Ndutịm Esoputom

Urua Ọtọn̄ọde October 13

Ikwọ 215

Min. 10: Mme ntọt n̄kann̄kụk ye Mme Ntọt ẹsatde-sat ẹto Utom Obio Ubọn̄ Nnyịn. Ti mme asuanetop ndinọ ibatutom an̄wautom ufọtọfiọn̄ October. Sịn udọn̄ nọ kpukpru owo ndida ediye uduot ekpri n̄wed Usụn̄ Adade Esịm Uwem ndi Esoputom urua efen nyụn̄ dọhọ mmọ ẹdụn̄ọde mme akpan n̄kpọ ndutịm mbono circuit eke isua emi oro mmọ ẹkewetde ẹnịm ke nditịm idem nnọ Esoputom urua efen. Ke adade mme ekikere ẹnọde ke page 1, dọhọ ẹnam nnamn̄wụt iba ke nte ẹkpenọde Enyọn̄-Ukpeme October 15 ye Awake! October 22. Ke idaha kiet kiet, ẹkpenyene ndidian magazine mbiba nnọ, okposụkedi ẹditịn̄de n̄kpọ ẹban̄a kiet. Ke nnamn̄wụt emi kiet, wụt nte ẹfiakde ẹbịne owo oro ẹsinọde mme magazine. Sịn itiat idakisọn̄ nọ mfiakn̄ka efen ke ndidụri ntịn̄enyịn n̄ka ekebe oro “Ke Nsiondi Nnyịn Efen.”—Se Utom Obio Ubọn̄ Nnyịn eke October 1998, p. 8, ikp. eki. 7-8.

Min. 20: Da Ofụt Spirit Nam N̄kpọ. (Eph. 6:17) Nneme otuowo emi ọkọn̄ọde ke n̄wed Ufọkn̄wed Utom, page 143-144. Dọhọ ẹbọrọ mme mbụme emi: (1) Ntak emi nnyịn isidade Bible ibọrọ mme mbụme? (2) Nso ke enyịn̄ oro Mme Ntiense Jehovah owụt aban̄a nnyịn? (3) Nso uwụtn̄kpọ ke Jesus ekenịm, ndien didie ke nnyịn ikeme ndikpebe enye? (4) Ke efakutom n̄kann̄kụk, ewe edi ndusụk usụn̄ oro ẹnyenede ufọn ndida ekikere Bible nsịn ke nneme? (5) Ntak ọfọnde ndikot nnennen nnennen nto Bible ke ini ekededi oro ikemede? (6) Didie ke mbiowo ẹkeme ndisịn udọn̄ nnọ mbon en̄wen ndida Bible nnam n̄kpọ ke eti usụn̄? Sịn nnamn̄wụt kiet oro ẹma ẹketịm idem ọfọn ọkọn̄ọde ke utom oro ẹnọde ẹnam ke page 144 emi asuanetop oro odotde adade ke nsụhọde n̄kaha itie N̄wed Abasi kiet ọbọrọ mbụme. Sịn udọn̄ nọ kpukpru owo ndinam edi utịtmbuba mmọ ndida Bible nnam n̄kpọ kpukpru ini oro mmọ ẹnọde ikọ ntiense.

Min. 15: Ndinịm Ukpepn̄kpọ Bible Ada Mme Edidiọn̄ Edi. Utịn̄ikọ ye nneme otuowo. Bụk ibat ibat ifiọkutom to mme n̄wed nnyịn ẹban̄ade mme ukpepn̄kpọ Bible oro ẹnyenede n̄kọri. (w00-EF 3/1 p. 6; yb98-E p. 55-60) Dọhọ otuowo ẹtịn̄ se mmọ ẹkpepde ẹto mme ifiọkutom oro ye nte nnyịn ibọde ufọn ke ndinịm ukpepn̄kpọ Bible.

Ikwọ 172 ye akam ediberi.

Urua Ọtọn̄ọde October 20

Ikwọ 86

Min. 5: Mme ntọt n̄kann̄kụk.

