Nti Edu—Ido Mme Abak Abasi
1 Nti edu iwakke mfịn. Ntak edide ntre? Mme owo ẹdu uwem itọk itọk tutu mmọ iwakke ndikere mban̄a mme akpan nti edu, utọ nte edidọhọ “Mbọk,” “Sọsọn̄ọ,” m̀mê “Mbọk kûyat esịt.” Ikọ Abasi ama ebem iso etịn̄ aban̄a nte mme edu ẹdinen̄erede ẹdiọk ke ukperedem ini emi ke ini enye ọdọhọde ete ke mme owo ẹyedi ‘mme ama idem, ẹnyụn̄ ẹbụre idiọk mbụre, ẹseri iseri, ẹnana esịt ekọm, ẹnana ima uduot owo, ẹyak idiọk itọn̄ akan mmọ ubọk, ẹnyụn̄ ẹsua se ifọnde, [ẹnyụn̄ ẹdi] mbon idiọk iwụk.’ (2 Tim. 3:1-4) Kpukpru utọ ido oro ẹtịp ẹsịn ke ndiọi edu. Nte mme abak Abasi, mme Christian ẹnyene ndikpeme mbak ẹditiene usụn̄ ererimbot emi mîwụtke ukpono inọ mbon efen.
2 Nso Idi Nti Edu? Ẹkeme nditịn̄ mban̄a nti edu nte ntotụn̄ọ edikere mban̄a ntụk mbon efen, ukeme edidụn̄ ye mbon efen ke emem. Mme ikpehe nti edu ẹdi edikere mban̄a, mbukpek, mfọnido, eti ido, ediwụt usọ, ye edinọ ntịn̄enyịn. Mme edu emi ẹtọn̄ọ ẹto ima emi owo enyenede ọnọ Abasi ye mbọhọidụn̄. (Luke 10:27) Mmọ ikpaha okụk ndomokiet, edi mmọ ẹnyene ufọn ke ndifori itie ebuana nnyịn ye mbon efen.
3 Jesus Christ enịm mfọnmma uwụtn̄kpọ. Enye ama esinịm Mfọnmma Ibet emi kpukpru ini: “Nte mbufo ẹyomde owo ẹnam ye mbufo, ẹnam kpa ntre ye mmọ.” (Luke 6:31) Nte idem ikpaha nnyịn iban̄a edikere mban̄a ye ima ima edu Jesus ke ndinam n̄kpọ ye mme mbet esie? (Matt. 11:28-30) Nti edu esie ikotoho mme ibet oro ẹwetde m̀mê n̄wed nti ido uwem. Mmọ ẹketo esịt akpanikọ ye eti esịt. Ana nnyịn idomo ndikpebe eti uwụtn̄kpọ esie.
4 Ini ewe ke oyom mme Christian ẹnyene nti edu? Nte edi n̄kukụre ke mme ini akpan edinam, ke ini ẹkerede ẹban̄a ndinam eti enyịn̄? Nte ẹyom mmọ n̄kukụre ke ini ẹdomode ndinyene unyịme mbon efen? Baba! Nnyịn inyene ndiwụt nti edu kpukpru ini. Ke mme usụn̄ ewe akpan akpan ke nnyịn ikpenyene ndikere mban̄a emi ke ebuana nnyịn ye kiet eken ke esop?
5 Ke Ufọkmbono Obio Ubọn̄: Ufọkmbono Obio Ubọn̄ edi ebiet utuakibuot nnyịn. Jehovah Abasi okot nnyịn ete idi do. Ke usụn̄ifiọk oro ke nnyịn idi isenowo. (Ps. 15:1, NW) Nte nnyịn idi isenowo oro inịmde eti uwụtn̄kpọ ke ini nnyịn idide Ufọkmbono Obio Ubọn̄? Nte nnyịn imesinọ ntịn̄enyịn oro odotde ke ọfọn̄ ye ukamaidem nnyịn? Ke akpanikọ nnyịn ikpoyom ndifep mbanaidem oro etiede nsuahade nsuahade m̀mê oro ebede ubọk. Edide idụk ikpọ mbono m̀mê mme mbono esop nnyịn eke urua ke urua, ẹdiọn̄ọ ikọt Jehovah ke eti edu usịnen̄kpọ mmọ nte odotde mmọ emi ẹdọhọde ke imenyene uten̄e Abasi. (1 Tim. 2:9, 10) Ntem nnyịn iwụt edikere mban̄a emi odotde ye ukpono inọ Enyeneufọk nnyịn eke heaven ye isenowo eken oro ẹkekotde.
