpukpru mbon oro ẹkewụtde udọn̄.

◼ N̄wam eyen ukpepn̄kpọ okụt ntak ọfọnde ẹnyene ime ke ndika mbịne mbon oro esisọn̄de ndikụt.

◼ Wụt obufa asuanetop nte ẹkemede ndinịm ini ndifiak n̄ka, nyụn̄ n̄wam enye ọfiọk ntak oyomde enye afiak aka nte ọkọn̄wọn̄ọde.

Ikpehe 12: Ndin̄wam Nditọ Ukpepn̄kpọ Ẹtọn̄ọ Ẹnyụn̄ Ẹnịm Mme Ukpepn̄kpọ Bible

Edi akpan n̄kpọ afo ndikpebe Jesus ke ndinịm eti uwụtn̄kpọ ke utom an̄wautom fo. Nte eyen ukpepn̄kpọ fo okụtde uwụtn̄kpọ fo ke an̄wautom, enye eyedifiọk ete ke uduak edinam mfiakn̄ka edi nditọn̄ọ mme ukpepn̄kpọ Bible.—km-EF 8/05 p. 1.

Nditọn̄ọ Ukpepn̄kpọ Bible

◼ Nam an̄wan̄a eyen ukpepn̄kpọ ke iyomke ẹtịn̄ ikọ awak akaha ẹban̄a ndutịm ukpepn̄kpọ emi.

◼ Esinen̄ede ọfọn ndida ikpehe kiet m̀mê iba ke n̄wed nnyịn nnam n̄wụt nte ẹsinịmde ukpepn̄kpọ emi.

◼ Dụn̄ọde nyụn̄ da kiet ke otu ekikere oro ẹnọde ndida ntọn̄ọ ukpepn̄kpọ Bible nam ndomonse.—km-EF 8/05 p. 4; km-EF 1/02 p. 6.

Kpep Nditọ Ukpepn̄kpọ Man Mmọ Ẹdi Mme Andikpep

◼ Sịn udọn̄ nọ nditọ ukpepn̄kpọ ndisịn enyịn̄ ke Ufọkn̄wed Utom Ukara Abasi.

◼ Nam ndutịm nọ mbufa asuanetop nditiene n̄ka mme ukpepn̄kpọ Bible efen emi mmọ ẹdibuanade esisịt ke ndikpep.