Nọ Andibot Fi Ubọn̄ Ebe ke Ndinịm Mme Utịtmbuba eke Spirit
1. (a) Didie ke uwem ekeme ndinyene ndausụn̄? (b) Mme utịtmbuba ewe ke Noah ye Moses ẹkenịm?
1 Man uwem enyene ndausụn̄, ana owo enyene utịtmbuba. Bible ọnọ mme uwụtn̄kpọ mbon oro ẹkenịmde utịtmbuba ẹnọ idemmọ. Noah ama ada n̄kpọ nte isua 50 ọkọn̄ ubom. Nso ikedi utịtmbuba esie? ‘Man anyan̄a ufọk esie.’ Prọfet Moses ama “[owụk] enyịn ese utịp eke ẹdinọde enye.”—Heb. 11:7, 26.
2. Mme mbụme ewe ke nnyịn ikpobụp idem nnyịn?
2 Ih, mme asan̄autom Jehovah ke ofụri emana ẹmenịm nti utịtmbuba ẹnọ idemmọ ẹnyụn̄ ẹsịm mmọ, man ẹnọ Abasi ubọn̄. Didie ke nnyịn ikpenịm utịtmbuba eke spirit inọ idem nnyịn mfịn man inọ Andibot nnyịn ubọn̄? Mme utịtmbuba ewe ke nnyịn ikpodomo ndisịm, ndien nso akpan usio-ukot ke ikeme ndinam man isịm mmọ?
3. Ke mme usụn̄ ewe ke utịtmbuba ukara Abasi okpụhọrede ye eke ererimbot?
3 Nyene Nnennen Uduak: Mme utịtmbuba ukara Abasi idịghe ukem ye eke ererimbot. Akpan uduak utịtmbuba ererimbot edi ọkpọsọn̄ udọn̄ ndinyene inyene ye ọkpọsọn̄ ediyom itie ye odudu. Edi, mme utịtmbuba oro ẹdade ubọn̄ ẹsọk Jehovah Abasi ẹnyene ebuana nnennen nnennen ye utuakibuot oro inọde enye ẹnyụn̄ ẹnyene n̄kpọ ndinam ye udọn̄ n̄kpọ Obio Ubọn̄. (Matt. 6:33) Ima oro imade Abasi ye ekemmọ owo anam inịm mme utọ utịtmbuba oro, ndien emi an̄wam nnyịn ndinyene uten̄e Abasi.—Matt. 22:37-39; 1 Ti. 4:7.
4, 5. Nso idi ndusụk utịtmbuba eke spirit oro ikpekerede iban̄a?
4 Mme Utịtmbuba eke Spirit Oro Ikpekerede Iban̄a: Afo emekeme ndinịm utịtmbuba edikọri ifiọk oro enyenede aban̄a Ikọ Abasi. Ke Mme N̄ke 2:1-5, ẹteme nnyịn ẹte iyom “ifiọk Abasi.” Ebede ke ndinyene ukpepn̄kpọ idemfo kpukpru ini, afo ayanam mme akpan n̄kpọ oro ẹwetde ke N̄wed Abasi ẹtịm ẹwụhọ ke esịt ye ekikere fo man anam fi enen̄ede esịk ekpere Jehovah. Afo eyenen̄ede odu ke mben̄eidem ndinam mme ubiere ke ini osobode ye mme akpan mfịna.
5 Ndusụk owo ẹnyene akpan ibat hour oro ẹnịmde nte utịtmbuba ẹnọ idem mmọ ndisịn ke utom ukwọrọikọ kpukpru urua. Nte edi utịtmbuba fo ndikabade ndi ata eti andikpep ke ini anamde mme mfiakn̄ka ye ukpepn̄kpọ Bible? Ndusụk mbon oro ẹdude ke ufọkn̄wed ẹnịm utịtmbuba eke isua ke isua ndidụk usiakusụn̄ unọ un̄wam ke ọfiọn̄ kiet m̀mê akande oro ke ini utre n̄wed. Nso kaban̄a mme magazine Enyọn̄-Ukpeme ye Awake!? Ndusụk owo ẹnịm utịtmbuba ndikot nsiondi kiet kiet ndondo oro mmọ ẹbọde.
6. Mme usio-ukot ewe ke ikpanam man an̄wam nnyịn ndisịm mme utịtmbuba nnyịn?
6 Ndiwewet Mme Utịtmbuba Nnyịn Ekeme Ndin̄wam Nnyịn Isịm Mmọ: Solomon ama ọfiọk ke nnennen ikọ ekeme ndinen̄ede nnọ ndausụn̄ nte ukịm-enan̄. (Eccl. 12:11) Ke ini iwetde-wet mme ikọ emi isịn ke n̄wed, mmọ ẹsinen̄ede ẹdụk esịt ye ekikere. (Deut. 17:18) Ntre nnyịn imekeme ndiwewet mme utịtmbuba nnyịn ye usụn̄ oro iyomde ndida nsịm mmọ nsịn ke n̄wed, iwetde mme ubiọn̄ọ oro idoride enyịn ndisobo ye mme usụn̄ oro ididade ikan mmọ.
7. Didie ke akpan asiakusụn̄ kiet ekesịm mme utịtmbuba esie?
7 Kere ban̄a uwụtn̄kpọ akpan asiakusụn̄ oro anamde utom ebịghi ke nsannsan efakutom, emi n̄wan esie akakpade ke unana idotenyịn. Ke ndusụk ini ama ekebe, enye ama ebiere ndisịn idem ofụri ofụri ke utom usiakusụn̄ ebe ke ndinịm mme utịtmbuba. Ke ama ekewet se enye oyomde ndinam esịn ke n̄wed, enye ama esịn emi ke akam onyụn̄ ebiere nditọn̄ọ ye edinịm ukpepn̄kpọ Bible ita etisịm utịt ọfiọn̄. Enye ama esidụn̄ọde se enye anamde ke usen ke usen, onyụn̄ odụn̄ọde n̄kọri oro enye anamde kpukpru usen duop. Ndi enye ama esịm utịtmbuba esie? Sia enye ọkọtọn̄ọde mbufa ukpepn̄kpọ Bible inan̄, enye adat esịt ndibọrọ ih!
8. Nso ke nnyịn ikpebiere ndinam?
8 Ke ndusụk ini, mme idaha owo ẹsinam edi ọkpọsọn̄ n̄kpọ ndisịm ndusụk utịtmbuba. Ke uwụtn̄kpọ, unana nsọn̄idem m̀mê mbiomo ubon ekeme ndibiọn̄ọ nnyịn ndibịne ndusụk utịtmbuba. Edi nnyịn imekeme ndisụk ‘mbak Abasi, nnyụn̄ nnịm mbet esie.’ (Eccl. 12:13) Mme utịtmbuba eke spirit ẹn̄wam nnyịn ndiwụk ntịn̄enyịn ke ndinam uduak Abasi. Ke ntre, ẹyak nnyịn ida mme utịtmbuba nnyịn inọ Andibot nnyịn ubọn̄.