Wụt N̄wed Ndidu Uwem ke Nsinsi Uforo Uforo
1 Jesus ama enyene usọ ke nte enye akakamade mme ntọn̄ọikọ. Enye ama ọfiọk se etịn̄de ndidemede udọn̄. Ke idaha kiet, enye ama ọtọn̄ọ nneme ye n̄wan Samaria, ebe ke ndikam ndọhọ enye ọnọ imọ mmọn̄ in̄wọn̄. Emi inikiet inikiet ama omụm ntịn̄enyịn esie koro “mme Jew mîsan̄ake n̄kpọ ye mbon Samaria.” Nneme oro eketienede ke akpatre ama an̄wam enye ye ediwak mbon efen ndikabade ndi mme andinịm ke akpanikọ. (John 4:7-9, 41) Nnyịn imekeme ndikpep n̄kpọ nto uwụtn̄kpọ esie.
2 Ke ini etịmde idem ndinọ n̄wed Ndidu Uwem ke Nsinsi, bụp idemfo, ‘Nso ke mme owo ẹkere idahaemi ẹban̄a ke efakutom nnyịn? Nso ididemede uyen, akwa owo, ebe, m̀mê n̄wanndọ udọn̄?’ Afo emekeme nditịm se iwakde ikan ntọn̄ọikọ kiet onyụn̄ odiomi ndida enye oro etiede nte odot akan ke idaha odude nnam n̄kpọ.
3 Sia ediwak owo ẹkerede ẹban̄a mbiara uwem ubon, afo emekeme ndidọhọ:
■ “Mme mfịghe uwem eke usen ke usen ẹsịn̄ede mme ubon idiọk idiọk mfịn. M̀mọ̀n̄ ke mmọ ẹkeme ndikụt un̄wam? [Bet ibọrọ.] Bible ekeme ndidi ata un̄wam nnọ nnyịn. [Kot 2 Timothy 3:16, 17.] N̄wed Abasi ọnọ mme ndausụn̄ ẹmi ẹnyenede ufọn oro ẹkemede ndin̄wam mme ubon ẹbọhọ. Tịm fiọk se ẹwetde ke ikpehe ekikere 3 ke page 238 ke n̄wed emi, Afo Emekeme Ndidu Uwem ke Nsinsi ke Paradise ke Isọn̄.” Kot ikpehe ekikere 3 nyụn̄ nọ n̄wed oro.
4 Ediwak owo ẹkere ẹban̄a mfịna ubiatibet oro ọkọride-kọri. Afo emekeme ndikama ntọn̄ọikọ etienede mi:
■ “Nnyịn inyene nneme ye mme owo iban̄a se itịbede inọ ọkpọkpọ ifụre. Ekese ubiatibet ẹdu ẹkan nnyịn ẹkụk, ndien enye otụk uwem nnyịn. Afo ekere ke oyom nso man mme owo nte afo ye ami idu ke ifụre ke mme efak ke okoneyo?” Afo emekeme ndikot Psalm 37:10, 11 onyụn̄ osio mme edidiọn̄ oro Obio Ubọn̄ Abasi edidade edi owụt, adade page 156-158 eke n̄wed Ndidu Uwem ke Nsinsi.
5 Edieke afo amade usụn̄ edisobo oro ememde akan, afo emekeme ndidọhọ:
■ “Nnyịn isịn udọn̄ inọ mme mbọhọidụn̄ nnyịn ndikere mban̄a utịbe utịbe ini iso oro Bible akamade ọnọ nnyịn. [Kot Ediyarade 21:3, 4.] Nte emi enem fi ndikop? [Bet ibọrọ.] Ibuot 19 ke n̄wed emi owụt mme edidiọn̄ efen oro okopitem ubonowo edidarade ke idak Obio Ubọn̄ Abasi.” Edieke udọn̄ odude, nọ n̄wed Ndidu Uwem ke Nsinsi.
6 Nditịm ntọn̄ọikọ oro enyenede uforo ekeme ndin̄wam fi ndisịm mbon oro ẹkopde biọn̄ edinen ido.−Matt. 5:6.