Bọ Ufọn To Ndutịm Ufọkn̄wed Utom Ukara Abasi eke 1999
1 Jesus ekedi Etubom Andikpep. ‘Edikpep esie ama enyene mme owo ndyọ.’ (Mark 1:22) Okposụkedi owo nnyịn ndomokiet mîkemeke nditịn̄ ikọ nnyụn̄ n̄kpep n̄kpọ ọfọn nte Jesus akanamde, nnyịn imekeme ndidomo ndikpebe enye. (Utom 4:13) Man inam oro, nnyịn ndibuana ke ndutịm Ufọkn̄wed Utom Ukara Abasi ayan̄wam nnyịn ndika iso mfori mme usọ utịn̄ikọ ye eke unọ ukpep nnyịn.
2 Ke 1999, Utịn̄ikọ Nọ. 1 edikọn̄ọ akpan akpan ke mme ibuotikọ ẹtode magazine Enyọn̄-Ukpeme 1997. Nnyịn iyenen̄ede ikọri ifiọk nnyịn edieke ibemde iso ikot mme ntọt ẹmi ndien ekem ikop enye ke ndutịm ufọkn̄wed. Mbon oro ẹdọhọde ẹnọ ikọ item ẹmi ẹkpenyene ndiwụt nte ẹkemede ndida se ẹtịn̄de nsịn ke edinam, ẹnọde enye ke usụn̄ enemde onyụn̄ enyenede uwem. Utịn̄ikọ Nọ. 3 edikọn̄ọ ke n̄wed Inemesịt Ubon, ndien Utịn̄ikọ Nọ. 4 ọkọn̄ọ ke Mme Ibuotikọ Bible Ndida Nnyene Nneme (Nsiondi 1998), okposụkedi itie ẹdade ẹto ekemede ndikpụhọde ke mme utịn̄ikọ ẹmi. Esenyịn ufọkn̄wed ekpenyene nditịm n̄kere mban̄a ibuotikọ mbemiso edemede mme ikpehe. Kpukpru nditọ ufọkn̄wed oro ẹdinọde n̄kpọ ẹnam ke n̄wed Inemesịt Ubon ẹkpenyene ndinịm nti uwụtn̄kpọ ke uwem ubon mmọ.
3 Da Item Sịn ke Edinam, Nyụn̄ Tịm Idem Nte Ọfọnde: Kpukpru owo ẹkeme ndika iso n̄kọri ke ukeme editịn̄ ye edikpep owo n̄kpọ. (1 Tim. 4:13) Ntem, nnyịn ikpenyene ndiyom item inyụn̄ idehede ise enye nte n̄kpọ oro ẹkpefepde. (N̄ke 12:15; 19:20) Ndinọ akpanikọ uforo uforo ke mme mbono esop ye ke an̄wautom oyom se ikande sụk edibụk se idude m̀mê ndikot mme itien̄wed Abasi eto eto. Oyom isịm esịt inyụn̄ idemede udọn̄ mbon oro ẹkpan̄de utọn̄ ẹnọ nnyịn. Nnyịn imekeme ndinam emi ebe ke nditịn̄ akpanikọ otode nnyịn esịt ke usụn̄ anamde owo enịm. (Men Utom 2:37 domo.) Item oro ibọde ke ufọkn̄wed ayan̄wam nnyịn ndinam emi.
4 Ke ndondo oro ọbọde se ẹnọde ẹnam, kere ban̄a mme ido utịn̄ikọ oro afo edinamde utom nte ẹnamde an̄wan̄a ke Ñwed-item Ufök-ñwed. Kere ban̄a se oyomde afo anam man ada item oro ọkọbọde ke akpa esịn ke edinam. Tie kere ibuotikọ fo, nte editịmde enye edieke oyomde, ye nte edibuande mme itien̄wed Abasi oro ẹdude ke se ẹnọde fi anam. Kere ban̄a mfọnn̄kan usụn̄ oro ekemede ndida mme ntọt oro n̄kpep nnyụn̄ ndemede udọn̄.—1 Tim. 4:15, 16.
5 Edieke afo okopde ndịk aban̄a edisịn enyịn̄ ke ufọkn̄wed, bọn̄ akam ban̄a emi nyụn̄ neme ekikere fo ye esenyịn ufọkn̄wed. Kpukpru owo ẹkeme ndibọ ufọn ebe ke ndida ndutịm emi ẹdinọde ke Ufọkn̄wed Utom Ukara Abasi ke 1999 nnam n̄kpọ ọyọhọ ọyọhọ.