Mmọ Ẹkeme Ndikụt Nte ke Nnyịn Idi Isio
1 Isua oko, se ibede mbufa owo 300,000 ẹma ẹdiana ye nnyịn ebe ke ndina baptism. Nso ke mme owo ẹmi ẹkụt ke Mme Ntiense Jehovah oro anamde mmọ ẹyom ndidi ubak esop Abasi? Ntak emi nnyịn idade isio isio ikpọn̄ kpukpru ido ukpono eken? Ndusụk in̄wan̄în̄wan̄ ibọrọ ẹdi ẹmi:
—Nnyịn imọsọn̄ọ iyịre ke Bible utu ke ekikere idemowo: Nnyịn ituak ibuot inọ Jehovah Abasi “ke spirit ye ke akpanikọ,” kpa nte Jesus Christ ọkọdọhọde ẹnam. Emi ọwọrọ edisịn mme nsu eke ido ukpono nnyụn̄ nnam item Ikọ Abasi oro ẹwetde-wet.—John 4:23, 24; 2 Tim. 3:15-17.
—Nnyịn ikaka ibịne mme owo utu ke ndibet mmọ ẹdi ẹbịne nnyịn: Nnyịn ima inyịme utom oro Christ ọdọn̄de ete ikwọrọ inyụn̄ ikpep, ndien nnyịn ikpebe uwụtn̄kpọ esie eke ediyom mbon esịt akpanikọ. Nnyịn isiyom mmọ ke ufọk mmọ, ke efak, m̀mê ke ebiet ekededi oro ẹkemede ndikụt mmọ.—Matt. 9:35; 10:11; 28:19, 20; Utom 10:42.
—Nnyịn inọ kpukpru owo ukpep eke Bible ke mfọn: Nnyịn ida inyene ye odudu nnyịn inam n̄kpọ ke mfọn, isịnde se ibede biliọn hour kiet ke utom Abasi kpukpru isua. Ye unana asari, nnyịn ikpep Bible ye kpukpru orụk owo.—Matt. 10:8; Utom 10:34, 35; Edi. 22:17.
—Nnyịn imetịm ibọ ukpep man in̄wam mme owo ke n̄kan̄ eke spirit: Ebede ke ọkpọkpọ ukpepn̄kpọ Bible nnyịn ye ukpep oro ẹnọde ke mme mbono esop, n̄kpri mbono, ye ikpọ mbono, nnyịn imọbọ ọsọn̄urua, n̄kaiso ukpepn̄kpọ eke ukara Abasi, emi anamde nnyịn isịn mbon efen ke un̄wana ke n̄kan̄ eke spirit.—Isa. 54:13; 2 Tim. 2:15; 1 Pet. 3:15.
—Nnyịn ida akpanikọ ke akpan n̄kpọ, idade enye isịn ke edinam ke uwem nnyịn eke usen ke usen: Ke ntak ima oro inyenede inọ Abasi, nnyịn inam mme ukpụhọde, inamde uwem nnyịn odu ke n̄kemuyo ye uduak esie. Obufa edu nnyịn oro ebietde eke Christ odụri mbon efen ebịne akpanikọ.—Col. 3:9, 10; Jas. 1:22, 25; 1 John 5:3.
—Nnyịn idomo ndidụn̄ nnyụn̄ nnam utom ye mbon efen ke emem: Ndikọri mme edu Abasi an̄wam nnyịn ikpeme mme edinam ye ikọ inua nnyịn. Nnyịn ‘imoyom emem ye kpukpru owo inyụn̄ ibịne enye.’—1 Pet. 3:10, 11; Eph. 4:1-3.
2 Mme uwụtn̄kpọ edu uwem Christian oro mme owo ẹkụtde ke esop Jehovah ẹnụk ediwak owo ndinyịme akpanikọ. Ọkpọkpọ uwụtn̄kpọ nnyịn akpakam enyene ukem odudu oro ke idem mbon ẹmi ẹdiọn̄ọde ẹnyụn̄ ẹkụtde nnyịn.