Edidụk Mbono Esop Kpukpru Ini—Ebeiso N̄kpọ
1 Se idide ebeiso n̄kpọ ke uwem ubon Christian edi edidụk mme mbono esop kpukpru ini. Edi mme n̄kpọ oro ẹyomde ke uwem mfịn ẹkeme ndikama n̄kpọ-ata. Ndi utomufọk, utom idịbi udia, m̀mê utom ufọkn̄wed ẹtọn̄ọ ndidia ini oro ẹnịmde ẹnọ utuakibuot Jehovah? Ndise n̄kpọ nte Jehovah esede ayan̄wam nnyịn ndinịm mme ebeiso n̄kpọ ke itie mmọ.—1 Sam. 24:6; 26:11.
2 Ke nditan̄ ifia ke usen Sabbath, eyen Israel kiet ama okokoi etre ndise n̄kpọ nte Jehovah esede. Eyedi enye ekekere ke imọ n̄kukụre iketịm n̄kpọ inọ ubon imọ m̀mê nte ke oro ekedi sụk ekpri n̄kpọ. Nte ededi, ebede ke ubiereikpe oro ẹkenọde, Jehovah ama owụt ke ndida ini oro ẹnịmde ẹnọ utuakibuot nnam mme n̄kpọ obụkidem edi ata idiọkn̄kpọ.—Num. 15:32-36.
3 Ndise Mban̄a N̄kpọ-ata Emi: Edi ata ọkpọsọn̄ n̄kpọ ọnọ ediwak owo ndinam utom idịbi udia okûbiọn̄ọ edidụk mbono esop. Ndusụk owo ẹse ẹban̄a n̄kpọ-ata emi ebe ke ndinyene nneme ye eteutom mmọ, ndikpụhọ ini utom ye mme nsan̄autom, ndiyom utom oro etịmde odot, m̀mê ndidu mmemmem uwem. Ke akpanikọ, orụk n̄waidem oro ẹnamde mi ke ntak utuakibuot akpanikọ enem Abasi esịt.—Heb. 13:16.
4 Utom ufọkn̄wed n̄ko ekeme ndikama mfịna. Uyen kiet ọkọdọhọ ete: “Nsinam ndusụk utom ufọkn̄wed mi mbemiso n̄kade mbono esop ndien nnam se isụhọde ke ini nnyọn̄de ndi.” Edieke nditọ mîkemeke ndinam kpukpru utom ufọkn̄wed ke usen oro ẹnịmde mbono esop, ndusụk mme ete ye eka ẹsika ẹkenam an̄wan̄a mme andikpep nte ke edidụk mme mbono esop Christian edi ebeiso n̄kpọ ọnọ ubon mmimọ.
5 Oyom edidianakiet ye eti ndutịm man ubon okụre utom ke ufọk onyụn̄ eben̄e idem ndidụk mme mbono esop ke eti ini. (N̄ke 20:18) Ẹkeme ndikpep idem n̄kpri nditọ ndisịne ọfọn̄ nnyụn̄ mben̄e idem ndika mbono esop ke ini oro ẹnịmde. Ebede ke uwụtn̄kpọ oro mmọ ẹnịmde, mme ete ye eka ẹkeme ndikpep nditọ mmọ nte edidụk mme mbono esop edide akpan n̄kpọ.—N̄ke 20:7.
6 Nte mme mfịghe eke editịm n̄kpọ emi ẹkade iso ndisọn̄ ubọk, edi akpan n̄kpọ nnyịn ndidụk mme mbono esop kpukpru ini. Nnyịn ikpakam ika iso ndise n̄kpọ nte Jehovah esede inyụn̄ iyak edidụk mbono esop kpukpru ini edi ebeiso n̄kpọ.—Heb. 10:24, 25.