6 Usụn̄ efen emi nnyịn iwụtde nti edu nnyịn ke ebuana ye mme mbono esop edi ndika ke eti ini. Nte ẹnyịmede, emi isidịghe mmemmem n̄kpọ kpukpru ini. Ndusụk owo ẹkeme ndidụn̄ ke ebiet oro etịmde oyom usụn̄ mîdịghe ẹnyene akamba ubon nditịm idem. Nte ededi, ẹkụt ke ndusụk esop nte ke se iwakde isịm mbahade 25 eke ikie ke otu mme asuanetop ẹnyene mbumehe edika ke ẹma ẹkekụre ikwọ ye akam ediberede. Emi edi akpan n̄kpọ. Ọfọn nditi nte ke nti edu ẹnyene n̄kpọ ndinam ye edikere mban̄a mme ntụk mbon efen. Jehovah, kpa eti Enyeneufọk, eketịm akamba udia eke spirit emi ke ufọn nnyịn. Nnyịn iwụt esịtekọm ye edikere mban̄a inọ mme ntụk esie ebe ke ndika ke eti ini. Adianade do, ndika mme mbono esop ke idiọk ini esiwọn̄ọde ntịn̄enyịn mme owo onyụn̄ owụt unana ukpono ọnọ mbon oro ẹma ẹkedodu ke itie.
7 Ke ini nnyịn isopde idem, nte nnyịn imesitịn̄ enyịn ise mbufa owo oro ẹdụkde? Ndidara mmọ edi ubak ediwụt eti edu. (Matt. 5:47; Rome 15:7) Inem inem ekọm, ufiop ufiop edikọm ubọk, edituak inua imam—kpukpru ẹdi n̄kpri n̄kpọ, edi mmọ ẹtịp ẹsịn ke se ẹdade ẹdiọn̄ọ nnyịn nte mme ata Christian. (John 13:35) Ke ama ekedi Ufọkmbono Obio Ubọn̄ ke akpa ini, eren kiet ọkọdọhọ ete: “Mma nsobo ye mbon oro ẹnen̄erede ẹnyene ata ima, ata isenowo, ke usen kiet n̄kan nte akanam nsobode ke ufọkederi oro ẹkemande mi ẹsịn. Ama ana in̄wan̄-in̄wan̄ nte ke mma n̄kụt akpanikọ.” Nte utịp, enye ama okpụhọde usụn̄ uwem esie, ndien ọfiọn̄ itiaba ke ukperedem, enye ama ana baptism. Ih, nti edu ẹkeme ndinyene nti utịp!
8 Edieke nnyịn iwụtde isenowo oro nnyịn isobode eti edu, nte nnyịn ikpanamke ntre “akpan-akpan ye mmọ emi ẹtode ke ufọk mme andinịm ke akpanikọ”? (Gal. 6:10) Edumbet emi enyene ebuana: “Kpono ebio-owo iso.” (Lev. 19:32) Owo ikpedehede ifụmi utọ mbon emi ke mme mboho nnyịn.
9 Ndinọ Ọyọhọ N̄kpan̄utọn̄: Ke mbono esop, mme Christian asan̄autom Abasi ẹtịn̄ ikọ man ẹnọ nnyịn ndusụk enọ eke spirit ndibọp nnyịn. (Rome 1:11) Ekpenen̄ede ọwọrọ nnyịn ndiwụt ata idiọk edu edieke nnyịn ikpedede idap, itade chewing gum, idọn̄de odu ndien ndien ye owo oro etiede ekpere nnyịn, ikade itie uken̄idem nte mîdotke, ikotde mme n̄wed oro mînyeneke ebuana ye edinam, m̀mê isede iban̄a mme n̄kpọ eken ke ini mbono esop. Mbiowo ẹkpenyene ndinịm eti uwụtn̄kpọ ke afan̄ emi. Nti edu uwem Christian oyonụk nnyịn ndiwụt etịn̄ikọ ye etop esie emi ọkọn̄ọde ke Bible nnennen ukpono ebe ke ndinọ enye ọyọhọ n̄kpan̄utọn̄.
10 Adianade do, ke ntak edikere mban̄a etịn̄ikọ ye otuowo, nnyịn ikpayakke urụk ukopikọ oro ẹkamade-kama ẹsan̄a etịmede mme mbono esop nnyịn.
