Ntọt M’ọkwọrọ Obio Ubọn̄
To ke Mfụhọ Sịm Idatesịt
JEHOVAH edi Abasi idatesịt. (Timothy 1:11, NW) Enye oyom mbon oro ẹnamde n̄kpọ esie ẹkop idatesịt n̄ko. Ntem, edieke asan̄autom esie kiet okopde mfụhọ, Jehova eyen̄wam enye ndiyọ ubiak oro ndien ke ndusụk idaha akam afiakde enyene edu idatesịt. Ifiọkutom etienede mi, emi otode Uruguay anam emi an̄wan̄a.
Eyenete an̄wan kiet ke ekebet ke ufọkibọk kiet ke Montevideo ndibọ ibọrọ useidem ẹdiọn̄ọde nte X-ray. N̄wan kiet oro eketiede adiana enye ama odu ke ọkpọsọn̄ oyomonsia aban̄a se dọkta edisiande enye nte ibọrọ useidem oro enye akanamde. Eyenete an̄wan emi ama asian enye ete ke tọn̄ọ nte imọ ikedi Ntiense inọ Jehovah, imọ ikopke ndịk iban̄a n̄kpọ ndomokiet. Nte ededi, n̄wan oro ama ọdọhọ ete ke imọ imaha Mme Ntiense koro mmọ ẹyomde ata n̄kokon̄ idaha ẹto mme owo.
Eyenete an̄wan emi ama asian enye nte ifiọk akpanikọ Bible akan̄wamde imọ. Eyenan̄wan imọ edide isua-18 ke emana ama akpa ndien imọ ima idu ke ata ọkpọsọn̄ mfụhọ ke isua itiaita. Mbiaibọk udọn̄ọ ibuot m̀mê nsọn̄urua ibọk ikan̄wamke imọ ndikan mfụhọ emi. Enye ọkọdọhọ ete, ediwak ini, ẹma ẹnịm imọ ke ufọkibọk, edi ufọn ndomokiet ikodụhe. Nditọ-ufọk ẹkekabade ese ufọk imọ enyịn sia imọ ke idem imọ mîkekemeke ndise enyịn ke n̄kpọ ndomokiet. Imọ ima idomo ndiwot idem sia imọ mîkenyeneke udọn̄ ke uwem. N̄kpọ ndomokiet ikan̄wamke.
Ekem, enye ama asian n̄wan oro ete, usen kiet Mme Ntiense Jehovah ẹma ẹwaha ẹnyụn̄ ẹnọ imọ ndusụk n̄wed ukpep Bible. Oro ama edemede imọ udọn̄ ke Ikọ Abasi, ndien imọ ima itọn̄ọ ndikot Bible kpukpru ini. N̄kpọ ẹma ẹtọn̄ọ ndikpụhọde ke idem imọ. Imọ ima isitọn̄ọ ndidaha nda ke usenubọk inyụn̄ inyene udọn̄ ke ufọk imọ. Ke akpatre imọ ima ibiere ndise ufọk enyịn ke idem imọ inyụn̄ ikụt ite ke imọ ima ikeme ndinam ntre. Enye eketie nte n̄kpọ eke imọ mîkọdọn̄ọke akanam! Emi ama anam imọ ikop idatesịt eti eti.
Imọ ikafiakke ibịne abiaibọk udọn̄ọ ibuọt. Ifiọk imọ ke Ikọ Abasi ama edemede imọ udọn̄ ndidu uwem, ndien emi ekedi mfọn n̄kan ibọk. Imọ ima iyom Mme Ntiense Jehovah ikụt, ndien mmọ ẹma ẹtọn̄ọ ukpepn̄kpọ Bible ofụri ini ye imọ. Imọ n̄ko ima itọn̄ọ ndidụk mme mbonoesop, ndien ibịghike imọ ima ina baptism. Sia mîkopke mfụhọ aba, imọ idahaemi imenyene idara ke ndinam n̄kpọ Jehovah.
N̄wan oro ke ubet ubetowo ama otịm ọnọ n̄kpan̄utọn̄. Ekem enye ama ọdọhọ eyenete an̄wan emi ete: “Ke ndusụk ini, Mme Ntiense Jehovah ẹma ẹsibiọn̄ọ mi; edi edieke ke ndusụk ini ke ini iso, ami ke idemmi ndikabarede ndi kiet ke otu Mme Ntiense Jehovah, edidi ke ntak se afo osụk asiande mi. Ndikpan̄ utọn̄ nnọ fi etie nte nditọn̄ọ ndikụt un̄wana ke n̄kịm n̄kịm ebiet.
Ediwak owo ke ofụri ererimbot ẹmekụt nte edidomo ndikọk mme mfịna uwem ke idemmọ edide ikpîkpu, ndien mmọ ke ẹn̄wọn̄ọde ẹtiene Jehovah Abasi. Edi n̄kpọ idatesịt didie ọnọ mmọ ndifiọk mban̄a obufa ererimbot Abasi oro edide emi kpukpru owo ẹdikopde idatesịt, mfụhọ edinyụn̄ edide n̄kpọ eset!—Mme N̄ke 16:20.