Itie Ebuana Christian Edi Akpan N̄kpọ Adan̄a Didie?
1 “Eto idaha ikpọn̄ ikabade akai.” Ikọ oro n̄kukụre afiak etịn̄ se Bible eketịn̄de aban̄a akpan udọn̄ owo—itie ebuana. (N̄ke 18:1) Itie ebuana Christian nnyịn ọyọhọ udọn̄ emi. Ke nso mme usụn̄ emi ẹnyenede ufọn?
2 Ke Utom Ukwọrọikọ: Kiet ke otu akakan ufọn edi usụn̄ emi nditọete nnyịn ẹsisọn̄ọde nnyịn idem ẹnyụn̄ ẹn̄wamde nnyịn ke an̄wa-an̄wa utom ukwọrọikọ. Jesus ọkọdọn̄ mme mbet esie ẹsan̄a “iba iba” ẹka ukwọrọikọ. (Mark 6:7; Luke 10:1) Ke n̄kemuyo ye uwụtn̄kpọ emi, ke ini nnyịn isan̄ade ye mbon efen ke utom an̄wautom, nnyịn imokụt akpanikọ oro odude ke Ecclesiastes 4:9, 10. Nte nnyịn inamde utom ukwọrọikọ nnyịn ọtọkiet, mbuọtidem, n̄kopitem, ye ima oro inyenede inọ nsan̄a nnyịn ọnọ nnyịn uko onyụn̄ anam ifịk nnyịn okop idem.
3 Kaban̄a Ọkpọkpọ Un̄wam: Itie nditọete nnyịn n̄ko edi ebiet emi nsịnudọn̄ ye ndausụn̄ ẹtode ke ndise mban̄a mfịghe nnyụn̄ mbiọn̄ọ mme idomo. Nsan̄a Christian nnyịn ekeme ndidụri ntịn̄enyịn nnyịn n̄wụt mme itien̄wed oro ẹtịn̄de n̄kpọ ẹban̄a mme ọkpọkpọ udọn̄ nnyịn. Mmọ ẹkam ẹkeme ndibọn̄ akam ke ibuot nnyịn, kpa nte nnyịn isinamde inọ mmọ. (2 Cor. 1:11) Ndien ke akpanikọ eti uwụtn̄kpọ mmọ onụk nnyịn ndinam nti utom onyụn̄ ọsọn̄ọ nnyịn idem.
4 Ke Mme Mbono Esop: Nnyịn ibọ edidiọn̄ ito itie ebuana Christian ke ini nnyịn idụkde mme mbono esop kpukpru ini. (Heb. 10:24, 25) Ndutịm emi ọyọhọ ye item eke spirit, ndien nnyịn ndidu ke mme mbono esop anam nnyịn idu ikpere ekemmọ mme andinịm ke akpanikọ. Mboho emi ọnọ nnyịn ifet ndikop nte nditọete nnyịn iren ye iban ẹtịn̄de mbuọtidem mmọ, edide ke mbot utịn̄ikọ m̀mê ke otuowo. (Rome 1:12) Mbọbọ itie ebuana nnyịn aka iso ọsọn̄ọ nte nnyịn inyenede nneme mbemiso ye ke mme mbono esop ẹsuanade. Utọ mme idaha oro ẹnọ nnyịn ifet ndinọ mme ifiọkutom nnyịn emi ọbọpde mbuọtidem. Emi otụk mme edu nnyịn ke eti usụn̄ ke ini nnyịn isan̄ade ifụre ifụre ye mbon oro ẹmade Jehovah, Ikọ esie, utom esie, ye ikọt esie.—Phil. 2:1, 2.
5 Nnyịn imoyom mme nsan̄a Christian nnyịn. Ke mmọ mîdụhe, ndisan̄a ke mfafaha usụn̄ oro adade esịm uwem eyetịm ọsọn̄. Nte ededi, ke ima ye nsịnudọn̄ mmọ, nnyịn iyekeme ndika iso nsan̄a n̄ka edinen obufa ererimbot Jehovah.—Matt. 7:14.