Mme Ekikere ke Nte Ẹkpenọde Nte Abasi Enen̄ede Ekere Aban̄a Nnyịn?
Ke ama akasiak n̄kpọ mmọn̄eyet oro etịbede, afo emekeme ndidọhọ:
“Nte akanam afo emekere ntak emi Abasi ayakde mme owo ẹbọ ufen edieke enye enen̄erede ekere aban̄a nnyịn? [Bet ibọrọ.] Ediye uduot ekpri n̄wed emi ọbọrọ mbụme oro ke usụn̄ emi ọnọde uyụhọ onyụn̄ owụt se Abasi edinamde ke n̄kpet n̄kpet ini iso. [Wụt mme ndise oro ẹdude ke page 27 nyụn̄ kot Psalm 145:16 ke ikpehe ekikere 22.] Didie ke Abasi editre kpukpru ndutụhọ emi ubonowo osobode? Nyama ndineme mbụme oro ini efen emi ndidide.” Nọ ediye uduot ekpri n̄wed oro nyụn̄ diomi ndifiak n̄ka.
Ke afiakde aka, afo emekeme ndidọhọ:
“Ke akpatre ini oro n̄kedide, ima ikot itie N̄wed Abasi emi. [Kot mîdịghe tịn̄ se idude ke Psalm 145:16.] Ekem mma mbụp: Didie ke Abasi editre kpukpru ndutụhọ emi ubonowo osobode?” Dọhọ enye emen ediye uduot ekpri n̄wed esie edi. Ekem kụbọde ka page 27-28 nyụn̄ neme ikpehe ekikere 23-25. Dọhọ ke iyama ndikpep Bible ye enye mîdịghe diomi ndifiak n̄keneme ikpehe ekikere 26-27 ini efen.
Asuanetop oro edide uyen ekeme ndidọhọ:
“Ediwak ubọkn̄ka mi ẹkere nte ererimbot editiede ke isua 10 m̀mê 15 ke iso. Afo ekere ke uwem editie didie ini oro? [Bet ibọrọ.] Mme mfịna oro nnyịn isobode mfịn ẹwụt nte ke nnyịn idu ke mme akpatre usen. [Kot 2 Timothy 3:1-3.] Ediye uduot ekpri n̄wed emi ọbọrọ mme mbụme oro ẹtienede mi. [Kot mme mbụme oro ẹdude ke edem, nyụn̄ nọ ediye uduot ekpri n̄wed emi.] Ke mfiakde ndi, edieke edinyenede ini, nyama ndineme nte udọn̄ọ ye usọn̄ ẹditrede.” Diomi ndifiak n̄ka.
Ke ini afiakde aka, afo emekeme ndidọhọ:
“Akpatre ini emi n̄kedide, mma ndọhọ ke nyom ndineme nte udọn̄ọ ye usọn̄ ẹditrede. Nneme oro odu mi.” Dọhọ enye emen ediye uduot ekpri n̄wed esie edi. Ekem kot nyụn̄ neme ikpehe ekikere 6-7 ke page 23-24. Diomi ndineme ikpehe ekikere 8-9 ke ini afiakde aka.
Ke ini asan̄ade ye ekpri eyen, akamba owo ekeme ndisiak enyịn̄ mmọ mbiba ekem ọdọhọ ete:
“Edieke amade, ________ ayama ndikot itie Bible kiet nnọ fi. [Ekpri eyen oro okot Psalm 37:29 onyụn̄ etịn̄ ibio ibio aban̄a itie Bible oro.] Ediye uduot ekpri n̄wed emi eneme nte Abasi edisude se enye aduakde ndinam nnọ ubonowo ye isọn̄. [Wụt mme ndise oro ẹdude ke page 24-27.] Ima ifiak idi, nyowụt fi utịbe utịbe un̄wọn̄ọ Bible aban̄ade ediset ke n̄kpa.” Nọ ediye uduot ekpri n̄wed oro nyụn̄ diomi ndifiak n̄ka.
Ke ini ẹfiakde ẹka, akamba owo oro ekeme ndidọhọ:
“Ke akpa ini oro n̄kedide, ima ikot Psalm 37:29 nnyụn̄ ndọhọ ke mmọn̄ n̄wụt fi se Bible etịn̄de aban̄a ediset ke n̄kpa. Tịm fiọk se ẹwetde mi.” Dọhọ enye emen ediye uduot ekpri n̄wed esie edi. Ekem neme ikpehe ekikere 12-14 ke page 24-25. Dọhọ ke iyama ndikpep Bible ye enye mîdịghe diomi ndifiak n̄keneme ikpehe ekikere 15-16 ini efen.