“Nso ke Ami N̄kpanam?”
1 Nte uyen emi ọkọride ebịne akwa owo, afo emekeme ndibụp, ‘Nso ke n̄kpada uwem mi nnam?’ Mme uyen Christian ẹyom nditat utom oro mmọ ẹnamde ẹnọ Jehovah ke utom ukwọrọikọ. Edi didie ke afo ekeme ndinam emi ke adan̄aemi obiomde mme mbiomo akwa owo, emi esịnede edinyene se inanade fi ke n̄kan̄ eke obụk? Ndikụt ibọrọ ekeme ndidi ọkpọsọn̄ n̄kpọ.
2 Ndusụk uyen ẹsitịmede esịt ke ini mmọ ẹsede idaha ndutịm uforo ererimbot ye se ẹtịn̄de ẹnịm ẹban̄a ini iso. Mmọ ẹkere ẹte: ‘Nte akpana mfiak n̄ka ufọkn̄wed? Nte n̄kpenyene ndidụk utom uyọhọ ini inikiet inikiet?’ Man ekeme ndinam nnennen ubiere, oyom owo ọbọrọ mbụme emi ke esịt akpanikọ, ‘Nso idi ata akpan n̄kpọ oro ami nnyenede udọn̄ mban̄a ke uwem?’ Ana enye odụn̄ọde mme uduak esie.
3 Nso ke afo ada nte akpan n̄kpọ oro ebehede fi ke ini uyen? Nte afo emenen̄ede enyene udọn̄ ke ndin̄wana okụk, mîdịghe nte afo emenen̄ede oyom ndida uwem fo nnam mme ufọn n̄kpọ Obio Ubọn̄ ẹkọri? N̄weditoro ufọkn̄wed ntaifiọk inọhọ ubiọn̄ unyene utom. Nte ukpụhọ, ediwak owo ẹmekpep mme usọ utom oro ẹyomde ebe ke mme ndutịm ukpep utom, ndusụk ufọkn̄wed ukpep usọ m̀mê ubọkutom, m̀mê ukpepn̄kpọ akamba ufọkn̄wed eke ibio ini oro ẹyomde esisịt ini ye ukeme.
4 Nyene Mbuọtidem ke Ikọ Jehovah: Akakan akpanikọ oro oyomde ikere iban̄a edi nsọn̄ọ otode Jehovah Abasi nte ke imọ iyọnọ se inanade mbon oro ẹnịmde mme udọn̄ n̄kpọ Obio Ubọn̄ akpa ke uwem. (Matt. 6:33) Emi idịghe ikpîkpu un̄wọn̄ọ. Ediwak nditọete oro ẹdụkde Ufọkn̄wed Unọ Mme Asan̄autom Ukpep ẹma ẹnyene mme n̄weditoro akamba ufọkn̄wed mbemiso ẹkekpepde akpanikọ. Edi nso utom idịbi udia ke mmọ ẹkenam? Ata esisịt ẹkenam ubọkọkọ oro mmọ ẹkebọde ukpep. Ediwak ẹkenam ukpekpe utom, ẹsede ẹban̄a idemmọ ke n̄kan̄ okụk nte ọfọnde ke adan̄aemi ẹsiakde usụn̄. Ebede ke nditat se mmọ ẹnamde ke utom ukwọrọikọ, mmọ ke ẹbọ mme edidiọn̄ ẹtịmde ẹkponi ẹkan okụk ekededi.
5 Ke ndibiere se afo akpanamde ke ama okokụre ufọkn̄wed sekọndri, domo kpukpru se ibuanade nyụn̄ dụn̄ọde mme uduakesịt fo ye ntịn̄enyịn. Man enyene ekikere oro adade ukem ukem ke se afo emekde, kere ban̄a mme utọ ntọt nte enye oro odude ke Awake! eke March 8, 1998, page 19-21. Neme ye ete ye eka fo, mbiowo, esenyịn circuit mbufo, ye mme asiakusụn̄ oro ẹkụtde unen ke n̄kann̄kụk mbufo. Oro ayan̄wam fi anam eti ubiere aban̄a se afo akpadade uwem fo anam.—Eccl. 12:1, 13.