11 Edu ye Nditọwọn̄: Mme ete ye eka ẹkpenyene nditịn̄ enyịn ke edu nditọ mmọ. Ke ini ekpri eyen ọtọn̄ọde nditua eyet m̀mê esịnde ntịme ke ini mbono esop ndien emi etịmerede mbon efen, ọfọn ndida eyen oro n̄wọrọ ke ufọk mbono usọp usọp nte ẹkekeme man ẹnam enye odop uyo. Emi ekeme ndisọn̄ ke ndusụk idaha, edi ti ete ke emi owụt ete ke afo emekere aban̄a ntụk mbon efen. Mme ete ye eka emi ẹnyenede n̄kpri nditọ oro ẹtiede nte ẹyesịn ntịme ẹsiwak ndimek nditie ke edem edem ufọk mbono mbak ẹkûtịmede ediwak owo edieke oyomde mmọ ẹwọrọ ke ini mbono esop akade iso. Nte ededi, mbon eken oro ẹdụkde ẹkeme ndikere mban̄a mme ubon ebe ke ndiyak mme n̄kpọitie edem ẹna man mmọ ẹtie, edieke ẹmade.
12 Mme ete ye eka n̄ko ẹnyene ndifiọk edu nditọ mmọ mbemiso ye ke mme mbono esop ẹsuanade. Nditọwọn̄ ikpenyeneke ndifehe itọk ke esịt ufọk mbono, sia emi ekeme ndida mbabuat n̄kpọntịbe ndi. Ndifehe itọk ke an̄wa Ufọkmbono Obio Ubọn̄ ekeme n̄ko ndikama n̄kpọndịk, akpan akpan ke mbubịteyo ke ini owo mîtịmke ikụt usụn̄. Nditịn̄ ikọ uyo ọsọn̄ ke an̄wa ekeme nditịmede mme mbọhọidụn̄ onyụn̄ anam ẹda utuakibuot nnyịn ke idiọk usụn̄. Ẹnyene nditoro mme ete ye eka oro ẹsịnde ukeme ofụri esịt ndinọ nditọ mmọ ndausụn̄ ke esịt ye ke an̄wa Ufọkmbono Obio Ubọn̄ koro emi etịp esịn ke ndinam idụn̄ nnyịn ke idem ọtọkiet eye.—Ps. 133:1.
13 Ke Ukpepn̄kpọ N̄wed: Nnyịn imowụt esịtekọm iban̄a ntatubọk nditọete nnyịn oro ẹnọde mme ufọk mmọ ndinịm mme mbono esop. Ke ini idụkde, nnyịn ikpenyene ndiwụt ukpono ye edikere mban̄a nnọ inyene mmọ. Mbemiso idụkde, nnyịn ikpenyene nditịm n̄kwọhọde ikpaukot nnyịn mbak ididehe isọn̄ m̀mê ubrin̄kpọ isọn̄ufọk. Mme ete ye eka ẹkpenyene ndinọ nditọ mmọ ndausụn̄, ẹkụtde ẹte ke mmọ ẹdu ke ikpehe ufọk oro ẹnịmde ẹnọ ukpepn̄kpọ n̄wed. Ke adan̄aemi otu emi ekemede ndikpri ndien ke ndusụk udomo onyụn̄ okpụhọrede, nnyịn ikpenyeneke ndinam n̄kpọ mbe adan̄a ke ufọk mbon efen. Ete m̀mê eka ekpri eyen ekpenyene ndisan̄a ye enye ke ini akade itie uken̄idem. Ke adianade do, sia ukpepn̄kpọ n̄wed edide mbono esop, nnyịn ikpenyene ndisịne n̄kpọ nte isisịnede ke ini ikade Ufọkmbono Obio Ubọn̄.
14 Nti Edu Ẹdi Akpan N̄kpọ: Ndinyene nti edu Christian iwụtke utom ukwọrọikọ nnyịn ke eti usụn̄ kpọt, edi enye esịn udọn̄ n̄ko ọnọ eti itie ebuana ye mbon efen. (2 Cor. 6:3, 4, 6) Nte mme andituak ibuot nnọ Abasi inemesịt, nnyịn mmemmem mmemmem ikpenyene ndituak inua imam, nditie inemesịt inemesịt, idem ndinyụn̄ nnam n̄kpri nti n̄kpọ emi ẹdade idatesịt ẹsọk mbon efen. Nti edu emi ẹyenam nnyịn idu eti uwem nte mme abak Abasi.