Mme Esenyịn Oro Ẹdade Usụn̄—Esenyịn Oro Etiede Ibuot
1 Ndinam utom nte esenyịn ke esop edi akwa mbiomo. (Utom 20:28; 1 Tim. 3:1) Emi edi akpa ke otu udịm udịm ibuotikọ oro ẹdiwụtde nsio nsio utom mbiowo Christian man kpukpru nnyịn ikeme ndifiọk akpan utom oro mmọ ẹnamde ke ibuot nnyịn.
2 N̄ka emek esenyịn oro etiede ibuot ndinam utom ke ikpehe ini oro mînyeneke-nyene adan̄a. Nte esenyịn oro etiede ibuot etịmde mme n̄kpọ, emi an̄wam mbiowo ndinọ akpan ntịn̄enyịn ke mme utom oro ẹnọde mmọ ndinam. (Utom Nnyịn, p. 42) Nso ke emi esịne?
3 Esenyịn oro etiede ibuot ọbọ n̄wed ẹnọde ẹsọk esop onyụn̄ ayak enye usọp usọp ọnọ ewetn̄wed man ese aban̄a. Ke etịmde idem ọnọ mme mbono mbiowo, esenyịn oro etiede ibuot ọbọ mme ekikere oto mbiowo ke mme n̄kpọ ẹyomde ẹneme onyụn̄ ewet ndutịm. Enye n̄ko anam n̄kpọ nte etieibuot okpokoro ke mme mbono mbiowo. Ke ini ẹnamde mme ubiere, enye okụt ete ke ẹtiene mmọ nte odotde. Enye ese aban̄a editịm Esoputom ye mme ndutịm utịn̄ikọ an̄wa. Enye ọnọ unyịme ke kpukpru ntọt oro ẹnọde esop, ọnọ odudu man ẹkpe kpukpru okụk oro esop nte ido edide abiatde, onyụn̄ okụt ete ke ẹdụn̄ọde ibatokụk esop ikanan̄ ke isua.
4 Nte etieibuot okpokoro, esenyịn oro etiede ibuot etịm utom Kọmiti Utom Esop. Ke ini eyen ukpepn̄kpọ Bible oyomde ẹdiọn̄ọ imọ nte asuanetop oro mînaha baptism m̀mê ke ini asuanetop oro mînaha baptism oyomde ndina baptism, esenyịn oro etiede ibuot odiomi mbiowo ndisobo ye enye. Esenyịn oro etiede ibuot n̄ko ada iso ke nditịm idem nnọ edidi esenyịn circuit man esop ekeme ndibọ ufọn ọyọhọ ọyọhọ nto san̄asan̄a urua utom oro.
5 Utom esenyịn oro etiede ibuot ẹwak ẹnyụn̄ ẹdi nsio nsio. Nte enye ke nsụhọdeidem esịnde “ifịk” ese aban̄a mme mbiomo esie, kpukpru nnyịn imekeme ndinam udeme nnyịn ebe ke ndidiana kiet ye mbiowo. (Rome 12:8) Edieke nnyịn ‘ikopde uyo’ inyụn̄ ‘isụkde ibuot’ inọ mbon oro ẹdade nnyịn usụn̄, mmọ ẹkeme ndinam utom mmọ ye ata akamba udomo idatesịt.—Heb. 13:17.