Min. 20: “Ndinọ Usụn̄ Oro Adade Esịm Nsinsi Uwem—Nte Afo Omokụt Enye?” Esenyịn utom edise aban̄a emi nte utịn̄ikọ ye nneme otuowo. Dọhọ ẹnam iba ke otu mme ekikere oro ẹnọde mi ẹwụt. Ke nnamn̄wụt oro kiet, wụt nte ẹkpetọn̄ọde ukpepn̄kpọ Bible. Sịn udọn̄ nọ ubon ye mbon eken ndidomo mme ekikere oro ẹnọde mi nse ke ufọk. Kpukpru owo ẹkpenyene ndida obufa ediye uduot ekpri n̄wed emi nnam n̄kpọ nte ọfọnde koro edi enye ke ẹdinọ ke November. Ke ọfiọn̄ oro ebede, ka iso da enye nam n̄kpọ nte ọfọnde ke efakutom mbufo nyụn̄ da enye tọn̄ọ ukpepn̄kpọ Bible.

Min. 20: “Buọt Idem ye Jehovah Nyụn̄ Nam Se Ifọnde.” (Ps. 37:3) Nneme otuowo ọkọn̄ọde ke mme mbụme oro ẹtienede mi, oro owụtde mme akpan n̄kpọ ke ndutịm mbono circuit isua utom emi ekebede. Dọhọ otuowo ẹnam ibọrọ mmọ ẹsịne nte mmọ ẹkekemede ndida mme akpan n̄kpọ mbono emi nsịn ke edinam ke ọkpọkpọ uwem mmọ m̀mê nte ubon. Neme mme ikpehe ndutịm emi: (1) “Ndiwụt Mbuọtidem ke Jehovah.” Ntak edide akpan n̄kpọ ndiwụt mbuọtidem ke Jehovah ke kpukpru ikpehe uwem? (it-2-E p. 521) Didie ke Watch Tower Publications Index ekeme ndin̄wam nnyịn? (2) “Ẹkpeme Idem ye Mme ikpîkpu N̄kpọ Uwem.” (Eccl. 2:4-8, 11) Mme ikpîkpu utom ewe ke ana nnyịn ikpeme ibiọn̄ọ, ndien didie ke nnyịn ikeme ndinam emi? (3) “Ẹfehe Ẹkpọn̄ Idiọk—Ẹdi Mme Anam Eti.” Ntak edide akpan n̄kpọ ndisọn̄ọ nyịre ke mme edumbet Jehovah? (Isa. 5:20) Nti utom ewe ke nnyịn ikpesịn idem inam? (4) “Ndika Iso Mbuọt Idem ye Jehovah.” Nso idin̄wam nnyịn ndisọn̄ọ nda ke ini isobode mme idomo? Ntak ekemede ndiyom nnyịn iyak ndusụk n̄kpọ isịn Jehovah ke ubọk? (5) “Nte Ẹyebat ke Afo Omodot Ndidụk Obio Ubọn̄ Abasi?” (Col. 1:10) Mme uwụtn̄kpọ Bible ewe ẹdemede nnyịn ndika iso nsan̄a nte odotde Jehovah? (6) “Buọt Idem ke Mme Un̄wọn̄ọ Jehovah.” Didie ke ndinam emi editụk uwem nnyịn?

Ikwọ 58 ye akam ediberi.

Urua Ọtọn̄ọde October 27

Ikwọ 64

Min. 12: Mme ntọt n̄kann̄kụk. Ntọt ibatokụk. Ti mme asuanetop ete ẹnọ ibatutom an̄wautom utịtọfiọn̄ October. Sịn udọn̄ nọ kpukpru owo ndidụn̄ọde mme akpan n̄kpọ ndutịm usen akpan mbono isua emi, oro mmọ ẹkewetde ẹnịm ke nditịm idem nnọ Esoputom urua efen. Ke adade mme ekikere ẹnọde ke page 1, dọhọ ẹnam nnamn̄wụt iba ke nte ẹkpenọde Enyọn̄-Ukpeme November 1 ye Awake! November 8. Ke idaha kiet kiet, ẹkpenyene ndidian magazine mbiba nnọ, okposụkedi ẹditịn̄de n̄kpọ ẹban̄a kiet. Ke nnamn̄wụt emi kiet, wụt nte ẹkpebọrọde ikọ utre nneme emi, “Nnyeneke udọn̄.”—Se ekpri n̄wed Nte Ẹkpetọn̄ọde Nneme, p. 8.

