Ikpehe 2: Ndinịm Ukpepn̄kpọ Bible Oro Enyenede Uforo
Nditịm Idem Ndinịm Ukpepn̄kpọ
1 Ndinịm ukpepn̄kpọ Bible oro enyenede uforo abuana se ikande edineme ibuotikọ ye edikot mme itie N̄wed Abasi oro ẹsiakde ẹsịn. Nnyịn inyene ndikpep n̄kpọ ke usụn̄ oro esịmde esịt eyen ukpepn̄kpọ. Emi oyom eti ntịmidem onyụn̄ oyom ikere iban̄a eyen ukpepn̄kpọ oro.—N̄ke 15:28.
2 Nte Ikpetịmde Idem: Tọn̄ọ ke ndibọn̄ akam nnọ Jehovah mban̄a eyen ukpepn̄kpọ ye mme n̄kpọ oro enye oyomde. Ben̄e Jehovah an̄wam fi esịm esịt eyen ukpepn̄kpọ. (Col. 1:9, 10) Man etịm ọfiọk se ibuot nneme edide, da ini tie kere mme ikọ ibuotikọ m̀mê ukpepn̄kpọ oro, n̄kpri ibuotikọ, ye mme ndise. Bụp idemfo, ‘Nso idi akpan uduak ibuotikọ emi?’ Emi ayan̄wam fi ndiwụk ekikere ke mme akpan n̄kpọ nte enịmde ukpepn̄kpọ oro.
3 Tịm dụn̄ọde ikpehe ekikere kiet kiet ke ibuotikọ emi. Yom ibọrọ ke mbụme oro ẹmịn̄de-mịn̄, odụride udịm ke mme ọkpọ ikọ kpọt. Dụn̄ọde ebuana oro mme itie N̄wed Abasi oro ẹsiakde ẹsịn ẹnyenede ye akpan n̄kpọ oro odude ke ikpehe ekikere, nyụn̄ mek mbon oro ẹdikotde ke ini ukpepn̄kpọ. Afo emekeme ndikụt ke ọfọn ndiwet n̄kpri n̄kpọ ke mben n̄wed oro. Eyen ukpepn̄kpọ ekpenyene ndikụt in̄wan̄-in̄wan̄ ke se imọ ikpepde oto Ikọ Abasi.—1 Thess. 2:13.
4 Nam Ukpepn̄kpọ oro Ebehe Eyen Ukpepn̄kpọ: Ekem, kere ban̄a eyen ukpepn̄kpọ ke ini etịmde idem ọnọ ukpepn̄kpọ. Domo ndikere mme mbụme oro enye edibụpde ye mme n̄kpọ oro mîdin̄wan̄ake enye m̀mê oro ẹdisọn̄de enye ndinyịme. Bụp idemfo: ‘Nso ke enye enyene ndifiọk m̀mê ndinam man anam n̄kọri ke n̄kan̄ eke spirit? Didie ke n̄keme ndisịm esịt esie?’ Ekem, nam ukpepn̄kpọ fo asan̄a ekekem ye ibọrọ mbụme oro. Ke ndusụk idaha, afo emekeme ndikụt ke ọfọn nditịm uwụtn̄kpọ, edinam an̄wan̄a, m̀mê udịm udịm mbụme oro ẹdin̄wamde eyen ukpepn̄kpọ ndifiọk ndusụk n̄kpọ oro ẹtịn̄de m̀mê itie N̄wed Abasi. (Neh. 8:8) Edi kûsịn mme n̄kpọ oro mînyeneke ebuana ye ibuot nneme oro. Ibio ibio edifiak ndụn̄ọde ke utịt ukpepn̄kpọ ayan̄wam enye nditi mme akpan n̄kpọ.
5 Nso n̄kpọ idatesịt ke edi ntem ke ini mbufa owo ẹn̄wụmde mfri oro adade itoro ọsọk Jehovah! (Phil. 1:11) Man an̄wam mmọ ẹsịm utịt-mbuba oro, tịm idem mfọn mfọn kpukpru ini oro oyomde ndinịm ukpepn̄kpọ Bible.