Min. 20: “Ẹnam N̄kpọ Ẹnọ Jehovah ke Idatesịt.”a Ke ama ekeneme ikpehe ekikere 4, tịn̄ ke idinọ ediye uduot ekpri n̄wed Usụn̄ Adade Esịm Uwem ke November. Fiak tịn̄ ibio ibio ban̄a kiet ke otu mme nneme oro ẹnọde ekikere ẹban̄a ke esịne-esịt Utom Obio Ubọn̄ Nnyịn eke January 2002. Ekem wụt ndomonse oro ẹnamde-nam nneme oro ẹwụt. Sịn udọn̄ nọ kpukpru owo nditịm idem ọfọn nnọ an̄wautom.

Min. 13: Mme ifiọkutom n̄kann̄kụk. Dọhọ otuowo ẹbụk ifiọkutom oro mmọ ẹkenyenede ke ini ẹkenọde ikọ ntiense ido nneme ke itieutom, ufọkn̄wed, m̀mê ke ebiet efen.

Ikwọ 52 ye akam ediberi.

Urua Ọtọn̄ọde November 3

Ikwọ 147

Min. 5: Mme ntọt n̄kann̄kụk.

Min. 15: Mme udọn̄ n̄kann̄kụk.

Min. 25: Ẹnam Nti Utom Uwak-Uwak. (1 Tim. 6:18) Ke adade mme mbụme oro ẹnọde mi, ebiowo ada usụn̄ ke nneme ye ebuana otuowo ke ndutịm usen akpan mbono oro ẹkenịmde isua emi. Dọhọ esop ẹtịn̄ nte mmọ ẹkekemede ndida se mmọ ẹkekpepde nsịn ke edinam. (Ẹkeme ndibabak nnọ mme owo ikpehe man ẹtịm idem.) Sio mme akpan n̄kpọ wụt ke mme ikpehe ndutịm emi ẹtienede mi: (1) “Nti Utom Ẹda Ikpọ Utịp Ẹdi.” (Eccl. 2:11) Ntak emi mme asan̄autom Abasi ẹkade iso ndinam nti utom oro ẹtịn̄de ẹban̄a ke Ikọ Abasi utu ke ndinam mme ikpîkpu utom eke ererimbot emi? (2) “Nyene Inyene ke N̄kan̄ Abasi.” (Matt. 6:20) Didie ke ndusụk owo “ẹbon n̄kpọ-uto ẹnịm ẹnọ idem ke heaven,” ndien ye nso utịp? (3) “Da Ukpepn̄kpọ Bible Fori Utom Ukwọrọikọ Fo.” (om-EF p. 91) Nso ikeme ndin̄wam nnyịn nditọn̄ọ nnyụn̄ nnịm ukpepn̄kpọ Bible? (4) “Nti Utom ke Ini Idọk Emi.” (Matt. 13:37-39) Nso uwụtn̄kpọ nti utom ke mme akpa Christian ẹkenịm, ndien didie ke utom Obio Ubọn̄ atara ke eyo nnyịn? (5) “Ẹyak Nti Utom Mbufo Ẹnọ Jehovah Ubọn̄.” (Matt. 5:14-16) Didie ke ndusụk owo ‘ẹyak un̄wana mmọ ayama’? (6) “Ndikọm Mme Uyen Kaban̄a Nti Utom Editoro Jehovah.” (Ps. 148:12, 13) Didie ke mme uyen Christian ke circuit nnyịn ẹtoro Jehovah? (7) “Ẹka Iso ke Nti Utom Ẹnyụn̄ Ẹbọ Mme Edidiọn̄ Jehovah.” (N̄ke 10:22) Nte nnyịn ikade iso ndinam nti utom, mme edidiọn̄ ewe ke nnyịn ikeme ndibọ nte owo kiet kiet, nte ubon, nte esop, ye nte esop eke ofụri ererimbot?

Ikwọ 180 ye akam ediberi.

[Ikọ idakisọn̄]